Misli premyer-liqasının 17-ci turunda “Qarabağ”a məğlub olan “Neftçi” (0:2) hədəfdən xeyli uzaq düşdü. Axı “ağ-qaralar” mövsüm başlamamış çempionluq iddiasındaydı.

Bu yolda maraqlı addımlar da atıldı. Kollektiv qarşımıza rumıniyalı baş məşqçi Adrian Mutu və yeni idman direktoru Yans Andersson ilə çıxdı. Güclənmək məqsədiylə heyətdə də müəyyən dəyişikliklər edildi. İndi qış fasiləsinə cəmi 1 tur qalıb və bakılılar lider “Qarabağ”dan nə az, nə çox - 13 xal geridədi. Bunun nəticəsidi ki, “Forza Neftçi” yenidən dilə gəldi və Azərbaycan derbisi bitəndən dərhal sonra Tofiq Bəhramov adına Respublika stadionunu “istefa” şüarları bürüdü. Bəs problem nədi? Bakılıların etibarlı və çoxsaylı azarkeş qrupu konkret kimdən, nədən narazıdı?

Bu və başqa suallarla “Forza Neftçi”nin rəhbəri Səccad Abbasova müraciət etdik.

– “Neftçi”nin çempionluq xəyalı böyük təhlükə altındadı. Ənənəvi sualla başlayaq: kimdi günahkar?
– Hər kəs! Ən başda rəhbərlik... Düzü, hazırda söz sahibinin kim olduğunu bilmirik. 50 departament, şöbə yaradılıb. Dağınıqlıq görünür. Klub Azərbaycanın xanlıqlar dövrünü xatırladır...

– Səncə, komanda niyə qələbələr qazana bilmir?
– Öncəliklə, skautinq problemindən bəhs edim. Bu işi bu qədər pis görmək üçün bacarıqsızlıq kifayət deyil. Çox böyük “ustalıq” sərgiləyirlər. Qarşıdan qış “transfer pəncərəsi” gəlir. Göndəriləcək futbolçuların adına aydınlıq gəlib. Legionerlərin “vaqon-vaqon” transfer edilməsi haqda xəbərlər görməkdən bezəcəyik. SOCAR mütləq bu prosesə ciddi nəzarət etməlidi. Hər “transfer pəncərəsi”ndə milyonlar havaya uçur. Xalqın neməti olan neftdən gələn gəlirə ciddi nəzarət olunmasını tələb edirik. Prosesə işini bilən, peşəkar və vicdanlı insanlar cəlb olunmalıdı. Yalnız keyfiyyətli və cəsarətli futbolçularla bu işi bacara bilərik. Kamil Məmmədov hansı uğurlarına görə hələ də klubdadı? Yayda gətirilən legionerlərin keyfiyyətinin çox aşağı olduğunu bütün ölkə gördü. Bəs Müşahidə Şurası görmür!? Dayaq yarımmüdafiəçi mövqeyinə 4-5 oyunçu gətirir, amma pleymeyker və normal hücumçu tapa bilmirlər. Əminik ki, indi Kamil Məmmədov rəhbərliyi şirin sözlərlə ovsunlayır ki, qış pəncərəsində işinə davam etsin.

– Adrian Mutu qışdan sonra vəziyyəti dəyişə bilərmi?
– Baş məşqçi növbəti problemdi. Mutu oyunların axarına düzgün müdaxilə edə bilmir. Onun səhvlərindən saatlarla danışmaq olar. 5 aydı ki, oyununu tapan, sabit çıxış edəcək komanda qura bilmir. Hər oyun meydanda fərqli “11-lik” görürük. İki oyundu bir dəqiqə belə forma geyməyən Boqomolskidən mədət umur. Mutu, bu futbolçuyla bağlı planların varsa, niyə onu ehtiyatda saxlayırdın? Yox, lazım deyilsə, niyə hələ də komandadadı? Bu kimi nümunələr çoxdu. Melano, Valdes, Olanare...

– Bəs hər matçda start heyətində yer alan Emin Mahmudov haqda nə düşünürsən? Kapitan cari mövsümdə 16 oyunda meydana çıxsa da, qol vura bilməyib....
– Yayda hamımız bir nəfər kimi Eminin Neftçidə qalmasına dəstək olduq. Hanı Emin? Bu mövsüm nə ilə yadda qalıb? Ola bilər ki, klub daxilində yaşananlar, bərbad ab-hava ona da təsir edir, amma gələcəkdə bunlar xatırlanmayacaq. Tarixdə onun nəticələri qalacaq və çox təəssüf ki, Emin qazandığı hörməti xərcləməyə başlayıb.

– Adətən, komandaların uğursuzluğunda azarkeşləri də günahkar bilirlər. Lakin “Forza Neftçi”ni bütün oyunlarda tribunalarda görürük. Dəstək niyə effekt vermir?
- 10 ildi sürünən klubun tərəfdarı hələ də ölkə tribunasında əsas söz sahibidi. Biz bununla qürur duyuruq. Lakin “Neftçi”nin bu hala düşməsində rol oynayan heç kimi bağışlamayacağıq. “Ağ-qaralar”ın əsl sahibinin kim olduğunu bilmək üçün tarixə və “Qarabağ”la matçda tribunalara boylanmaq kifayət edir. İdarəçilər, məşqçilər, futbolçular... Hamısı bir gün onları yola salacağımızı çox yaxşı bilir. Sadəcə, indiki əməlləriylə necə xatırlanacaqlarına qərar verirlər.

KƏNAN BAHADIR