“Samir müəllimi tanıyanlar bilir ki, qorxaq məşqçi deyil”
Məlum olduğu kimi, oktyabrın 12-də Bakıda Azərbaycan və Şimali İrlandiyanın U-21 yığmaları arasında keçirilən oyun ətrafında qəribə durum yaranıb.
Daha dəqiqi, ölkəmizin U-21 yığması 2-ci hissə başlayarkən meydana gec çıxdığına görə UEFA AFFA-ya 5 min avro cərimə kəsib. U-21-in baş məşqçisi Samir Əliyev “sport 24”ə açıqlamasında vəziyyəti belə izah edib:
“Rəqib çıxmadığına görə dedik ki, tələsməyin, əvvəl çıxmayaq. Onlar da gəlsin, bir yerdə çıxaq, gedib onları meydançada gözləməyək. Elə bir şey olmayıb ki, rəqib çıxsın, bizi gözləsin, biz gecikək. Əvvəldən də bizə heç bir şey deyilməyib. Gec çıxmaqla bağlı xəbərdarlıq da olunmayıb ki, cərimə təhlükəsi var. Xəbərdarlıq olsaydı, buna əməl edərdik. Meydana bir yerdə çıxmışıq, videdoda da bu var. Məncə, orda 40 saniyənin, uzağı 1 dəqiqənin söhbəti olub. Deyəsən, matçın inspektori özündə qeyd edib və buna əsasən UEFA-da məsələyə baxılıb. Bizə də qərar 1 ay sonra, axırıncı təlim-məşq toplanışında olduğumuz Latviya və Ukrayna ilə oyunlar zamanı gəlib".
Həmin oyunda U-21-in kapitan sarğısını daşıyan Fərid Yusifli ilə söhbətdə bu məqama da aydınlıq gətirdik.
- Martda növbəti seçmə oyunlar keçiriləcək. U-21-in İngiltərə və Ukrayna ilə ev oyunlarında xal qazanmaq şansını necə görürsən?
- Marta qədər daha yaxşı hazırlaşmaq üçün vaxtımız var. Hər oyunçu - mən qarışıq - performansımızı artırmağa çalışmalıyıq. Düzdü, bildiyiniz kimi, U-21-in oyunçularının çoxu əvəzedici heyətdə və 1-ci liqada oynayır. Az sayda oyunçumuz var ki, əsas komandada oyunlara çıxır. Məncə, İngiltərə komandasının heyətindən danışmağa ehtiyac yoxdu. Bütün dünyanın tanıdığı futbolçulardı. Ukrayna da onlardan geri qalmır. Hətta İngiltərəni 3:2 hesabıyla məğlub da ediblər. Qələbə qazanmağa çalışacağıq. İstənilən rəqibə qarşı oynaya bilərik. Amma ayrı-ayrılıqda oyunçuların oynadığı klublara, çempionatlara, meydanda keçirdiyi dəqiqələrə baxanda şansımız azdı. Samir müəllimi tanıyanlar bilir ki, qorxaq məşqçi deyil. Onun komandası da qorxaq futbol oynamır. Yəni qələbə üçün nə lazımdısa, əlimizdən gələni edəcəyik. Amma nəticə nə olacaq – bunu Allah bilər.
- Hazırda “Polesye”də çıxış edən Emil Mustafayev Ukrayna mətbuatına verdiyi müsahibədə U-21 yığmamızdan səni yaxşı xatırladığını deyib. Yeri gəlmişkən, Ukrayna ilə oyunda xal qazanmaq şansınız yox idi?
- Emillə biz 2021-də U-21 birlikdə oynamışdıq. Tərif üçün ona təşəkkür edirəm. Yəqin ki, oyunu da izləmisiz. İlk hissədə Ukraynanın şansı çox oldu, amma 2-ci hissədə üstünlük bizdə idi. Xeyli real qol şanslarımız oldu, sadəcə, yararlana bilmədik. Mən deyərdim ki, nəinki xal ala, hətta qələbə də qazana bilərdik.
- Bəs Şimali İrlandiya ilə oyunla bağlı nə deyə bilərsən? 2-ci hissəyə gec çıxdığınıza görə UEFA təşkilatçı kimi AFFA-nı 5 min avro cərimələyib. Samir Əliyev rəqibi gözləməyin güdazına getdiyinizi deyib. Sən orda olan şəxslərdən biri kimi gecikməni nə ilə izah edirsən?
- Bunlar futbolda olan şeydi. Samir müəllim düzünü deyib, rəqib komandanı gözləyirdik, anlaşılmazlıq olduğuna görə cərimələnmişik.
MİRKAMAL KAZIMZADƏ
