PSJ-nin “Havr”la oyununu (2:0) izləyənlər, yəqin ki, Paris klubunun futbolçularının tarixdə ilk dəfə meydana adları Koreya dilində yazılan forma ilə çıxdığını gördü.

Bu artıq Li Kan İn effektidi! 22 yaşlı koreyalı yarımmüdafiəçi bu yay Parisə köçüb. “Malyorka” bu transferdən 22 milyon avro, PSJ isə əvəzində Koreya bazarı qazandı.

Koreyalı hələ ki məhsuldar oyunla seçilməsə (2+1) də, kluba iqtisadi baxımdan böyük fayda verir: onun futbolkaları satış həcminə görə yalnız Mbappenin formasından geri qalır, onlayn sifarişlərə görə isə onu da üstələyir. Əlbəttə, sifarişlərin əksəriyyəti Koreyadan gəlir. Klub da bu maraq üzərində oynayaraq “Havr”la oyun üçün xüsusi futbolka hazırlatdırdı. “L’Equipe” bu mövzuda hazırladığı “Li Kan İn – tam zəfər” yazısında ajiotajın səbəbini aydınlaşdırır. Koreyalı jurnalist Li Si Cin adı çəkilən nəşrə belə deyib: “Li Kan İnin PSJ-yə keçidindən sonra hər kəs əmindi ki, o, Koreya futbolunun növbəti ulduzu olacaq. Koreyalılar həmvətənlərinin uğurlarıyla qürur duyur, oyunçularımızdan birinin PSJ kimi kluba keçidi isə nadir hadisədi. İndi Li Kan İnin futbolkasını hətta özünü fanat saymayanlar da daşımağa çalışırlar”.

Linin siması vətənində reklamlardan düşmür, eləcə də Paris klubunun atributlarını satan dükanlarda daim teleekranda görünür. PSJ-nin idman məsləhətçisi Luiş Kampuş bu sövdələşmənin iqtisadi təkanıyla bağlı belə demişdi: “Li Kan İni PSJ-yə gətirmək üçün çox çalışdım. Ona görə maliyyə durumumuzun imkan verdiyindən artıq pul təklif edə bilməzdik. İdman planında onu bəyənirəm. Li Luis Enrikenin oyun üslubuna uyğundu. Ancaq mən bu transferin Asiyadakı marketinq fəaliyyətimizə təsiri ilə bağlı düşünmürdüm”.

Təbii ki, Kampuş yalan danışır. Tranfer gerçəkləşəndən dərhal sonra PSJ “Çonbuk”la yoldaşlıq oyununu anons etdi, Koreyanın “Coupang Play” striminqi isə Liqa 1-in 2023/24 mövsümünün oyunlarını göstərməyə başladı.

Seulda yaşayan fransalı aktyor və aparıcı Fabyan Yun da “L’Equipe” əməkdaşı ilə söhbətdə transferin effektini qeyd edib: Li onsuz da populyar idi, bu yay “partlatdı”. Koreyalılar Li Kan İnlə bağlı bütün xəbərləri diqqətlə izləyir, yutuberlər Fransa mediasında hansısa yazı görünəndən bir saat sonra onları tərcümə və şərh edirlər. Sosial şəbəkələrdə, sadəcə, dəlilik hökm sürür”.

Ölkədə hətta PSJ-nin oyunlarına baxmaq üçün böyük fan-zonalar qururlar. Komandanın ev oyunlarını keçirdiyi stadiona koreyalı azarkeşlər futbolçunun forması və ölkə bayrağı ilə gedirlər. Bir sözlə, PSJ bu transferin pulunu təkcə elə forma satışından çıxarıb.