“Uşaqlar meydanda ürəklərini qoysalar, nəticə qazanacağıq” – U-21 ilə bağlı dedilər
Bu gün U-21 yığmamız İspaniyada ukraynalı həmyaşıdlarıyla növbəti qrup oyununa çıxır.
Gənclərimiz son iki oyunda qələbə qazanıb. Bəs səfərdə nəyə ümid edə bilərik? Bu sualı aydınlaşdırmaq üçün mütəxəssis fikrinə ehtiyac duyduq. Ceyhun Sultanov "Football-plus.az" saytına bunları dedi:
"U-21-i çətin sınaq gözləyir. Nəzərə alsaq ki, gənclər yığmamızda yer alan oyunçuların çoxu öz klublarında müntəzəm oynamırlar. Bu da, təbii ki, işimizi çətinləşdirir. Söz yox, Samir müəllim bacardıqca yaxşı komanda formalaşdırmağa çalışır. Bu futbolçular gələcəkdəki A yığmamıza əsas namizədlərdi. Düşünürəm ki, hazırda uğurlu çıxışıyla diqqəti çəkən Qazaxıstan millisindən nümunə götürüb əzmlə mübarizə aparmaq lazımdı. Döyüşkənlik olacaqsa, nəticə də olacaq".
Gənc məşqçi Əfran İsmayılovun da axşamkı oyuna reaksiyasını öyrəndik:
"Samir Əliyev yaxşı komanda formalaşdırıb. Hazırda U-21 millimiz yaxşı formadadı. Düzdü, Ukraynanın gənclər yığması Avropanın ən yaxşı komandalarındadı, heyətində çox sürətli oyunçular var. Bizi çətin səfər gözləyir. Amma düşünürəm ki, uşaqlar meydanda ürəklərini qoysalar, nəticə qazanacağıq".
ABDULLA İSMAYILOĞLU
Digər xəbərlər
