Yola saldığımız həftə Azərbaycan futbolu üçün iki önəmli hadisə ilə yadda qaldı.

Birinci hadisə o oldu ki, həmyerlimiz Əliyar Ağayevin başçılıq etdiyi hakimlər briqadası Avropanın nəhəng klublarından sayılan “Mançester Siti”nin iştirakıyla Çempionlar Liqası qarşılaşmasında ədaləti qorudu. Digəri isə adət etdiyimiz kimi, Qurban Qurbanovun və onun çalışdırdığı “Qarabağ”ın adıyla bağlı oldu. Hər bir azərbaycanlının Avropadakı qüruruna çevrilmiş “Qarabağ” Avropa Liqasının qrup mərhələsində uğurla çıxış edərək, qrupda ikinci yeri tutmağı bacardı. Bu isə o deməkdi ki, Azərbaycan komandası Leverkuzen “Bayer”i ilə birlikdə qrup səddini uğurla aşıb ali mükafat uğrunda mübarizəni davam etdirəcək.

Əliyar Ağayevin uğuru hər birimizi fərəhləndirdi. Biz Ağayevin istedadına və ədalətli hakim olduğuna çoxdan əminik. Elə onu tanıyanlar həm də ona əmin idilər ki, gec-tez Əliyarın səsi daha yüksək mərtəbələrdən, daha səviyyəli turnirlərdən gələcək. Ağayev 36 yaşını bu yaxınlarda tamamlayıb, hələ gənc yaşlarından hakim kimi adından söz etdirib. Zamanında onunla birlikdə Rəhim Həsənova, Orxan Məmmədova və bu sıradan olan digər gənc hakimlərə AFFA tərəfindən böyük etimad göstərildi. Sözsüz, bu etimadın arxasında o vaxtlar PFL-in prezidenti olan Ramin Musayevin də böyük əməyi vardı. Həmin vaxt “qocalar” Azərbaycan çempionatında “at oynadırdı”. Biri deyirdi mənə “pesok” yollayın, digəri iki klubdan bir yerdə rüşvət alıb, kömək edəcəyinə söz verirdi. Sonra da uduzanın pulunu qaytarıb, deyirdi ki, bağışlayın, alınmadı. Məhz bizim futbolumuzu belə hakimlərdən “təmizləmək” üçün bir qədər də riskli qərar verildi, prinsipial oyunlar Əliyar Ağayev, Rəhim Həsənov kimi gənclərə tapşırıldı. Nəticəsini də çox keçmədən gördük. Qısa müddətdə məhz bu gənclərin simasında Azərbaycan hakimliyinin imici həm daxildə, həm də xaricdə dəyişdi.

Təəssüf ki, qısa müddətdə FİFA-nın 1-ci kateqoriyasına yüksələn Əliyara, eləcə də hakim kimi böyük perespektiv vəd edən, əsl xarizmatik sima olan Rəhimə badalaq vurmağa başladılar. Bu proseslər Xəqani Məmmədovun Hakimlər Komitəsindən uzaqlaşdırılmasından sonra daha da iyrənc forma aldı. Avstriyalı Fritz Ştuxlikin Azərbaycana gəlişi ilə hakimliyimizin başına min oyun açdılar. Ramin Musayevin proseslərdən uzaqlaşdırılması onunla nəticələndi ki, Fritz və onun havadarları hakimliyi eksprement meydanına çevirib, şəxsi mənafelərinə uyğun diqtələr etməyə başladılar. Nəticəsini də gördük. Rəhim Həsənovu hakimlikdən elə iyrəndirdilər ki, yaşının ən yaxşı vaxtında adam fiti buraxdı. İtirən isə hakimliyimiz oldu. Qısa müddətdə Rəhim kimi bir neçə gənc və perspektiv vədən edən gənclərimiz bu sahədən yarıxoş, yarızor uzaqlaşdı. Bu siyahıya laysmanlar Rza Məmmədovu, Mübariz Haşımovu da əlavə etmək olar. Əliyar Ağayev isə dözdü, səbr etdi.

Vəziyyət o həddə gəlib çatmışdı ki, avstriyalı sədr Əliyarın Azərbaycan çempionatındakı oyunlar zamanı buraxdığı səhvlərdən videoçarx hazırlayıb, UEFA-ya göndərirdi. Bununla da onu gözdən salmağa çalışır, ali futbol qurumundan gələcək təyinatların qarşısını alırdı. Bizim başımızı aldatmaq üçün Yunanıstandakı dostları ilə birlikdə iş qurur, Əliyarı tez-tez bu ölkəyə dəvət etməklə belə görüntü yaradırdılar ki, onun üçün Avropaya yol açırlar. Kifayət qədər qalmaqallı və ağır çempionat olan Yunanıstanda Ağayevin səhvlər etməsinə, bununla da gözdən düşməsinə çalışırdılar. Şükürlər olsun ki, bu qara niyyətlərinə çata bilmədilər. Qaranquş gəldi-gedər olduğu kimi, Fritz də getdi. Bizə qalan isə həmyerlimiz Əliyar oldu.

Onun gedişi ilə Ağayevə UEFA-dan gələn dəvətlərin sayı artıb. Oyundan-oyuna püxtələşən Əliyar da bununla özünəinam qazanır. İnanırıq ki, davamlı olacaq. Ağayev nüfuzlu turnirlərin oyunlarında bundan sonra da söz sahibi olacaq, hamımızı qürurlandıracaq.

AMAL