"Bildiyiniz kimi, hər il olduğu kimi, bu il də Peşəkar Futbol Liqasının çəkiliş qrupu Antalyada təlim-məşq toplanışı keçən klublarımızın yoxlama oyunlarından canlı yayımlar təşkil edir. Bu heyətin içində artıq PFL-in texniki-idman direktoru Elgiz Abbasov da var. Abbasov uzun müddətdən sonra Antalyada toplanış keçən hakimlərimizə seminar verib. Bu həm də yanvarın 14-də ad gününü qeyd edən PFL prezidenti Elxan Səmədova sürpriz etmək imkanı yaradıb. Əməkdaşlarımız Səmədovun müalicəsini davam etdirdiyi İzmirdəki xəstəxanada ona baş çəkiblər. Eyni zamanda Bakıda qalan heyətimizin adından hazırladığımız təbrik videosunu da ona göstəriblər.

Öz adımdan danışsam, məni tanıyanlar bilir ki, kiməsə yalandan tərif deməyə nifrət edirəm. Amma tam səmimiyyətlə deyirəm ki, təxminən ilyarım əvvəl 15 illik iş yerimi tərk edib PFL-ə keçəndə heç xəyal etməzdim ki, həyatımda rastlaşdığım ən gözütox insanlardan biri ilə çalışacam. Əvvəlki iş yerimdə Səmədovdan bəlkə də 5 dəfə imkanlı rəhbərlərlə, dəfələrlə böyük büdcəyə malik şirkətdə işləmək imkanım olub. Amma o maddiyyata sahiblik qarşılığında əməkdaşa münasibətdə PFL rəhbərinin yanaşmasının heç 10 faizini görməmişəm. Bu əvvəlkilərdən narazılığım yox, real düşüncəmdi. İlyarımda bir əməkdaşımız belə deyə bilməz ki, birbaşa rəhbər tərəfindən kiçik də olsa diqqətsizlik, yanlışlıq görüb. PFL bu dəqiqə əsl ailədi və onun da əsas səbəbkarı Elxan Səmədovdu. Yetərincə yaşım olsa da, bu ilyarım ərzində ondan liderlik, səbr, qarşısındakına anlayış, kollektivi idarə etməyin nümunələrini öyrənmişəm. Bu gün onu bu vəziyyətdə təbrik etmək çox ağırdı. Səmədov inanclı insandı. Belə insanlar isə qədərə inanırlar. Deməli, qismətdə bu da var imiş. Allah ona cansağlığı versin, ən qısa zamanda evinə, ailəsinin yanına, işinə dönməyi nəsib eləsin. Dostumuzun, əziz adamımızın dönüşünü səbrsizliklə gözləyirik"

"İlk növbədə Elxan Səmədovu yubileyi münasibətilə təbrik edirəm. Əlbəttə, istəməzdik ki, belə bir vəziyyət olsun. Amma tale yazısından qaçmaq olmur. Sadəcə, biz daha pozitiv məqamlara köklənmişik. Hər şey daha pis ola bilərdi. Sevindirici haldı ki, müalicə prosesində müsbət notlar var və məncə, hər şey çox daha yaxşı olacaq. Çünki Elxan Səmədov bütün müsbət məqamların cəmləşdiyi bir insandı, insanı keyfiyyətləri, peşəkarlığı çox yüksək səviyyədədi. Bilirsiniz ki, Peşəkar Futbol Liqası mehriban və böyük bir ailədi. Daxildə Elxan müəllimin doğum gününü qeyd etdik. Çünki biz onu həmişə yanımızda hiss etdik və hazırda da edirik. Digər tərəfdən, mənə Elxan müəllimi bu əlamətdar gündə görmək nəsib oldu. Onunla Türkiyədə - müalicə aldığı xəstəxanada görüşdüm. Yetərincə nikbindi və hər şeyin yaxşı olacağına inanır. İnanmaq işin yarısıdı. Sonda Elxan Səmədova həyatda hər şeyin ən yaxşısını arzulayıram, çünki o bütün varlığı, insani keyfiyyətləri, xarakteri, dürüstlüyü ilə bunu haqq edir. Onun adının qarşısında dünyanın ən yaxşı sözlərinin hər birini heç düşünmədən yaza bilərik".