Milan Obradoviç Samir Əliyevdən əvvəl 21 yaşadək futbolçulardan ibarət Azərbaycan yığmasını çalışdırırdı. Komanda yaxşı nəticələr əldə etmədiyi üçün AFFA rəhbərliyi serblə yolları ayırmışdı.

"Football-plus.az" xəbər verir ki, o, son müsahibəsində maraqlı fikirlər səsləndirərək ölkəmizi tərk etmişdi. Obradoviçin iddialarından belə anlaşılırdı ki, ölkəmizdə qalmağa meyillidi. Sadəcə, federasiya rəhbərliyi onun işini bəyənmədi. Görəsən, indi durum necədi? Obradoviç Azərbaycana qayıtmaq istəyirmi?

- 21 yaşadək futbolçulardan ibarət yığma komandamızın oyunlarını izləyirsizmi?
- Əlbəttə! Çalışıram oyunları izləyim.

- Samir Əliyevin komandası haqda nə deyə bilərsiz?
- AÇ-2025-in seçmə mərhələsində Serbiya ilə oyun zamanı komandanın düşərgəsində oldum. 3 gün onlarla birgə idim. Mənim vaxtımda 21 yaşadək futbolçulardan ibarət milliyə dəvət olunan oyunçuların çoxu Samir Əliyevin komandasında yer alıb. Onlarla səmimi söhbət etdik. Mənim dövrümdə çox gənc idilər. Tez-tez məşqlərə dəvət edirdim ki, komandaya alışsınlar. Samir Əliyevin kollektivinə gəlincə, milliyə çağrılan futbolçuların çoxu öz komandalarında oynamırlar. Bu həmişəki problemdi. İkinci məsələ: Samirə lazım olan bəzi futbolçular əsas yığmaya çağrılır. Lakin onlar milli komandada meydana çıxmır. Bu, U21-də ən böyük problemdi. Mənim dövrümdə də belə hallar baş verirdi. Serbiyada olanda Samirlə söhbətləşdim. Mənə bildirdi ki, yenə premyer-liqada 21 yaşadək futbolçu limiti yoxdu. Bu da böyük problemdi. Yadınıza gəlirsə, mən yığmanın baş məşqçisi olanda demişdim ki, 21 yaşadək futbolçu limiti tətbiq edilməlidi. Hətta iki oyunçu qeyd edilməlidi. Amma indi onlar öz komandalarında oynamırlar. Buna baxmayaraq, Samir yaxşı kollektiv formalaşdırıb. Serbiya ilə oyunda komanda ilk hissədə elə-belə təsir bağışladı. İkinci hissədə isə olduqca istəkliydilər. Hətta bəzi epizodlarda fərqlənə bilərdilər. Lakin bəzi futbolçuların oyunçu keyfiyyətləri buna mane oldu. Bu da onların az oynamalarına görədi.

- Demək istəyirsiz ki, 21 yaşadək futbolçu limitini yenidən tətbiq etsək, hər şey düzələcək?
- Tam da bunu demirəm. Amma nəsə etməlisiz ki, gənc futbolçular meydana çox çıxsınlar. Hətta 3-4 gündən bir oyun keçirsinlər.

- De Byazi Azərbaycan milli komandasından ayrıldı. Onunla yeni müqavilə imzalanmadı. Bundan xəbəriniz var?
- Xeyr. Sizdən eşidirəm. Normal haldı. Futbol həyatı belədi. Komandaya uyğun olduğun düşünülür və sənə həvalə edilir. İstəklər və tələblər yerinə yetirilməyəndə yollar ayrılır.

- AFFA rəhbərliyi hazırda yeni məşqçi axtarışındadı. Sizə təklif etsələr, qəbul edərsiz?
- Bəlkə də mən sizin problemin tək çarəsiyəm.

- Özünüzə, yoxsa futbolçuların potensialını güvənirsiz?
- Bunu dəfələrlə söyləmişəm. Azərbaycanlı futbolçuların mental problemlərini bilirəm. Təbii ki, çoxunun potensialına bələdəm. Onların bacarıqlı olduğuna inanıram. Əsas vacib məqam sizin futbolçulara normal davranmaq və onlara nə istədiyini çatdıra bilməkdi. Paltardəyişmə otağında məsələlərin həllini tapmaq məni xoşbəxt edirdi. Biz bunu birgə bacarırdıq. Mənim bunu necə etdiyimi hazırda yığmalarda çıxış edən 20-ə yaxın gənc futbolçudan soruşa bilərsiz. Ona görə də deyirəm ki, bəlkə də sizin futbolun problemlərinin həllinin tək yolu mənəm.

- U-21-də çalışanda bildirməsəz də, Canni de Byazi ilə aranızda problemin olduğu hiss olunurdu. Bu iddia doğrudu?
- Onunla mənim aramda tək problem var idi. De Byazi mənə lazım olan futbolçuları əsas millinin düşərgəsinə dəvət edir, lakin oynatmırdı. Bu futbolçular mənim ən yaxşılarım olurdu. Əsas yığmaya gedirdilər və oynamırdılar. Bu, təbii ki, Azərbaycan futboluna heç də fayda verməyəcəkdi. Belə məsələlər bir nəfər asılı olmalı deyildi. Məsləhətləşmək lazım idi. O da bunu etmirdi.

İLKİN SULTANLI