Sonuncu turun ilk oyun günündə pley-offun daha 2 iştirakçısı bəlli oldu.

"Football-plus.az" xəbər verir ki, öz meydanında oynayan “Napoli” və “Kopenhagen” fürsəti əldən vermədi. “Qalatasaray”, “Lans”, “Braqa” və “Benfika” mübarizəni Avropa Liqasında davam etdirəcək. “Mançester Yunayted”, “Sevilya”, “Union” və “Zaltsburq” üçün isə avrokubok mövsümü başa çatdı.

A qrupu
Mançester Yunayted – Bavariya 0:1 (0:0)
Mançester Yunayted (İngiltərə): Onana, Dalot, Varan (Maino, 80), Maquayr (Evans, 40), Şou (Van Bissaka, 46), Maktominey, Amrabat, Antoni (Pellistri, 75), Fernandeş, Qarnaço (Mejbri, 75), R.Höylunn.
Bavariya (Münhen, Almaniya): Noyer, Mazraui (Laymer, 46), Upamekano, Kim Min Çje, Devis, Kimmix, Qoretska, Koman (Tel, 77), Musiala (Müller, 67), Sane, (Gerreyro, 90), Keyn.
Qol: Koman, 70.
Vərəqələr: Antoni, 53. Amrabat, 61. Qoretska, 88 – sarı.
Hakim: Espen Eskos (Norveç).
12 dekabr. Mançester. 73073 tamaşaçı.
oyunun statistikası
5 (1) qapıya (“çərçivə”yə) zərbə 11 (3)
4 künc zərbəsi 2
0 ofsayd 2
10 qayda pozuntusu 9
2(0) sarı (qırmızı) vərəqə 1(0)
44 topa sahibolma (faizlə) 56

“Bavariya” üçün oyun heç bir əhəmiyyət kəsb etməsə də, Tuxel meydana əsas heyəti buraxmışdı. “Yunayted” qalib gələcəyi təqdirdə istənilən halda avrokuboklardakı çıxışını davam etdirəcəkdi. Amma komanda bu vəzifənin öhdəsindən gələ bilməyərək növbəti dəfə fanatlarını üzdü. Meydan sahibləri ilk yarıda istəkli görünsələr də, qonaqlar soyuqqanlı şəkildə hücumların qarşısını kəsməyi bacardılar. Zədə üzündən Maquayr hələ ilk yarıda, Şou isə fasilədə əvəzləndi. İkinci hissədə Münhen nəhəngi hücumlarının kəsərini artırdı. Keynin yaratdığı gözəl fürsəti əvvəlcə Sane əldən verdi. Amma İngiltərə yığmasının kapitanının yaratdığı ikinci gözəl fürsəti Koman boşa vermədi. Bu qol görüşdə yeganə oldu. Tuxel ÇL-də ardıcıl 3-cü dəfə “Old Trafford”da qələbəyə sevindi. Daha öncə onun çalışdırdığı PSJ burda 2 qələbə qazanmışdı. “Yunayted” isə tarixində 2-ci dəfə ÇL-in qrupunu sonuncu pillədə tamamladı. Komanda daha öncə 2005/06-da bu aqibətlə üzləşmişdi. Bundan başqa, “qırmızı şeytanlar” qrupda 15 qol buraxmaqla İngiltərə klubları arasında yeni antirekordun müəllifi oldu.

Kopenhagen – Qalatasaray 1:0 (0:0)
Kopenhagen (Danimarka): Qrabara, Ankersen, Vavro, Diks, Yelert, Falk, Lerager, Qonsalveş (Kornelius, 67), Aşuri (Boilesen, 81), Elyunussi (O.Höylunn, 90+3), Klasson.
Qalatasaray (İstanbul, Türkiyə): Muslera, Boe, Əbdülkərim Bardakcı, Sançes, Anxelinyo (Barış Alpər Yılmaz, 77), Kaan Ayhan (Mertens, 61) Torreyra (Oliveyra, 77), Tete (Ziyeş, 61), Kərəm Aktürkoğlu, Zaha (Bakambu, 65), İkardi.
Qol: Lerager, 58.
Vərəqələr: Yelert, 37. Zaha, 55. Lerager, 85 – sarı. Lerager, 90 – qırmızı (ikinci sarı).
Hakim: Daniele Orsato (İtaliya).
12 dekabr. Kopenhagen. 34726 tamaşaçı.

“Qalatasaray”ın 23 ildən sonra “Parken”də fanatlarına daha bir önəmli qələbə bəxş etmək cəhdi uğursuz alındı. “Kopenhagen” evdə oynamasına baxmayaraq, müdafiə futboluna üstünlük verdi. Amma bunu gözləmək olardı. Komanda müdafiə olunmağı bacardığını ötən tur səfərdə “Bavariya” ilə matçda sübut etmişdi. Əsas sual doğuran məqam “Cim-Bom”un bu müdafiə xəttini yara bilib-bilməyəcəyindən ibarət idi. İstanbul nəhəngi mərkəzdən Qrabaranın qorudğu qapıya yaxın düşə bilmədiyinə görə cinah asmalarına yönəlmək məcburiyyətində qaldı. Amma bu, “Qalatasaray”ın öyrəşdiyi oyun deyildi. Üstəlik “Kopenhagen”in futbolçuları fiziki cəhətdən güclü idi və hava mübarizələrinin böyük əksəriyyətindən qalib ayrıldılar. Belə oyunun fonunda qonaqların 58-ci dəqiqədə gözlənilməz bir qol buraxması komandanın işini ikiqat çətinləşdirdi. Okan Buruk əvvəlcə Mertenslə Ziyeşi, sonra Bakambunu “döyüşə atıb” əlindən gələni etdi. Komanda iki hücumçulu taktikaya keçdikdən sonra qol epizodları da yaranmağa başladı. Amma Kərəm Aktürkoğlu yaxın məsafədən topu qapının üstündən vuraraq real fürsəti boşa verdi. “Qalatasaray” son anlarda rəqib müdafiəsini mühasirəyə alaraq bir neçə təhlükəli vəziyyət yaratdı. Amma topu heç cür qapıya göndərmək mümkün olmadı. Tanrının işinə bax ki, “Qalatasaray” Okan Burukun ötən həftədən bəri günahlandırdığı “Bavariya”nın sayəsində heç olmasa, AL-də oynamaq imkanı qazandı. Buruk “Bavariya”nı “Kopenhagen”ə qarşı ev matçında istəksiz oynamaqda günahlandırmışdı. Halbuki həmin “Kopenhagen”i “Qalatasaray” özü iki matçın heç birində məğlub edə bilmədi! Beləliklə, Danimarka çempionu bu çətin qrupda tam layiqli şəkildə 2-ci yeri pilləni tutdu və tarixində ikinci dəfə pley-offda oynayacaq. “Cim-Bom” isə ardıcıl 5-ci dəfə ÇL-in qrup mərhələsi səddini adlaya bilmədi. Komanda bu turnirdə sonuncu dəfə 10 il öncə - 2013/14-də pley-offda oynayıb.

oyunun statistikası
11 (3) qapıya (“çərçivə”yə) zərbə 21 (4)
3 künc zərbəsi 9
1 ofsayd 1
10 qayda pozuntusu 5
3(1) sarı (qırmızı) vərəqə 1(0)
42 topa sahibolma (faizlə) 58

1. Bavariya 6 5 1 0 12-6 16
2. Kopenhagen 6 2 2 2 8-8 8
3. Qalatasaray 6 1 2 3 10-13 5
4. Mançester Yunayted 6 1 1 4 12-15 4