Daha bir futbol həftəsini geridə qoyduq.

"Football-plus.az" ötən həftənin maraqlı sitatlarını təqdim edir:

Dorival Junior, Braziliya yığmasının baş məşqçisi: “Braziliya yığması zədəli olduğunu nəzərə alaraq Neymarsız oynamağı öyrənməlidi. Bizim dünyada ən yaxşı üç futbolçudan biri sayılan oyunçumuz var. Onun üstünlüklərindən effektli şəkildə yararlanmalıyıq. Neymar komandamız üçün çox vacib futbolçudu”.
Harri Keyn, “Bavariya”nın hücumçusu: “Bundesliqada həyatdan həzz alıram. Burda bütün klub, komanda və heyət məni qəbul etdi. Dünyanın ən böyük klublarından olan “Bavariya”nın bir hissəsi olduğum üçün çox xoşbəxtəm. Mən həmişə demişəm ki, karyeramda daim hərəkət etmək və özümü ən yüksək səviyyədə göstərmək istəyirəm. Bu klubda qalib gələn mentallıq var”.
Xavi Ernandes, “Barselona”nın baş məşqçisi: “Rəqiblərimizə hədiyyə verməyi dayandırmalıyıq. Bəli, bu mövsüm öz meydanımızda matçları çətinləşdirən müəyyən səhvlərimiz olub, amma düşünürəm ki, onları tədricən aradan qaldırırıq. Son oyunlarda yaxşı təsir bağışlaya bilmişik. Pley-offda kobud səhvləri təkrarlaya bilmərik. Çünki rəqib dərhal bizi cəzalandıracaq”.
Bernd Rayxart, Avropa Superliqasının baş direktoru: “Klubların Superliqada iştirak etməməsi üçün hansı səbəbləri ola bilər? Mən bu sualı tez-tez verirəm: xahiş edirəm ki, avrokubokların mövcud sistemindən nəyi saxlamağın lazım olduğunu mənə izah edin. Çünki bu, sizin klubunuz üçün vacib məsələdi. Onu da deyim ki, indiyədək heç bir klubdan dəqiq cavab ala bilməmişəm. Ona görə ki, mövcud sistemdə klublara orta və uzunmüddətli perspektivdə daha güclü və dayanıqlı olmaları üçün heç nə təklif edilmir. Klublar zaman keçdikcə daha da rəqabətsiz turnirə çevrilən çempionatlarda yarışırlar. Çünki əsl mübarizə mühitini formalaşdıra bilmədikləri televiziya bazarına daxil olurlar. Məsələn, İngiltərə premyer-liqası. Ona görə də, klublar iqtisadi cəhətdən ikinci vacib təminata malik olmaq üçün ümidini avrokuboklara bağlayırlar. Fərq ondadı ki, qitə kuboklarının mövcud sistemi bunu klublara təklif etmir, amma biz edirik”.
Fabio Kannavaro, İtaliya yığmasının sabiq müdafiəçisi: “Napoli”də indi mürəkkəb vəziyyət yaranıb. Luçano Spallettnin baş məşqçi vəzifəsindən gedişi mənfi effekt verdi. Üstəlik, klubu idman direktoru Cuntoli və aparıcı müdafiəçilərdən Kim Min Ce də tərk edib. Bu itkilər komandaya mənfi təsir edib. Fikrimcə, çempionluq uğrunda mübarizənin favoriti “İnter”di. Bu komandada daha çox keyfiyyətli futbolçular cəmləşib, milanlıların ehtiyat oyunçular skamyası da genişdi. “İnter”in hücumameyilli oyunu xoşuma gəlir”.
Sebastyan Kel, Dortmund “Borussiya”sının idman direktoru: “Sançonu geri qaytarmaq bizə heç də asan başa gəlmədi (futbolçu mövsümün sonuna qədər “Mançester Yunayted”dən icarəyə götürülüb – R.Y.), bu əməliyyat üçün çox vaxt sərf etdik. İndi Ceydonun gözlərindəki alovu görə bilərsiz. O, yenidən futbol oynaya biləcəyinə görə çox şaddı. Onu yüksək oyun səviyyəsinə mümkün qədər tez qaytarmaq üçün əlimizdən gələni edəcəyik”.
Erik Dayer, “Bavariya”nın müdafiəçisi: “Bu keçid mənim üçün reallaşan arzudu. Çünki, hələ uşaq yaşlarında olarkən nə vaxtsa, “Bavariya” kimi böyük klubda oynamağı xəyal edirsən. Bu, dünya futbolunda böyük tarixə malik klubdu. Yeni komanda yoldaşlarım və “Alyans Arena”da azarkeşlərlə ilk görüşümü səbirsizliklə özləyirəm”.
Nasser Əl-Xelayfi, PSJ-nin prezidenti: “O, mənim üçün komandanın ən yaxşı oyunçularından biri idi. Bəlkə də, onun uzun illər əvvəl reallaşan transferi PSJ üçün ən keyfiyyətli sərmayə olub. Yaddaşım məni aldatmırsa, Markonu 11 milyon avroya almışdıq (italiyalı yarımmüdafiəçi ötən yay Qətərin “Əl-Ərəbi” klubuna 45 milyon avroya satılıb – R.Y.). Verratti komandamızda 11 il çıxış etdi və hər il ən yaxşı oyunçularımızdan biri oldu. O, PSJ-nin əfsanəsi kimi xatırlanacaq”.
Karlo Ançelotti, “Real”ın baş məşqçisi: “Simeone “Atletiko” üçün ideal məşqçidi. Əks halda postunda bu qədər uzun müddət fəaliyyət göstərə bilməzdi (argentinalı mütəxəssis komandanı 2011-ci ilin dekabrından çalışdırır – R.Y.). Bir-birimizi yaxşı tanıyırıq, uzun müddətdi ünsiyyət saxlayırıq. Aramızda qarşılıqlı hörmət var”.
Quus Hiddink, niderlandlı məşqçi: “Frants böyük oyunçu, məşqçi və xeyirxah adam idi. Onunla bir neçə dəfə görüşmək şərəfinə nail olmuşam. O, çox dünya lideri üçün nümunə olmalı idi. Bekkenbauer insanları birləşdirmək qabiliyyətinə malik olan şəxsiyyət idi. Buna nümunə kimi vətəni Almaniyada 2006-cı ildə təşkil edilən dünya çempionatını göstərə bilərəm”.
Viktor Mozes, Nigeriya yığmasının sabiq yarımmüdafiəçisi: “Bizim uşaqlara Afrika Millətlər Kubokunda uğurlar! Əvvəlki turnirlərlə bağlı inanılmaz xatirələrim var. Siz bu il tarixə düşə bilərsiniz. Hamınızı dəstəkləyirik!”
Viktor Osimhen, “Napoli”nin hücumçusu (komandanın oyunçusu Xviça Kvaratsxeliyanın agenti Mamuka Cuqeliyə cavabı): “Əziz Mamuka Cuqeli, sən əclaf və biabırçısan. Sənin məntiqinə görə özümü narahat hiss edirəm (bir müddət əvvəl Osimhenin yayda Səudiyyə Ərəbistanı klublarından birinə keçəcəyini deyən agent Xviçanın 1 milyard avroya belə Asiya ölkəsinə yollanmaq isəməyəcəyini əlavə etmişdi – R.Y.). Kütbeyin! Bundan sonra mənim adımı xatırlamağa cəhd etmə”.
Emmanuel Adebayor, Toqo yığmasının sabiq hücumçusu: “O, İngiltərə çempionatında oynamaq üçün doğru münasibətə, mentallığa və qətiyyətə malikdi. Onun bu ölkəyə yollanması və nəyə qadir olduğunu göstərməsi üçün Tanrıya dua edirəm. Premyer-liqa dünyanın ən çətin və ən yaxşı ölkə çempionatıdı. Osimhen artıq İtaliyada sözünü deyib. Məncə, indi İngiltərəyə gedərək kumiri Droqbanın yolunu davam etdirmək və yüksək məhsuldarlıq nümayiş etdirməsi üçün ən münasib vaxt yetişib. Viktor premyer-liqanı fəth etmək üçün hər cür keyfiyyətə malikdi”.
Valter Matsarri, “Napoli”nin baş məşqçisi: “Yanvarda “Napoli”də inqilab olmur. Ona görə ki, bu ayda transfer bazarından komandaya cəlb edə biləcəyimiz oyunçuların sayı azdı. Ümumiyyətlə, transfer mövzusunda rəhbərliyin danışmasını daha məntiqəuyğun hesab edirəm. Mən isə öz növbəmdə futbolçulara ötən mövsüm malik olduqları əminliyini geri qaytarmaqda kömək etmək istəyirəm. Biz yaxşı futbol, balanslaşdırılmış oyun sərgiləməli və lazımsız səhvlərdən qaçmağı bacarmalıyıq”.
Dieqo Maradona, Argentina yığmasının sabiq hücumçusu Dieqo Maradonanın oğlu: “Açıq istintaq gedir. Biz, onun övladları Argentina ədalətinə inanırıq. Əminəm ki, bu, belə bitməməli idi. Onlar atamı öldürdülər (əfsanəvi futbolçu 2020-ci il noyabrın 25-də müalicə aldığı xəstəxanada xroniki ürək çatışmazlığından yaranan kəskin ağciyər ödəmi nəticəsində ölüb. Bir müddət sonra Maradonanın şəxsi həkimi işində yol verdiyi səhlənkarlığa görə istintaqa cəlb olumuşdu – R.Y.). Bunu kimin etdiyini demək mənim işim deyil. Bu barədə fikirlərim var, amma ifadə edə bilmirəm. Onu taleyin ümidinə buraxdılar, halbuki nəsə etmək olardı. Özümə söz vermişəm: həyatımın son gününə qədər ədalət uğrunda mübarizə aparacağam”.
Kalidu Kulibali, Seneqal yığmasının müdafiəçisi: “Biz afrikalılar milli komandamızda oynamaq və milli rənglərimizə hörmət etməyimizlə qürur duymalıyıq. Afrika mənim üçün gələcəkdi. Bunu hamının anlayacağına və Afrika futbolunun yüksəlməsi üçün hər şey edəcəyini ümid edirəm. Mənim üçün söhbət yalnız Seneqaldan yox, bütün Afrikadan gedir. Biz sonuncu dünya çempionatında Mərakeş yığmasının yarımfinala çıxmasına çox sevindik. Hamı sevinirdi, amma bu nəticə mənə görə normal idi. Biz gələcəkdə Afrikanın dünya çempionatında qələbə qazanmasına da nail ola bilərik”.
Kalidu Kulibali, Seneqal yığmasının müdafiəçisi: “Afrikanın dünya çempionatında qələbə qazanmasına da nail ola bilərik”.