Təbii ki, fasilədəki yoldaşlıq oyunları komandaların gücünü qiymətləndirmək baxımından indikator rolunu oynaya bilməz.

Bununla belə, Azərbaycanın iddialı klublarının bir-birinin ardınca darmadağın olması yaxşı hal deyil. Şənbə günü “Neftçi” Almaniyanın 3-cü liqa təmsilçisindən üç qol buraxdısa, ertəsi “Sabah” eyni aqibəti yaşadı. Bəli, söhbət premyer-liqa klublarının Türkiyədəki təlim-məşq toplanışından gedir.

Əvvəlki oyunda Buxarest “Rapid”ini 2:1 hesabıyla məğlub edən “Sabah”ın “Vorskla” ilə qarşılaşmasını maraqla gözləməyə dəyərdu. Poltava klubu Ukrayna elitasında 17 turdan sonra 23 xalla 7-ci pillədə qərarlaşıb. Antalyadakı Hüseyn Aygün Futbol Mərkəzində keçirilən qarşılaşma Bakı vaxtı ilə saat 18.00-da PFL-ın “yutub” kanalında canlı yayınlandı. İlk yarı qarşılıqlı hücumlar şəraitində keçdi. Amma zərbələrin qeyri-dəqiqliyi hesabın açılmasına imkan vermədi. Murad Musayevin komandasında xətlərarası əlaqə baxımından da çatışmazlıq sezilirdi. Oyunda sükut 41-ci dəqiqədə pozuldu. “Vorskla”nın kapitanı İqor Perduta sağ cinahdan cərimə meydançasına daxil olaraq, sol ayağıyla iti bucaq altından topu yaxın “altılığ”a göndərməyi bacardı. Gözləmək olardı ki, Musayev komandasının oyununda lazımi düzəlişlər edəcək və “Sabah” 2-ci hissədə məğlubiyyətdən qurtulmağa çalışacaq. Təəssüf ki, belə olmadı. Sanki bakılılar daha yorğun görünürdü. 72-ci dəqiqdə “Sabah” meydanın mərkəzindəki top itkisinin əvəzini ağır ödədi. Rəqibin braziliyalı futbolçusu Felipe Rodriges cərimə meydançasının kənarından baxımlı qola imza atdı. “Sabah” bundan sonra da çox çalışsa da, bir neçə standart vəziyyət yaratsa da, fərqi azaltmağı bacarmadı. Əksinə, sona yaxın darmadağına şahidlik etdik. Ukraynalılar təkbətək mübarizələrdə birmənalı şəkildə üstün idi. Sona 6 dəqiqə qalmış “Sabah” yenidən meydançanın mərkəzinə dəvət olundu. Bu dəfə Ruslan Stepanyuk kornerdən ötürülən topu başla qapıdan keçirməyə müvəffəq oldu. Beləliklə, oyunda başqa qol olmadı. “Neftçi”nin ardından “Sabah” da 3 cavabsız qolla uduzdu. Musayevin meydana buraxdığı start heyətini təqdim edirik: Nicat Mehbalıyev, Maruan Hadudi, Tellur Mütəllimov, Con İrasabal, Boyan Letiç, Elvin Camalov (k), Ayaz Quliyev, Anatoli Nuriyev, Vinsent Till, Cesse Sekidika, İshak Belfodil.
Ehtiyat oyunçular: Yusif İmanov, Rüstəm Samiqullin, Sofian Çakla, Rəhman Daşdəmirov, Kristian da Silva, Davit Volkov, Amin Seydiyev, Xəyal Əliyev, Emmanuel Apeh, Abdulla Xaybulayev, Fəxri Məmmədli, Namik Ələskərov, Jarl Marqarita.

Musayevin oyunla bağlı fikirləri: