Ölkə kubokunun 1/8 finalının "Kəpəz" - "Sabah" oyununu izləyənlər arasında "bayquşlar"ın sabiq futbolçusu, hazırda isə 2-ci liqada “Kür-Araz”ın şərəfini qoruyan Cavid İmamverdiyev də var idi.

Onunla ölkə çempionatının axarı, "Qarabağ"ın Avropa Liqasındakı çıxışı və başqa məsələlər ətrafında danışdıq.

- Oyunla bağlı fikirlərin maraqlıdı.
- Maraqlı və məhsuldar oyun alındı. "Sabah"ın Akademiyasında məşqçi olduğumdan bu komandanın qələbəsini istəyirdim. Çətinliklə də olsa, qələbə qazandıq.
- Premyer-liqada mövsümün ilk yarısı tamamlanmaq üzrədi.
- Desəm ki, hər turun oyunlarını izləyirəm, yalan olar. Amma baxdığım oyunlar və ümumi mənzərəsi haqda danışsaq, elitanın səviyyəsi yüksəlib. Hər tur gərgin, oyunlar maraqlı və ağır keçir. Sevindirici haldı ki, "Qarabağ"a müqavimət göstərən komandalar var. Qısası, elitada nə qədər güclü rəqiblər olacaqsa, ölkə futbolu bir o qədər inkişaf edəcək, çempionatımız da maraqlı keçəcək.
- Demək istəyirsən ki, "Qarabağ" bu mövsüm asan çempion olmayacaq?
- Çempionluq asanlıqla başa gəlmir. Odu ki, heç vaxt heç bir komandanın rahat çempion olması mümkün deyil. Sadəcə, xal fərqinə görə kimsə irəliləyə, kimsə aşağıda ola bilər. İrəlidə olan və fərqin azalmasına imkan verməyənlər də əziyyət çəkib, meydanda can qoymaqla buna nail olur.
- Məşqçiliklə yanaşı, hazırda 2-ci liqada mübarizə aparan "Kür-Araz"da oynayırsan. İmişli təmsilçisindəki çıxışınla bağlı nə deyərdin?
- Peşəkar karyeramı bitirmişəm. Gələcəkdə əsas işim məşqçilik olacaq. Sadəcə, sağlamlıq, artıq çəkini atmaq və "Kür-Araz"a kömək etmək oynayıram.
- Onsuz da 2-ci liqada "Marxal-Şəki"də oynayırdın, elə orda qalsan, olmazdı?
- Şəki təmsilçisinin prezidenti Elgün Hüseynovla şəxsi tanışlığım, qarşılıqlı hörmətimiz var. "Marxal-Şəki"də az oynadım. Əsas məqsəd o idi ki, Şəkidə futbolu tanıdaq, jurnalistlər bu haqda yazsın. Qısası, təbliğat və reklam üçün orda oldum. Amma "Kür-Araz"da daha çox futbol oynamaq niyyəti güdürəm, 7 qol da vurmuşam.
- Yaxşı formadasan, 2-ci liqanın daha iddialı klubuna və ya 1-ci liqa təmsilçilərinə keçmək haqqında düşünürsənmi?
- Yox (gülür). Gələcəkdə əsas işim məşqçilik olacaq.
- Sabiq komandan "Neftçi"nin hazırkı durumu haqqında nə deyərdin? Adrian Mutu "Neftçi"ni iddialı edə biləcəkmi?
- İnanmıram ki, ulduz futbolçu "Neftçi"ni zirvələrə qaldırsın. Çünki komandanın heyətinə, sərgilədiyi oyuna və potensialına baxanda hər şey görünür. "Ağ-qaralar"ın legionerləri klubun tarixindəki ən zəif futbolçulardı. Onların yerli oyunçulardan heç bir üstün tərəfi yoxdu. Bizim vaxtımızda belə legionerlər nəinki "Neftçi"nin formasını geyə, heç klubun qapısından da içəri girə bilməzdilər. Qısası, flaqmanın hazırkı durumu çox acınacaqlıdı.
- "Qarabağ" axır ki Avropa Liqasının qrupundan çıxdı. Bu barədə nə deyərdin?
- Ölkə çempionatında "Qarabağ" bizə rəqibdi, təbii ki, onun büdrəməsində maraqlıyıq. Amma ölkə xaricində hansısa klubumuz çıxış edirsə, bütün Azərbaycanı təmsil edir. Ona görə də istənilən komandanın qitəmiqyaslı yarışlarda iştirakı, uğuru xalqımıza aiddi. O cümlədən Avropa Liqasında uğur qazanan "Qarabağ" da hamımızındı. Çox sevincliyəm, uğurların davamı gəlsin.
- Canni de Byazi Azərbaycan yığmasına heç bir fayda vermədi və getdi. Səncə, ölkənin əsas komandasına yerli, yoxsa əcnəbi rəhbərlik etməlidi?
- Həmişə düşüncəm o olub ki, yığmada yerli mütəxəssislər çalışsa, daha faydalı olar. Ad çəkməyəcəm, amma 3-4 məşqçimiz var ki, Azərbaycan yığmasına fayda verə bilər. Səmimi deyim ki, indiki heyətdə yaxşı futbolçular var, onlarla irəli getmək olar. Sadəcə, futbolçuların potensialından düzgün yararlana biləcək mütəxəssislər lazımdı.

ABDULLA İSMAYILOĞLU