“Ümumiyyətlə, təkcə qış yox,yay transfer dönəmində də Bəhlulun xaricə getməsi haqda söz-söhbət yayılır. Xüsusən də “Qarabağ”dakı son oyunlarında yaxşı performans sərgilədiyindən istər-istəməz diqqəti çəkir. Demək olar ki, “Qarabağ”ın bütün oyunçularına diqqət var. Bu sevindirici haldı. “Qarabağ”ın transfer bazarında haqqında danışılmayan oyunçusunun olmadığını deyə bilərik. O cümlədən də Bəhlulla maraqlananlar çoxdu. Əsasən də əcnəbi, əməkdaşlıq etdiyimiz agentlər maraqlanırlar. Bəzən isə heç tanımadığımız agentlər zəng edib maraqlanırlar. Aydın məsələdi ki, indi təklif gələ bilməz. Çünki Bəhlulun 2024-cü ilin iyununa qədər müqaviləsi var. Ona görə də indi hansısa təklifdən danışmaq yersiz olar”.

“Bəhlulla bu mövzunu tez-tez danışırıq. O, “Qarabağ”la müqavilə bağlamamış belə, ölkə xaricində oynamağı planlaşdırırdı. Futbol atmosferi yüksək olan bir çempionatda oynamaq onun arzusudu. Ona görə də xaricdə futbol oynamaqla bağlı həmişə müsbət fikirdədi. Hətta maaşda müəyyən qədər güzəştə getməyə də razıdı ki, hansısa yüksək səviyyəli çempionatda oynasın. Amma hazırda o barədə düşünmürük. Çünki müqavilə müddəti hələ bitməyib. “Qarabağ”la qarşıda oyunları, pley-offda oynamaq şansı var. Hər bir oyunçu Avropa Liqasının pley-offunda oynamaq istəyər. Bu hər azərbaycanlı futbolçuya da qismət olmur”.

“Türkiyə Futbol Federasiyasının mavi lisenziya ilə bağlı qərarına azərbaycanlı futbolçuların da salınması, mavi kart alan oyunçunun legioner sayılmayacağı ilə bağlı qərarın qəbul edilməsi Türkiyədə azərbaycanlı futbolçulara marağı artırıb. Bu qərar həm superliqaya, həm də 1-ci liqaya aiddi. Bu gün bir neçə futbolçumuz Türkiyə çempionatında çıxış edir, müxtəlif səviyyəli klublarda oynayır. Müdafiəçi də elə bir mövqedi ki, əsasən yerli futbolçulardan seçilir. Bu hər yerdə belədi. Hücum xəttində çox az hallarda yerli futbolçu oynadırlar. Bəhlul da mərkəz müdafiəçisi olduğuna görə daha çox maraq var. Ordan da bəzi klubların təmsilçiləri zəng edib maraqlanırlar. Ancaq dediyim kimi, onun “Qarabağ”la müqavilə müddəti davam edir. Buna görə də bu tip mövzuları təxirə salmağa məcburuq. Hazırda hansısa konkret təklif yoxdu. Doğudu, maraqlanan var, amma biləndə ki, yaya qədər müqaviləsi var, heç bir real təklif gəlmir”.

“Bəhlulu transfer etmək istəyən klub ilk növbədə “Qarabağ”a müraciət etməlidi. Ona görə hər şey klubdan və ona edilən təklifdən asılıdı. Aydındı ki, “Qarabağ” pley-offa yüksələcək. Klubun Bəhlulla bağlı hansı planlarının olması bizim düşüncəmizdən daha vacibdi. Ona görə də Bəhlulla bağlı kiminsə təklifi olacaqsa, ilk növbədə “Qarabağ”la danışmalıdı”.