Ruslar Murad Musayevdən yazır, “Sabah” isə təkzib edir
Cari mövsümdə hələ ki potensialından aşağı səviyyədə çıxış edən “Sabah” baş məşqçisi Murad Musayevlə yollarını ayıra bilər.
Bu iddia ilə Rusiyanın “Metaratings” nəşri çıxış edib. Həmkarlarımızın iddiasına görə, “Şinnik”in rəsmilərindən biri Masazır təmsilçisinin çalışdırıcısıyla görüşmək üçün bu yaxınlarda ölkəmizə təşrif buyurub.
Sözügedən nəşrə inansaq, komandanın idman əlaqələndiricisi Aleksandr Pobeqalov 40 yaşlı mütəxəssislə danışıq aparır. Çünki "Şinnik" rəhbərliyi postundan uzaqlaşdırılan Dmitri Xomuxanın yerinə məhz Murad Musayevi gətirmək niyyətindədi. Hətta Yaroslavl təmsilçisinin baş direktoru Qalimcan Xayrulin idman əlaqələndiricisinin ölkəmizdə olduğunu və “bayquşlar”ın baş məşqçisiylə görüşəcəyini təsdiqləyib:
“Bir çox namizədlə əlaqə saxlayırıq. Dekabrın 25-nə kimi qərar verəcəyik”.
Rusiyalı həmkarlarımızın yaydığı xəbərə aydınlıq gətirmək üçün “Sabah”ın mətbuat xidmətinin rəhbəri Elnur Həmidovla əlaqə saxladıq. O, "Football-plus.az"a açıqlamasında informasiyanı təkzib etdi:
“Murad Musayevin klubumuzla müqaviləsi var və hələ başa çatmayıb. Bildiyiniz kimi, Rusiya məbuatında oxşar xəbərlərə daha əvvəl də rast gəlmişik. Vaxtaşırı bu tipli məlumatlar tirajlanır. Baş məqşçimiz hazırda komandamızın “sükanı arxasındadı” və başqa versiyalar, ümumiyyətlə, gündəmdə deyil. Belə mövzular hazırda müzakirə olunmur”.
GÜNAY SÜLEYMANOVA
Digər xəbərlər
