“Sonra öyrəndik ki, Bəhruz Teymurovla Roini İsmayılova qırmızı vərəqə yazılıb”
Noyabrın son günündə ölkə kubokunda 2-ci təsnifat mərhələsi başa çatdı.
Həmin gün keçirilən iki oyunun birində "Zaqatala" "Şamaxı"nı qəbul etdi. Oyun qonaqların 1:0 hesablı qələbəsiylə başa çatdı. Maraqlıdı ki, həmin oyunun hakimi Fərid Hacıyev final fitini səsləndirəndən sonra “Zaqatala"nın iki, "Şamaxı"nım bir futbolçusuna qırmızı vərəqə göstərib. Belə görünür ki, futbolçular arasında ciddi münaqişə yaşanıb. Həm bu matç, həm də qovulanlar ilə bağlı fikrini öyrənmək üçün “Zaqatala”nın baş məşqçisi Rüstəm Məmmədova müraciət etdik:
"Oyuna yaxşı hazırlaşmışdıq. Kubok turnirində davam etmək istəyirdik. Matç gərgin keçdi, iki fərqli hissər izlədik. İlk yarıda rəqib “1 nömrə” kimi oynadı. Fasilədən sonra isə biz dominantlıq etdik. Standart vəziyyətdən qol buraxdıq. Qırmızı vərəqələ gəlincə, oyun zamanı heç bir futbolçu meydandan qovulmayıb, nə də futboçularımız qarşıdurmaya gedib. Oyun bitəndən sonra iki futbolçumuz rəqib komandanın oyunçusuyla mübahisə edib. Amma orda dava, söyüş və başqa bu kimi qarşıdurma olmayıb. Belə hal olsa, dərhal reaksiya verərdik. Sonra öyrəndik ki, oyunçularımdan Bəhruz Teymurovla Roini İsmayılova qırmızı vərəqə yazılıb. Bu məsələni araşdıracağıq. Problem bizim futbolçulardadısa, ölçü götürüləcək".
ABDULLA İSMAYILOĞLU
Digər xəbərlər
