"Bu cür zəif, bərbad çıxışımızdan utanırıq. Belə fiaskonun bizdən asılı olmayan səbəbləri var. Öncəliklə onu deyim ki, "Ərgünəş" Füzulinin tarixidi. Məhz bu tarixin unudulmaması və yeni, şanlı səhifələr yazmaq üçün komandanı bərpa etdim. Klubun Region Liqasında çıxış etməsi üçün çox şeylərdən keçdim, borca-xərcə girdim. Düşündüm ki, dəstək olanlar da olacaq. Amma heç kimdən, heç bir təşkilatdan iynənin ucu qədər də olsa, kömək gəlmədi. Bundan başqa, stadion problemimiz var. Ev oyunlarını məcburiyyətdən Ağcabədidə keçiririk. Ordakı stadion da ürəkaçan deyil. Futbolçu bir dəfə ora daxil olub şəraitsizliyi görəndən sonra 2-ci dəfə ayaq basmaq istəmir. Rayonumuzun İkinci Mahmudlu kəndində pis-yaxşı stadion var. Ora bir az əl gəzdirilsə, ev oyunlarımızı orda keçirə bilərik. Kəndin stadionuyla bağlı dəfələrlə İcra Başçısına müraciət etmişəm, amma laqeydliklə cavab verib. Biz Füzulini təmsil edirik, niyə gedib başqa rayonda oynamalıyıq?! Sadaladığım hər iki çatışmazlıqla bağlı dəfələrlə Prezidentimizə, vitse-prezidentimiz Mehriban Əliyevaya, gənclər və idman naziri Fərid Qayıbova məktub yazmışam. İcra başçısına və müavinlərinə saysız xahiş-minnət etmişəm, ərizə yazmışam. Baxan yoxdu, ancaq yola verirlər. Digər problem isə heyətimizin təcrübəsiz, yerli uşaqlardan formalaşmasıdı. Onların da xidmətindən istədiyimiz kimi yararlana bilmirik. Maliyyə sıxıntısına və şəraitsizliyə görə heyətimizə nəticə verə bilən təcrübəli futbolçu cəlb edə bilmirik. Hazırda qapıçı problemimiz var. Daha doğrusu, komandamda "əlcək sahibi" yoxdu. Ona görə də məcburiyyətdən müdafiəçilərdən birini qapıçı kimi oynadıram. Neynəyim, başqa əlacım yoxdu. Futbolçulara doğru-dürüst məvacib verə bilmədiyimizə görə hər biri başqa işdə çalışır. Bir çox hallarda işlərindən çıxıb gələ bilmirlər. Elə qapıçımız fəhlə işləyir. İşdən icazə alıb oyunumuza gələ bilmir. Çünki dolanmaq üçün iş yerini itirmək istəmir. Digər futbolçumuz qarovulçuluq etdiyindəb icazə vermirlər ki, vaxtında məşqimizə, oyunuma gəlsin. Kimisə də qınamaq olmur. Bircə istəyim, amalım odu ki, "Ərgünəş" yaşasın. Amma klubun bu vəziyyətdə olması ürəyimi ağrıdır".