Lionel Messi ilə Zinəddin Zidan “Adidas” şirkətinin reklam çəkilişi ilə bağlı Mayamidə bir araya gəlib.

“Football-plus.az” xəbər verir ki, futbolun iki əfsanəsi 30 dəqiqəliyə kamera önünə keçərək, ötənləri xatırlayıb, futbolla bağlı mülahizələrini bölüşüb və bir-birinə tərif yağdırıb. Söhbət Zidanın Leoya verdiyi rəmzi ötürmə ilə başlayıb: “Çox təəssüf ki, biz heç vaxt birgə oynamamışıq, ancaq mən sən sənə ötürmə verə bilərəm”.

Bu söhbətin ən maraqlı məqamlarından seçmələr hazırlamışıq.

Zidan + Messi = qarşılıqlı heyranlıq
Zidan dərhal anladıb ki, Leo ilə eyni komandada oynamaq istəyərdi. Messi də eyni fikri bölüşüb. O, həmişə Zinəddinin oyununa heyranlıq duyub, hərçənd “Barselona” azarkeşi olan birisi üçün bu asan deyildi. Fransalı ulduzdan Leonun oyununu bir sözlə ifadə etməyi xahiş edəndə o, belə cavab verib: “Sehrbazlıq”. Möhtəşəm komplimentdi. Zidan belə davam edib: “Pleymeyker meydanda baş verən hadisələri əvvəlcədən duyur, hadisələrin axarını başqalarından tez görür. Mən hər kəsi bir saniyə qabaqlayırdım, sən isə üç. Bu səni fərqləndirir. Sən hələ topu qəbul etməmiş nə edəcəyini bilirsən. Mənim üçün, oyundan başı çıxan adam üçün bu, tər-təmiz cadugarlıqdı. Sənin oyununa baxanda bəzən növbəti addımda nə edəcəyini proqnozlaşdıra bilirdim. Bu hansısa mental bağ idi. Biz Leo ilə o qədər də tez-tez görüşmürük. Bu üzdən ona necə böyük heyranlıq duyduğumu məhz indi çatdırmaq mənim üçün vacibdi. Futbou sevən bütün adamlar ona heyrandı. Belələri çox azdı, çox azdı. Ümumiyyətlə, sən bir dənəsən”.

Sonra növbə Messinin Zidanın ünvanına söylədiyi cavab komplimentlərinə çatdı: “Zinəddini tarixin ən dahi futbolçularından biri sayıram – özünə də bunu dəfələrlə demişəm. “Real”da oynayarkən həmişə onu izləmişəm və heyranlıq duymuşam. Həm də kədərlənmişəm, ona görə ki, mən “Barselona”da oynayırdım. “Qalaktikos” dövrünü yaxşı xatırlayıram, Çempionlar Liqasının finalında sol ayaqla vurduğun qolu, möhtəşəm oynadın! Dünya çempionatının finalında Braziliyanın qapısına qollar, Zidanın finti. Deyəsən, “Valensiya”ya qarşı oyun idi, onda da sol ayaqla fərqləndin. Məhz belə anlara görə futbolu sevirəm. Zidan həmişə başqalarından seçilib: zəriflik, sehr, incəsənət – oyunun oyununu belə ifadə etmək olar. Onun oyunundan ləzzət almışam, hərçənd mənə - “Barsa” fanatına bu asan deyildi. Ancaq böyük futbolçular klubların və ya yığmaların çərçivəsindən kənara çıxır”.

Bunlar videoda yer alan ən parlaq komplimentlər idi.
“10 nömrələr”in futboldakı taleyi: indi artıq sıradan çıxırlar

İki ulduzun müzakirəsinin əsas mövzularından biri də artıq nəsli kəsilməkdə olan klassik “10 nömrələr” ilə bağlı idi. Zizu dedi ki, uşaqlıqda hər kəs oyunu aparan, meydanda xarüqələr yaradan lider olmaq istəyir. Messi əlavə etdi ki, “10 nömrə” həmişə xüsusi oyunçudu. Ancaq indi nömrə bəlli önəmini itirib – rol, meydandakı yer, mövqe, hər şey itib. Leo təəssüfləndi: “Bu mövqe daha yoxdu. Bütün komandanı bir-birinə bağlayan yarımmüdafiənin lideri yoxdu. İndi hamı 4-3-3 ilə oynayır ki, bu sxemdə “10 nömrə” hücumameyilli yarımmüdafiəçidən daha çox insayd rolunu oynayır. 4-4-2-də də “10 nömrə”yə yer yoxdu. “10 nömrələr” az qalıb”. Zidan isə ona belə cavab verdi: “Sağ ol ki, heç olmasa, sən oynayırsan! Bunun sayəsində “10 nömrə” hələ də mövcuddu”.

Əfsanələrin ortaq fikri belə oldu ki, futbol dəyişib: hamı sistemlə oynayır, klassik “10 nömrələr” isə belə mexanizmə uyğun gəlmir. Zidanın etirafı: “10 nömrə” meydanda sehrbazlıq edən adamdı. Leo, sənin etdiyin kimi. Ona görə ki, komandanın lideri olmalıdı. Lider isə həmişə təhlükəli vəziyyətlər yaratmalıdı. Bu səni fərqləndirən cəhətdi. Həm də “10 nömrələr”i xarakterizə edir. Sadəcə, lider də yox, komandanın mənafeyi naminə yaradıcılıqla məşğul olan adam”.

Zidan niyə 5 nömrəli futbolka ilə oynayıb?
Əfsanələr 10-u mövqe yox, nömrə kimi də müzakirə edib. Belə qərara gəliblər ki, bu nömrəli futbolka kimisə təzyiq altında saxlaya, kimisə qanadlandıra bilər. Və bəxtlərinə düşən başqa nömrələri də xatırlayıblar. Messinin bu mövzuda dedikləri: “Parisdə 10 nömrəli futbolka ilə oynamadım. “Barselona”dakı və yığmadakı uzun illərin ardından bu bir qədər qeyri-adi idi. Öz nömrəmdən ötrü bir qədər darıxdım, ancaq bunda qorxulu bir şey yoxdu. Öyrəşdim. 30 nömrəli forma da mənim üçün xüsusidi – karyerama belə forma ilə başlamışam”.
Zidanın “Real”da 5 nömrəli formanı götürməsinin isə maraqlı tarixçəsi var: “Madriddə 10 nömrəli formanı Fiqu geyirdi, ancaq bu məni narahat etmitdi. “5 nömrə” daha çox xoşuma gəlirdi. Enində-sonunda ən vacib olan meydanda göstərdiyin oyunun səviyyəsidi. Ancaq mərkəz yarımmüdafiəçisinin 5 nömrəli formanı geyməsi həqiqətən nadir hadisədi. Bilirsənmi, onu necə əldə etdim? Futbolçuların 25, 30 və ya 35 nömrəni götürməsi Florentino Peresin heç xoşuna gəmirdi. O, yetərincə mühafizəkar adamdı: 1 nömrə qapıçı üçündü, 2-dən 11-ə qədər olan qalan nömrələr isə sahə oyunçuları üçün. Mənə qədər 5 nömrəli forma müdafiəçi Manolo Sançisə məxsus idi. O, elə mənim tranferim ərəfəsində getdi. Prezident məndən soruşdu ki, 1-dən 11-ə qədər olan nömrələrdən götürürsənmi? Razılaşdım və 5-i seçdim – elə bir seçim imkanım yox idi”.

Messini fikrincə, məhz Zidan “Real” üçün 5 nömrəni xüsusi edib. Çox güman, Cud Bellingem də ekran arxasından argentinalını bi fikrə görə alqışladı.
Zidanın kumiri kim olub? Bəs Messinin?
Messi dərhal etiraf etdi ki, bütün argentinalıların kumiri Maradonadı. “10 nömrə” haqda söz düşəndə dərhal Dieqonu xatırlayırlar. Hər kəs böyüyərkən ona oxşamağı arzulayır. Leo da övladlarına Maradonanın həyat tarixçəsini danışır. Zidan isə əlavə etdi ki, Dieqoya yalnız argentinalılar yox, bütün dünyada yaşayanlar belə yanaşır.

Ancaq Leo Maradonanı, demək olar ki, iş başında görməyib – çox kiçik olub, yadında heç nə qalmayıb. Bu üzdən onun kumiri Argentinadan olan başqa “10 nömrə”di: “Həmişə demişəm ki, Pablo Aymarın oyununu bəyənirəm. O, “Valensiya”da olarkən siz bir-birinizə qarşı oynamısız. Pablo “River Pleyt”də çıxış edərkən daim məni heyran edib. Odu ki, belə deyirəm: müsabiqədən kənarda olan Maradona var, ancaq ondan dərhal sonra Aymar gəlir. Pablo heyranlıq duyduğum futbolçudu. Ancaq onda mən Avropa futbolu ilə maraqlanmırdım - əsasən Argentina komandalarının çıxışını izləyirdim”.
Zidanın kumiri isə “Marsel”də oynayan uruqvaylı Entso Françeskoli olub – bu heç kimə sirr deyil. Fransalı ulduz hətta onun şərəfinə oğullarından birinə Entso adını qoyub. Zinəddin indi də kumiri haqda böyük heyranlıqla danışır: “Mənim 13 yaşım olanda – hələ “Kann”a getməmiş o “Marsel”də oynayırdı. Mən Entsonu ilk dəfə görəndə dedim ki, onun kimi olmaq istəyirəm. Topla çox zərif, incə davranırdı. Bizim çempionatda əsasən fransalılar çıxış edirdi, o isə Cənubi Amerikadan gəlmişdi. Və biz hamımız görürdük ki, başqa cür futbol da var. Entso başqalarından çox seçilirdi. Ümumiyyətlə, topla hər şey etməyi bacarırdı. Və mən düşünürdüm ki, qarşımdakı əsl sehrbazdı. Onu təkrarlamaq istəyirdim”.

Messi dedi ki, Françeskoli Argentinada – “River Pleyt”də oynayandə onu iş başında görüb. Uruqvaylı orda da parlayırmış.

Vacib oyunlar və qollar haqda
Nə vacibdi: Çempionlar Liqasında və ya dünya çempionatında qol vurmaq?
“Düşünürəm ki, dünya çempionatının finalında qol vurmaq başına gələ biləcək ən yaxşı hadisədi. Hər ikimiz bunu deyə bilərik” – Messinin cavabıdı.

Ən çətin rəqib?
“Kobudluq mənasında yox, məhz möhtəşəm oyun səviyyəsi mənasında Paolo Maldini. O, çox ağıllı idi. Türam da çox yaxşı idi” – Zidan belə cavab verdi.
Hansı oyunun yenidən keçirilməsini istərdiz?
Bu suala Messi cavab verdi: “Heç nəyə görə heyifsilənmirəm. Uzun futbol yolumda xoşbəxt anlarım çox olub, kədərli anlarım da. Ancaq bu taledi. Cavab lazımdısa, DÇ-2014-ün finalından sonra qəlbimdə çapıq qaldı. Hətta ötənilki qələbədən sonra da ağırdı”.

Karyeranızdakı ən yaxşı oyun?
Zidanın bu yöndəki seçimi maraqlıdı: “Bir oyunu seçmək çətindi. Ancaq hələ “Yuventus”da olarkən – 1997-ci ildə Çempionlar Liqasının yarımfinalında “Ayaks”a qarşı oynamışam. Cavab görüşündə 4:1 hesabıyla qalib gəldik. İndi həmin oyunu az adam xatırlayar, ancaq mənim üçün ən yaxşı odu”.