Dünən Türkiyə çempionatının 21-ci turu çərçivəsində sürpriz nəticə qeydə alındı.

“Football-plus.az” xəbər verir ki, portuqaliyalı Fernando Santuşun təyinatından sonra yüksəlişə keçən və ardıcıl 2 rəsmi oyunda böyükhesablı qələbələr qazanan ''Beşiktaş'' debütant ''Pendikspor''la səfər matçında əsl fiasko yaşadı. İstanbul nəhəngi favorit hesab olunduğu qarşılaşmada düşmə zonasında qərarlaşan rəqibinə 4 cavabsız qolla məğlub oldu!

Maraqlıdı ki, ''Pendikspor''un buna qədər böyükhesablı qələbəsi yox idi. Yəni tarixində ilk dəfə elitada oynayan bu kollektiv ilk darmadağını İstanbul nəhəngi üzərində əldə etdi. Bundan başqa ''Qartal'' debütantlarla oyunlardakı ən böyükhesablı məğlubiyyətini, yəni antirekorudunu tekrarladı. Buna qədər ''ağ-qaralar'' superliqada iki dəfə debütantlara 4 top fərqi ilə məğlub olmuşdu. Bu, 2021-in noyabrında evdə ''Girəsunspor'' (0:4) və 2001-in fevralında səfərdə ''Çaykur Rizəspor''la (1:5) oyunlarda qeydə alınmışdı. Onu da bildirək ki, ''Pendikspor'' güclü rəqibindən ilk dövrədəki səfər matçından da xal qoparmağı bacarmışdı (1:1). Sonuncu dəfə debütantlar arasında bir mövsümün hər iki oyununda ''Beşiktaş''a uduzmayan komanda 2007/08-də ''İstanbul BŞ'' olmuşdu.

ƏLİ