Gözlənilən baş verdi: “Qarabağ”, nəhayət, premyer-liqanın vahid liderinə çevrildi. “Köhlən atlar” çətin Norveç səfəri ərəfəsində həm vacib 3 xal qazandı, həm də əla motivasiya.

Etiraf etmək lazımdı ki, hazırkı çempionat “köhlən atlar” üçün o qədər də asan keçmir. Qurban Qurbanov Rəşad Sadıqovlu “Zirə”nin timsalında ciddi rəqiblə qarşılaşıb. “Sabah”la “Neftçi”nin qeyri-sabit çıxışı fonunda “Zirə” hamını təəccübləndirməyi bacarır. Rəşad Sadıqov özü də müsahibərinin birində etiraf etmişdi ki, “Zirə”nin yayda avrokuboklardan kənarda qalması ümumi işin xeyrinə oldu. Qəsəbə təmsilçisi yayda həm heyəti komplektləşdirmək, həm də normal hazırlıq keçmək üçün yaxşı şans qazandı. Bunun üzərinə Sadıqovun da ildən-ilə təcrübə qazanması əlavə olununca ortaya indiki mənzərə çıxdı.
Sözsüz, bu məqamda “Sabah”la “Neftçi”ni bir daha xatırlamalı olacağıq. Görünən odu ki, ötən mövsümün mükafatçılar yeni “futbol ili”ndə heç cür özünə gələ bilmir. “Neftçi”nin problemləri son illər üçün ənənəvidi. “Ağ-qaralar” transfer bazarında naşı davranır, hər “pəncərə” açılanda komandanın düşərgəsinə çoxlu yeni legioner gəlir, bir o qədəri də yola salınır. Amma “Neftçi”nin çulunu sudan çıxaranlar yenə “köhnələr”, xüsusən də yerli futbolçular olur. Bu mövsümdəki transfer siyasəti isə lap bərbaddı. Bunu da daha çox klub rəhbərliyinin bütün ipləri menecer Kamil Məmmədova verməsiylə əlaqələndirirlər. Hərgah Zaur Əzizov da prosesdən tam kənarlaşdırılmayıb, heyətdə onun da gətirdiklərindən var. Di gəl ki, bu məqamın özü də ümumi mənzərəni dəyişmir. Həmin mənzərə də ondan ibarətdi ki, “Neftçi”yə xeyli yararsız legioner gətirilib. Lap elə bu işdə əsas günahkar Kamil Məmmədov olsa da, klub rəhbərliyi yaxasını məsuliyyətdən kənara çəkə bilməz. Çünki “ailənin başçısı”, yəni Məmmədova bu qədər səlahiyyət və futbolçu biznesi imkanı yaradanlar onlardı. Yararsız transfer siyasətinin üzərinə uğursuz məşqçi seçimini də gələndə bu gün xal itkilərinin və “Neftçi”nin tutduğu 6-cı yerin də qanunauyğunluq olduğunu görürük.

“Sabah” baş məşqçisini dəyişməyib. Heyətdən iki aparıcı futbolçunun getməsi sanki bütün mexanizmi dağıtdı. Lakin masazırlıların dərdi təkcə bu deyil. Klub rəhbərliyi ilə baş məşqçi arasında münasibətlərdəki soyuqluq, yerli futbolçulara qarşı amansız repressiv davranışlar, haqq tərəzisinin zaman-zaman pozulması kimi vacib məqamlar “Sabah”ın irəli-geri ləngər vurmasını şərtləndirir. Murad Musayev nə qədər çalışsa da, “Sabah”ı ötənilki vəziyyətinə qaytara bilmir. Ümumilikdə komanda pis oynamır, qollar vurmağı bacarır. İki əsas problem hər şeyin üzərindən xətt çəkir. Birincisi odu ki, komandada sabitlik çatmır. Səfərdə “Neftçi”ni məğlub edən komanda evdə “Kəpəz”, “Araz-Naxçıvan” kimi komandalara asanlıqla xal verir, “Turan Tovuz”dan üç cavabsız top buraxır. “Qarabağ”la rəqabətdən isə heç danışmağa dəyməz. Ötən mövsüm “Qarabağ” üçün əməlli-başlı başağrısına çevrilən “tələbələr” elə bu tur doğma meydanda “Qarabağ”a uduzdu. “Qarabağ”ın adı futbolçuları o qədər həyəcanlandırır ki, penalti zərbəsini belə qola çevirmək mümkün olmur. İkinci məqam qapıçı Yusif İmanovun və müdafiəçi yoldaşlarının əvvəlki kimi etibarlı oynaya bilməməsidi. Yusif, ümumiyyətlə, eniş yaşayır. Nəticədə ötən mövsümün ən az qol buraxan komandalarından olan “Sabah” bu mövsüm az qala hər oyunda qapısında qol və qollar görür.

Yazının əvvəlində qeyd etdiyim kimi, “Sabah”la “Neftçi”nin başı öz dərdinə qarışsa belə, “Qarabağ” rahat nəfəs ala bilmir. “İki cəbhə”də mübarizə aparan Ağdam təmsilçisinin işini çətinləşdirən təkcə “Zirə” deyil. Mübarizə meydanına Şahin Diniyevin həyata qaytardığı “Səbail”, Azər Bağırovun döyüşkən və yenilməyi sevməyən komandaya çevirdiyi “Araz Naxçıvan” kimi rəqiblər çıxıb. Mən hələ qəzəbli və bacarıqlı Samir Abasovu və onun çalışdırdığı “Sumqayıt”ı demirəm. Bütün bunları nəzərə alanda əminliklə demək olar ki, bu mövsüm bizim çempionatda xeyli gərgin mübarizə gedir və bunun sona qədər belə davam edəcəyini gözləmək məntiqlidi. “Qarabağ” üçün əhəmiyyətli məqamlardan biri komandanın avrokuboklardakı çıxışının nə qədər davam edəcəyidi. Qrupdakı hazırkı vəziyyət ondan xəbər verir ki, Qurban Qurbanovun komandası qışdan sonra da yoluna davam edəcək, ən azı Konfrans Liqasında. Deməli, hələ bir müddət “iki cəbhə”də, ölkə kubokunu da nəzərə alsaq, “üç cəbhə”də mübarizə aparmaq lazım gələcək.

Bütün bunlara baxmayaraq, “Qarabağ”ın zirvənin ən layiqli sahibi olduğunu qeyd etməliyik. Ona görə də arxayınlıqla demək olar ki, 14-cü turda zirvəni ələ keçirən “köhlən atları” ordan endirmək heç də asan olmayacaq.

AMAL