“Araz-Naxçıvan” mövsümə uğurlu start versə də, ötən ilin son turları ürəkaçan nəticələrlə yadda qalmadı. Muxtar Respublika təmsilçisi 18 turdan sonra 26 xalla turnir cədvəlinin 6-cı pilləsində qərarlaşıb. Komandanın qarşısına Konfrans Liqasına vəsiqə qazanmaq tələbinin qoyulduğunu bilirik. Belədə baş məşqçi Azər Bağırov və yetirmələri davam edən qış fasiləsindən maksimum yararlanmalıdı. Söhbət həm komandanın düzgün transfer siyasətiylə güclənməsindən, həm də fiziki və psixoloji cəhətdən hazır olmasından gedir. Xatırladaq ki, “Araz-Naxçıvan” ilk yoxlama oyununu yanvarın 10-da “Dalğa Arena”da “Zirə”yə qarşı keçirdi və 1:2 hesablı məğlubiyyət yaşadı.

Bilindiyi kimi, naxçıvanlıların kapitan sarğısı bosniyalı mərkəz müdafiəçisi Numan Kurdiçin qolundadı. Klub 24 yaşlı futbolçuyla birillik müqavilə imzalayıb. Dünən onunla söhbətdə özü və komandası haqda bəzi məqamlara aydınlıq gətirdik.

– Numan, Misli premyer-liqasında cari mövsümdə debüt edən kollektivin futbolçususan. Ölkəmizə gələndə “Araz-Naxçıvan”ın çətin sınaqlardan keçəcəyini bilirdin. Çünki rəqiblər elita təcrübəsi olan peşəkar klublardı. Buna görə narahat idin? Və indiki nəticələr səni təəccübləndirirmi?
– Bəli, başverənlərdən xəbərdar idim. Yeni komandam 1-ci divizionun çempionu olmuşdu. Amma işlərin necə irəliləyəcəyi haqda fikir sahibi deyildim. Sözün düzü, heç bir anlayışım yox idi. İşlərin necə irəliləyəcəyini maraqla gözləyirdim. Bir-iki oyundan sonra anladım ki, istənilən rəqibə qarşı sona qədər mübarizə aparacaq komandamız var. “Araz-Naxçıvan”ı çox bəyənirəm.

– Premyer-liqada 18 tur geridə qaldı. Bu, Azərbaycanda mövsümün yarılanması deməkdi. Qarşıdan həlledici oyunlar gəlir. Kapitan olduğuna görə komanda yoldaşlarınla müqayisədə yükünün daha ağır olacağı bəllidi. Özünü psixoloji və fiziki cəhətdən tam hazır hiss edirsən?
– Sadəcə, məndə yox, bütün komandada əhval-ruhiyyə yüksəkdi. Hər şey qaydasındadı. Nəyə qadir olduğumuzu bilirik və daha çoxunu edə bilmək üçün daim üzərimizdə işləyirik. 3-cü dövrənin başlamasına az qalıb. Ona görə də indi çox çalışıb rəsmi oyunlar zamanı bəhrəsini görmək istəyirik. İnanıram ki, ən yaxşısını edəcəyik.

– Səncə, Azərbaycanla Bosniya və Hersoqovina futbolu arasında hansı fərqlər var?
– Ciddi fərqin olduğunu deyə bilmərəm. Düşünürəm ki, əksər cəhətlərdən bir-birinə bənzəyir. Lakin ölkənizdəki meydançalar daha yaxşıdı. Həmçinin burdakı komandalarda Bosniyadakılardan daha çox əcnəbi oyunçu var.

– “Araz-Naxçıvan” turnir cədvəlinin 6-cı pilləsindədi. Halbuki 15-ci turda “Səbail”ə qarşı keçirilən oyunda avtoqol müəllifi olmasan, 28 xalınız olacaqdı. Bu da komandanın ili “ilk 4-lük”də başa vurması demək idi. Psixoloji cəhətdən ağır yük olduğunu nəzərə alsaq, xatırlatmaq istəməzdik, amma bu hadisəni necə şərh edə bilərsən?
– … (susur)

– Klubun hədəfi avrokuboklarda çıxış etməkdi. Hələ ki bu yöndə ən iddialı rəqiblər “Qarabağ”, “Neftçi”, “Səbail” və “Zirə”di. Səncə fərqi azaldıb hədəfə çatmaq üçün nə etmək lazımdı?
– Futbolda hər şey mümkündü. Adını sadaladığınız klubların favorit olduğunu düşünürəm. Amma bu o demək deyil ki, təslim olacağıq. Yaxşı oyun göstərib turnir cədvəlindəki yerimizi möhkəmləndirməli və irəli atılmalıyıq.

– Geridə qalan 18 oyun zamanı hansı rəqiblə qarşılaşma sənin üçün daha yaddaqalan, baxımlı və əyləncəli oldu?
– Öz adıma danışası olsam, hər rəqibə qarşı eyni tərzdə hazırlaşıram. Məncə, komandalar kifayət qədər güclüdü. Sıxıcı və əyləncəli oyunlara gəlincə, böyük klublarla qarşılaşmalar daha maraqlı olur. Rəqabət güclüdüsə, deməli, həyəcan da var.

– Yeni ilin gəlişi Azərbaycanda xüsusi qeyd olunan bayramlardandı. Sən 2024-cü ilə necə qədəm qoydun? Komanda yoldaşlarınla qeyd etdinmi?
– Dini inancıma görə bu bayramı qeyd etmirəm. Həmin gün evimdə ailəmlə birgə oldum.

– Premyer-liqada qış “transfer pəncərəsi” açıldı. Ən azı mövsümün sonuna qədər “Araz-Naxçıvan”da qalmaq istədiyini bilirik. Bəs başqa təkliflər varmı? Qərarının hər an dəyişə biləcəyini demək olar?
– Hələ ki planımda heç nə yoxdu. Amma heç kim gələcəyin necə olacağını deyə bilməz. Bu üzdən hazırda komandama köklənmişəm və uğur qazanmaq istəyirəm. Qısası, “Araz-Naxçıvan”layam.

KƏNAN BAHADIR