“Bu il hazırlıq prosesi üçün çox qısa vaxt ayrılmışdı. Belədə hansısa futbolçunun performansı haqda fikir yürütmək çətin olur. Az müddətdə ciddi irəliləyişdən söhbət gedə bilməz. Çünki çempionat yenicə başa çatmışdı. İndi hansısa fərqdən danışmaq çox çətindi. İndi hər klubun təlim-məşq toplanışları çərçivəsində özünəməxsus planları var. Başqa komandalardan oyunçu cəlb edənlər də var, öz gənclərinə şans verənlər də. Türkiyədə maraqlı rotasiyaların şahidi oldum. İki müxtəlif heyətlə oynayan kollektivlər də gördüm. Ümumi mənzərəyə nəzər salsaq, əksəriyyətinin mövsümün ikinci yarısı üçün tam hazır olduqlarını demək mümkün deyil. Bunu anlayışla qarşılamaq olar”.

“Məlumdu ki, hələ hazırlıq dönəmidi. Baş məşqçilər yüngül məşqlərə və ilkin yükləmələrə üstünlük verir. Dediyim kimi, mütəxəssislər bütün oyunçuların meydana çıxması üçün lazımi şəraiti yaratmağa çalışdı. Gördüyüm qədər, eləsi 45 dəqiqə, eləsi də matçboyu meydanda oldu. “Qarabağ” – “Zirə” görüşünü də izlədim. Dörd hissədən ibarət oyun oldu. Nəticədə futbolçular hərəyə təxminən 70 dəqiqə ərzində çıxış etmək, formaya düşmək şansı qazandı. Görünür, baş məşqçilər onların tam hazır olmadığını nəzərə alıb, buna uyğun dəyişikliklər etdi”.

“Əlbəttə, bəzi klublarda oyunçu çatışmazlığı var. Belə problemə daha çox “Səbail”lə “Sumqayıt”da rast gəldim. Nəticədə müəyyən epizodlarda boşluqlar nəzərə çarpırdı. Hər iki komandanın bir oyununu izləyə bildim. Onların ehtiyat oyunçular skamyasında 14-15 futbolçu var idi. “Sumqayıt”da gənclər üstünlük təşkil edirdi. Ötən ilin sonuna yaxın bu kollektivlərdə zədəlilərin çox olması bəzi problemlərə yol açıb. Bununla bağlı klub rəhbərləriylə söhbət etdim. Oyunçu transfer etmək istədiklərini, lakin müəyyən səbəblərdən planların baş tutmadığını dedilər. Əlavə etdilər ki, məhz yeni oyunçu almaq xətrinə addım atmaq niyyətləri yoxdu. Heyətini tam formalaşdıran komandalara gəlincə, “Qarabağ”la “Zirə”nin adını çəkmək olar. Bunu meydanda sərgilədikləri performansa əsasən demək mümkündü. Qurban Qurbanov yerli futbolçulardan Aleksey İsayevi, Rəşad Sadıqov isə Ceyhun Nuriyevi transfer edib. Məncə, belədə iki güclü heyət yaratmağı bacarıblar.

“Oyunçuların gücünü millimizin gələcək taleyiylə birgə müzakirə etsək, hələ ki kiminsə tam hazır olduğunu demək olmaz. Lakin qış fasiləsindən öncə elə futbolçular var idi ki, yığmaya namizədlər siyahısında idilər. Klub və futbolçu adı çəkmək istəmirəm, amma əksəriyyəti gözə pis dəymirdi. Çox güman, çempionat başlayandan sonra tezliklə əvvəlki formalarına qovuşacaqlar. Belədə bizim üçün daha faydalı işlər görə biləcəklər”.