Misli premyer-liqasında 2-ci dövrəyə yekun vuruldu və komandalar qış fasiləsinə yollandı. Yəni mövsümü yarıladıq. Həyəcanlı həftələri geridə qoyduq. Xeyli sürpriz nəticə də qeydə alındı.

Futbolçulara gəlincə, kəşflər də oldu, gözləntiləri qarşılamayanlar da... “Qarabağ”ın Juninyosu, “Səbail”in Ramalinqomu, “Turan Tovuz”un Conu, “Kəpəz”in Papunaşvilisi, “Sabah”ın Volkovu özünü yaxşı tərəfdən göstərən legionerlər sırasındadı. Bunu qol və məhsuldar ötürmə statistikasına əsasən deyirik. Qısası, vəziyyət budu. Amma başqa cür olması gözlənilirdi. Yəni bir futbolçu var ki, onun bu siyahıda olacağına şübhə edilmirdi. Söhbət “Neftçi”nin Emin Mahmudovundan gedir. Statistik göstəricilərə əsasən ondan daha az təcrübəyə malik olan oyunçulardan xeyli geri qalan kapitandan...

Gəlin, məhz bu məsələyə toxunaq. Çünki çempionatda avqustdan dekabrda qədər ən çox tənqid olunan klub adını çəkmək lazım gəlsə, hamının birağızdan “Neftçi” deyəcəyinə əminəm. Bu üzdən komanda haqda mənfi rəy bildirmək niyyətində deyiləm. İslanmışın yağışdan nə qorxusu? Onsuz da “haqqın yolunu tapıblar”. Tənqidlərin zirvə nöqtəsində baş məşqçini qurban verib daha bir neçə ay qazanırlar və sonda eyni ssenari yaşanır...

Emin bu mövsümdən əvvəl “Neftçi” ilə olan müqaviləsini yeniləməyə tələsmirdi. Klubun “Emin bizlə çalışarsa, premyer-liqanın ən yüksək maaş alan futbolçusu olacaq” vədindən bir müddət sonra müqaviləsini yenilədi. Sonra da “şir ürəyi yeyib” dedi ki, “öncə başqa təklifləri dəyərləndirmək istəyirdim. Lakin fərqlilik və pulu yox, “Neftçi”ni seçdim”. Düzdü, heç kim öz ayranına turş deməz, amma bu qədər yox da, ay Emin! Əyri oturaq, düz danışaq...

Premyer-liqada 17 dəfə meydana çıxan (10-cu turda “Səbail”lə matçda sarı vərəqə cəzalısı idi – red.) yarımmüdafiəçi cəmi 4 məhsuldar ötürməylə yadda qalıb. Qolların sayını isə deməyə utanıram... Kimsə xəcalət çəkməlidi, ya yox?!

Xatırladım ki, Emin ötən mövsüm 17 qol, 9 məhsuldar ötürmə müəllifi olub. İgid basdığını kəsməz. Emin “Neftçi”də qol vurmağın dadını unutsa da, əsas millimizdə bunu bacarıb. Yığmanın AÇ-2024-ün seçmə mərhələsində İsveçlə qarşılaşmasında imza atdığı qol uzun müddət unudulmayacaq. O, bununla bütün stadionu ayağa qaldırmışdı. Azarkeşlər mənəvi borcunu belə ödəmişdi. Meydançanın mərkəzindən vurulan zərbəylə çətin rəqibin qapı torunu silkələmək hər kişinin işi deyil. Bu həm də Eminin nəsə bacara bildiyinin aşkar sübutu idi. Bəs, “Neftçi”də niyə alınmır? Bəlkə premyer-liqadakı rəqiblər İsveç millisindən üstündü? Düzü, Eminin bunu yoxlayıb-yoxlamadığına şübhəylə yanaşıram. Çünki onun nə həvəslə meydanın bu başından o başına qaçdığını görmüşəm, nə də qol vurmaq üçün var gücünü sərf etdiyini. Adam süstdü. Yorğun gözləri gecənin bir yarısı yuxudan oyanıb yenidən yatmağa çalışan insanı xatırladır.

Onun psixoloji cəhətdən də eyni vəziyyətdə olduğu bəllidi. Mətbuatla da arası yoxdu. Ona yalnız millinin oyunlarından əvvəl sual ünvanlamaq mümkün olur. Nə qədər eyni cavabları təkrarlamaq olar? Hələ də azarkeşlərin eşitmək istədiyi sözlər eşitmirik. Yəni problemi desə də, həll yolunu demir.

“Neftçi”nin ənənəvi mətbuat konfransları keçirdiyini və hər dəfə başqa futbolçuları jurnalistlərin önünə çıxardığını bilirsiz. Nədənsə Emin Mahmudova sıra gəlmir ki, gəlmir. Ən azı narazılıqlara münasibət bildirilməli, gözləntilərin qarşılanmamasının səbəbləri izah edilməliydi.

Yuxarıda bəsh etdiyimiz qola qayıdaq. Kapitanın etdikləri arasında “dişə vurulası” uğur hələ ki budu. Həm də yarımmüdafiəçi həmin qol sayəsində ortaya qoydu ki, ayaq həmin ayaqdı. Belə çıxır ki, Emin həmin Emin deyil. 31 yaşlı oyunçu çox yorğundu. Bunu əminliklə iddia etmək mümkündü. Əsas sual isə budu: Emin, futbol oynamaqdan yorulmusan, yoxsa “Neftçi”dən?

KƏNAN BAHADIR