Musa Qurbanlı karyerasını İsveçdə davam etdirir. Bilindiyi kimi, “Yurqorden” onunla üçillik müqavilə imzalayıb.

İsveçdə çempionat başa çatıb və komandalar fasiləyə yollanıb. “Yurqorden” mövsümü 30 xalla 4-cü yerdə bitirib. Dünən hücumçuyla əlaqə saxlayıb legioner həyatı, hədəfləri, “Qarabağ”ın son uğuru haqda söhbətləşdik.

– İstirahət imkanını necə dəyərləndirirsən?
– İsveçdə çox soyuq idi. Hazırda Bakıdayam. “Yurqorden” yanvarın əvvəlində yeni mövsümün hazırlığına start verəcək. Təlim-məşq toplanışı keçiriləcək. Çempionat və kubok matçlarına ciddi hazırlaşmaq istəyirik. İndi boş vaxtdan istifadə edib öz üzərimdə işləyirəm. Məqsədim yeni mövsümdə daha yaxşı çıxış edib uğur qazanmaqdı.
– Qol vura bilmədiyin matçlardan sonra isveçli tərəfdarların, bəzən də idman jurnalistlərinin tənqidinə məruz qalırdın. İctimaiyyətin narazı qalması səni nə dərəcədə narahat edirdi?
– Belə halları həmişə normal qarşılamışam. Tənqid işin bir hissəsidi. Xüsusilə futbolçusansa, buna hazır olmalısan. İşimə məsuliyyətli yanaşdığımı bilirəm. Haqsız tənqidlərə fikir vermirəm.
– İsveç çempionatı üçün yetərli formaya düşmək və tez-tez fərqlənə bilmək üçün nə qədər zamana ehtiyacın var?
– Daha yaxşısını edə bilmək üçün həmişə vaxt lazımdı. Əsas məsələ isə bundan doğru istifadə etməkdi. Əlimdən gələni edirəm ki, bunu bacarım. Demək olar ki, yeni liqaya uyğunlaşmışam və əlbəttə, daha yaxşısını etmək niyyətindəyəm. Çünki bu, həmişə mümkündü.
– İsveçdə əsasən hansı çətinliklərlə üzləşirsən?
– Birbaşa çempionatla bağlı problem çox deyil. Peşəkar futbola “Qarabağ”da başlamışam. “Yurqorden” “Qarabağ”dan fərqli olsa da, həddən artıq çətinlik olduğunu düşünmürəm. Sadəcə, İsveçdə rəqabət daha yüksək səviyyədədi.
– Komandanın növbəti mövsüm üçün hədəfləri bəllidi?
– Məqsəd çempionluqdu. Ən pis halda Konfrans Liqasına vəsiqə qazanmaq istəyirik.
– Gənc futbolçusan. Gələcəkdə özünü harda görürsən? Ümumiyyətlə, legioner həyatına davam etmək niyyətindəsən?
– Məhz bir ildən sonra daha böyük kluba gedəcəyimi deyə bilmərəm. Amma həmişə istəyirəm ki, daha çoxunu bacarım, daha yaxşı yerlərdə olum. Belə düşüncə tərzi məni problemlərdən “sığortalayır”. Çətinliklərə boyun əymək istəmirəm.
– Sabiq komandan “Qarabağ” Avropa Liqasının pley-off mərhələsinə yüksəldi. Həmin an hansı hissləri keçirdin?
– Həddən artıq çox sevindim. “Qarabağ”ın uğurları məni həmişə xoşbəxt edəcək. Xüsusilə belə tarixi uğur adamı iki-üç qat artıq sevindirir.
– Səncə, erkən qol oyunun axarına nə dərəcədə təsir etdi?
– Komandamız daha rahat çıxış etdi. Ümumiyyətlə, “Qarabağ” həm hücumda, həm müdafiədə, həm topla, həm də topsuz möhtəşəm oyun göstərdi.
– Veşoviç qırmızı vərəqə almasaydı, nəticə daha fərqli ola bilərdimi?
– Bu haqda dəqiq danışmaq çətindi. Azlıqda qalıb qalib gəlmək də mümkündü, 11 nəfərlə məğlub olmaq da. Məncə, xeyirlisi nə idisə, elə də oldu. Veşoviçin cəzalı duruma düşməsinə üzülürəm.
– “Qarabağ” 2014-cü ildə Avropa Liqasının qrup mərhələsində “İnter”lə qarşılaşmışdı. O vaxt da pley-offa yüksəlmək şansı çox idi. Hətta Riçard Almeyda qələbə qolunu vursa da, hakim qeydə almamışdı. Həmin anları necə xatırlayırsan?
– Hər şey çox yaxşı yadımdadı. O matçı stadiondan izləmişəm. Hələ də gözümün qabağındadı. Çox sevinmişdik, lakin hər şey bir anda yerlə bir olmuşdu.

KƏNAN BAHADIR