Bu komanda Xankəndini təmsil edəcək?
Dünən dövlət kanalı olan AZTV-də Xankəndi Şəhər Stadionu ilə bağlı süjet yayınlandı. Arenada təmir işləri görüldüyü, yaxın zamanlarda istifadəyə yararlı olacağı bildirildi. Sujetin sonunda həmkarımız Vüsal Mətləbin bir fikri diqqətimizi çəkdi:
"Xankəndi stadionu gələn mövsüm Azərbaycan premyer-liqasının oyunlarını keçirməyə hazır olacaq".
Dövlət kanalında bir fikrin səslənməsi müsbət haldı. Təbii ki, burda işlədilən bütün ifadələr “süzgəçdən keçəndən” sonra ictimaiyyətə təqdim edilir. Efirə verilən sujetdən belə başa düşdük ki, gələn mövsüm Xankəndidə premyer-liqa təmsilçisi olacaq. Təbii ki, hazırkı klublardan hansınınsa bu şəhərə köçməsi o qədər də real deyil. Mediada gəzən söz-söhbətə görə, 1-ci liqa təmsilçisi MOİK premyer-liqada mübarizə aparacağı təqdirdə ev oyunlarını burda keçirəcək. Artıq "hərbçilər"ə ayrılacaq maliyyə də bəllidi. SOCAR-ın premyer-liqa təmsilçilərinə verdiyi 3 milyondan əlavə Müdafiə Nazirliyi də komandaya daha 2-3 milyon vəsait xərcləyəcək.
"Football-plus.az" məsələ ilə bağlı daha ətraflı məlumat almaq üçün MOİK baş məşqçisi Qəzənfər Abbasovla əlaqə saxladı:
"Xankəndi ilə birgə adımızın hallanması xoşdu. Amma bu barədə hansısa məlumatımız yoxdu. 1-ci liqada gərgin mübarizə davam edir. Biz çempion olmaq istəyirik. Lakin gələcəkdə nəyin necə olacağını bilmirik. Amma belə qərar verilsə, mən komandanın baş məçqçisi olsam, Xankəndində oynayacağımız üçün qürur hissi keçirərəm".
İLKİN SULTANLI
