Əliyar Ağayev tarixi oyunda 12 km qaçıb
Bu həftə Azərbaycanın futbol tarixində ilk yaşandı.
FİFA referisi Əliyar Ağayev Çempionlar Liqasının qrup mərhələsinin 6-cı turunun “Kopenhagen” – “Borussiya” (Dortmund) matçında əfaləti qorudu. Ona laysmanlar Zeynal Zeynalovla Akif Əmirəli kömək etdi. 4-cü hakim funksiyasını isə Kamal Umudlu yerinə yetirdi. Əliyar matçda 4 dəfə əlini cibinə atdı - meydan sahiblərindən Denis Vavro və Lukas Leragerə, qonaqlardan isə Antonio Modesto ilə Əmrə Cana sarı vərəqə göstərdi.
İstedadlı hakim oyundan sonra "Radio Enerji"də "Səhərin şərhi" verilişinə açıqlamasında maraqlı fikirlər səsləndirib ki, onun söylədiklərini sizə təqdim edirik:
"Çempionlar Liqası bəlkə də klublar arasında dünyanın ən mötəbər yarışıdı. Necə ki, hər bir futbolçunun arzusu burda oynamaq, bu himnin sədaları altında meydana daxil olmaqdı, eləcə də hər bir beynəlxalq dərəcəli hakimin də arzusu Çempionlar Liqasında oyun idarə etməkdi. Şükürlər olsun, bu bizə qismət oldu. Həyəcan var idi. Bunu ikiqat edən də bütün futbol ictimaiyyətinin bizi canlı izləməsi idi. Məsuliyyətimiz daha da artırdı. Briqada şəklində oyunun öhdəsindən lazımınca gəldik. Ölkəmizin adını layiqincə təmsil etməyi bacardıq. Göstərdik ki, bizdə hakimlik kökləri, ənənələri var. Bu qarşılaşmaya çıxana qədər keçdiyimiz uzun yolda bizə zərrə qədər də köməyi dəyən hər kəsə minnətdarlığımı bildirirəm".
Əliyar Ağayevin qarşılaşmanı necə idarə etdiyini, hər halda, mütəxəssislər daha yaxşı bilər. Odu ki, bununla bağlı AFFA-nın Hakimlər Komitəsinin sədri Barış Şimşəyə müraciət etdik. Onun cavabı belə oldu:
“Həmin oyun beynəlxalq dərəcəli idi. Ona görə mən bu matçla bağlı açıqlama verə bilmərəm. Oyunun inspektoru var idi. Bu baxımdan Əliyar Ağayevin idarə etdiyi görüşlə bağlı açıqlama verməyim düzgün deyil”.
Bu cavabdan sonra Elçin Məmmədovla əlaqə saxladıq. Sabiq təcrübəli hakim Ağayevin idarəçiliyi ilə bağlı bunları dedi:
“Mən 2017-ci ildə mediaya müsahibə vermişdim. Demişdim ki, o Çempionlar Liqasının final mərhələsinə kimi gedib çıxa bilər. Əliyar qarşılaşmanı möhtəşəm idarə etdi. Təbii ki, Çempionlar Liqasının həyəcanı bir az başqadı. Lakin Əliyar oyunun öhdəsindən gəlməyi bacardı. Görüşün hakim-inspektoru da onunla bağlı müsbət fikirlər söylədi. Ümumi idarəçiliyi super idi. Briqada psixolooji baxımdan da hazır idi. Fiiki hazırlığı da yüksək səviyyədədi. Həmin oyunda Əliyar Ağayev 12 kilometrdən çox hərəkətdə olub. Bu, Azərbaycan hakimliyinin uğurudu. Bizim bir çox yüksək səviyyəli hakimlərimiz olub. Çimərlik futbolunda, futzalda hakimliklə bağlı nailiyyətlərimiz var. Lakin böyük futbolda bu bir ilkdi. Ona görə də bütün Azərbaycan hakimlərini təbrik etmək olar. İnşallah, bu uğurun davamı da gələcək. Əliyar Ağayevin 35 yaşı var. UEFA hazırda 32 yaşdan yuxarı olanlara üstünlük verir. Bu baxımdan da Əliyarın uğurun davamını gətirəcəyini söyləmək olar. Bəzi dünya səviyyəli hakimlərin yaşı dolduğuna görə vidalaşır və yerlər boşalır. Belə olan halda isə Əliyarın yolu bir qədər də açılır. Hətta uğurun davamının gələcəyinə ümid etmək yox, əmin olmaq lazımdı. Fürsətdən istifadə edib sizə də təşəkkürümü bildirirəm. Tənqidləriniz olmasa, hakimlərimiz də inkişaf etməz”.
ŞAİR ABDULLA
Digər xəbərlər
