Mahirdən narazılıq, Şahruddindən razılıq
Xorvatiya “Dinamo”sunun azarkeşləri Mahir Emreliyə görə klub rəhbərliyindən narazıdı.
“İndex.hr” nəşrinin məlumatına görə, onlar yay fasiləsində heyətə cəlb olunan ön xətt oyunçularının ümidləri doğrultmadığını düşünür. Fanatlar xüsusən də Sergey Yakiroviçin planlarına daxil olmayan Emrelinin əvəzinə mövsümün əvvəlində daha güclü hücumçu alına biləcəyini qeyd edir. Nəşr isə həmyerlimizin tərəfindədi. Xorvatiyalı həmkarlarımız forvardın az oyun şansı qazanmasına baxmayaraq, meydanda olduğu müddətdə keyfiyyətli iş ortaya qoyduğunu yazır:
“O, son 9 oyuna ehtiyatdan başlayıb və bunun 3-də meydana çıxmayıb. Az oynamaq imkanı qazansa da, qollarda birbaşa iştirak edir və daha effektli olur”.
Qeyd edək ki, Mahir Emreli bu mövsüm “Dinamo”nun heyətində ümumilikdə 22 oyun keçirib, 5 qol vurub, 5 məhsuldar ötürmə verib.
Türkiyə mətbuatı isə “Adana Dəmirspor”un qapıçısı Şahruddin Məhəmmədəliyevin superliqanın 15-ci turunun "Qalatasaray"la matçdakı (1:3) çıxışını dəyərləndirib. “Ajansspor”da çalışan həmkarlarımız millimizin qolkiperinin performansını bəyənib: "Sosial şəbəkələrdə azərbaycanlı qapıçı Şahruddin Məhəmmədəliyevlə bağlı yazılardan birinə rast gəldik:
“O, vaxtaşırı inanılmaz seyvlər etsə də, səhvləri ilə də məşhurdu”... Demək olar ki, əvvəllər çıxış etdiyi “Qarabağ”ın hər oyununda matçın şərhçisi heç olmasa bir dəfə “Şahruddin, neynəyirsən sən?” deyirdi. Lakin, qapıçının performansı “Qalatasaray”la matçda yaxşı idi. Halbuki, onu bu cür komanda ilə oyunda ilk dəfə iş başında görürdük".
KƏNAN BAHADIR
Digər xəbərlər
