“Ağır oyun oldu. Bəlkə də ona görə ki, Azərbaycan yığması çox yaxşı müdafiə olundu. Bəzi imkanları qola çevirməliydik, tirdən dönən topumuz oldu. Qələbəni haqq etdik, ancaq rəqib də yaxşı komandadı, yaxşı oynadı. Düşünürəm ki, bu nəticə qanunauyğundu. Baş məşqçinin qarşımıza qoyduğu hədəfə çatdıq. Hesab edirəm ki, qış fasiləsinə qədər olan bu beş oyunu qüsursuz keçirdik. Bu üzdən hər şey superdi”.

“Qazonla bağlı problem var idi, çoxlu qol vəziyyətini qaçırdıq. Müdafiədə oyunu yaxşılaşdırmalıyıq, ona görə ki, hər rəqib bizə problemlər yaradır. Penaltini qola çevirəcəyimi bilirdim, hərçənd azərbaycanlılar məni çaşdırmağa çalışırdı. Ancaq fikir vermədim və sakitcə vurdum. Son dəqiqələrə qədər qapımız qarşısında təhlükəli vəziyyətlər oldu. Çalışmaq və hər oyunda qələbə qazanmaq lazımdı ki, Avropa çempionatına birbaşa yollanaq”.