Ey Təmkin, sən kiminsən?!
Yeni “futbol ili”ndə ölkə kuboku fərqli formatda keçiriləcək.
Belə ki, turnirdə elita və 1-ci liqa təmsilçiləriylə yanaşı, 2-ci liqa klubları da çıxış edəcək. Maraqlı məqamlardan biri də budu ki, "Qusar"ın iştirak ərizəsində yer alan Təmkin Xəlilzadə əvvəlki cəzasına görə turnirin ilk mərhələlərində oynamayacaq. Təxminən bir ay öncə isə yığmamızın sabiq futbolçusu qəzetimizə açıqlamasında "Qusar"la müqaviləsi olsa da, klubda oynamayacağını qəti şəkildə bildirmişdi. Onun adının cəzalılar sırasında yer alması yenidən bu mövzuya qayıtmağımıza səbəb oldu. Böyük futboldan uzaq düşən Təmkin minifutbol yığmamızın şərəfini qorumaqla yanaşı, minifutbol çempionatında oynayacaq "Beerbaşa"nın şərəfini qoruyur. Futbolçunun adı rəsmən 2-ci liqa təmsilçisində keçir, özü isə minifutbol klubunda oynayır. Əvvəlcə "Beerbaşa"nın baş məşqçisi Rizvan Fərzəliyevdən açıqlama aldıq:
"Təmkin hazırda bizim klubda çıxış edir. Həvəskar liqa olduğundan onunla müqaviləmiz yoxdu. Amma millinin sabiq üzvünə maaş verilir, zədələnən müalicəyə göndərilir, əməliyyat etdirilir".
"Qusar"ın Müşahidə Şurasının üzvü Kamran Əlibabayev isə bunları dedi:
"Bir neçə ay əvvəl Təmkin Xəlilzadənin mövsümün sonuna kimi bizdə oynayacağıyla bağlı razılığa gəlindi. Amma sonradan o, bizdə oynamaq istəmədiyini bildirdi. Müqaviləylə bizə məxsusdu. Bizim rəhbərliyin "Beerbaşa" ilə yaxşı münasibətləri var. Təmkinlə bağlı necəsə ortaq məxrəcə gəliblər. Bizdə oynamaq istəsə, ona həmişə sevə-sevə şans verə bilərik".
Minifutbol yığmamızın baş məşqçisi Elşad Quliyevdən də danışdı:
"Biz Təmkini milliyə "Beerbaşa"dan çağırmışıq. Mən bilən onun "Qusar"la müqaviləsi yoxdu. Həmçinin hələ 2-ci liqa təmsilçisində oyun keçirməyib. Mən onu ancaq "Beerbaşa"da çıxış edən kimi görmüşəm".
ABDULLA İSMAYILOĞLU
Digər xəbərlər
