Təbii ki, İsveç mediası və ya hansısa neytral mütəxəssis Bakıdakı darmadağına görə yığmamızın möhtəşəm oyununu yox, rəqibin hədsiz zəif təsir bağışlamasını əsas gətirə bilər.

Amma bu məqam heç nəyi dəyişmir. İsveç yığması Azərbaycanda amansızcasına kötəkləndi. Özü də rəqib əsas heyətlə gəlmişdi. Dünya mediası heyətində Viktor Lindelöf, Emil Forsberq, Deyan Kulusevski və Robin Olsenin olduğu komandanın belə aqibətlə üzləşməsini təəccüblə qarşılayır. Uzaqbaşı Aleksander İsakın yoxluğundan danışmaq olar ki, onun zədələnməsi də bizim günahımız deyil.

Bu məğlubiyyətlə çox maraqlı və tarixi statistika gerçəkləşib. İsveç yığması tarixində heç vaxt AÇ-nin seçmə mərhələsində 4 dəfə uduzmamışdı. Lap erkən dövrlərdən 1990-cı illərə qədər maksimum 3 oyunda uduzmuşdular. AÇ-96-nın seçmə turnirində 8 oyunun üçündə uduzan “Tre Krunur” final mərhələsinə qatıla bilmədi. 21-ci əsrdə isə İsveç yığması təsnifat mərhələsində nəinki 4, heç 3 dəfə də uduzmamışdı. Azərbaycanın tarixini qaraladığı komanda son 6 qitə birinciliyinin hamısına qatılıb.

HUŞƏNG