Fransa Liqa 1-nin rəhbərliyi çempionat oyunlarının teleyayın hüququnun satışı ilə bağlı tender keçirmək istəsə də, bircə sifariş də almayıb.

“Football-plus.az” xəbər verir ki, “L’Equipe” qəzetinin yaydığı məlumata görə, Liqa ildə 800 milyon avro qazanmaq istəyib – turun mərkəzi oyunlarından ikisinin və telekanalın seçimi əsasında daha 4 oyunun yayını üçün 530 milyon, ikinci divizion da daxil qalan bütün yayınlar üçün 270 milyon. DAZN platforması və Qətərin “beIN Sports” telekanalı bu şərtləri hədsiz əlverişsiz hesab edib. Belədə Liqa 1 artıq tendersiz, birbaşa danışıqlar aparmağa məcburdu. Hazırda teleyayın hüququnun sahibi olan, tenderdə iştirakdan boyun qaçıran “Canal+” şirkəti ilə də.

Liqa 1 çoxdan bu yolda əziyyət çəkir
Bildiyiniz kimi, cari mövsümdən Liqa 1 iştirakçılarının sayı 20-dən 18-ə endirilib. Futbol hakimiyyətinə rəhbərlik edənlər bunu rəsmi şəkildə Çempionlar Liqasında gözlənilən islahatla əlaqələndirmişdi. Yəni ki 2024-cü ildən qitənin əsas klub turnirində 8 qrup oyunu olacaq, çempionat iştirakçılarının sayını azaltmaq isə futbolçuların yükünü azaltmağa xidmət edir. Hərçənd klublar və funksionerlər teleyayından gələn pulun azalmasına görə panikanın təsiri altında hərəkət edirdi. Hələ onda Fransa Peşəkar Futbol Liqasının rəhbəri Vensan Lebryun belə etiraf etmişdi: “Çempionat iştirakçılarının sayını futbol naminə azaltdığımızı desək, yalan danışmış olarıq. Reallıq belədi ki, teleyayın hüququnun satışı ilə bağlı vəziyyət pisləşdiyinə görə oyunların sayı azaldılmalıdı”.

Liqa 1 artıq bir dəfə teleyayın hüququ ilə bağlı müqaviləyə görə “yanıb”. “Mediapro” şirkəti zahirən bu hüquqa yiyələnmişdi, ancaq sonradan, sadəcə, pul ödəməyi dayandırdı. “Mediapro” 2020-ci ilin iyulunda və avqustunda Liqaya 143 milyon avro (şirkət bunun üçün də kredit götürmüşdü) ödəsə də, sonradan vəziyyət dəyişdi. Yayıncı şirkət növbəti tranş günlərində (oktyabrın 5-də 172,3 milyon avro, dekabrın 5-də 152,5 milyon avro) bir sent də köçürə bilmədi.

Problem həm də onunla bağlıdı ki, 2020-də koronavirusla bağlı fasilədən sonra Fransa çempionatı bərpa olunmadı. Halbuki başqa top-liqalarda belə olmadı. İndi Liqa 1 daha etibarlı yayınçı “Canal+” ilə əməkdaşlıq edir. Ancaq sövdələşmə format üzündən alınmır: yayınçı şirkət yalnız turun ən yaxşı oyunlarını göstərməyə hazırdı, daha bütün çempionatı yox. Şirkət ardından bu variantı da təklif etdi: Liqa 1 iştirakçılarının sayı 18-ə və ya 16-ya endirilsin, yalnız onda tam paketi almağa hazırıq.
İndi isə Liqa 1 rəhbərliyi müqavilə qiymətini artırmaq istəyir. Yuxarıda adını çəkdiyimiz Lebryun elan edib ki, bütün hüquqların satışına görə ildə 1 milyard avro qazanama köklənib, ancaq bu rəqəmə tədricən çatmaq fikrindədi.

Bəs aparıcı liqalarda yayın hüququ neçəyə satılır?
Bu məsələyə aydınlıq gətirmək üçün əvvəlcə, sadəcə, rəqəmlərə nəzər salaq.

Top-liqalarda teleyayın hüququnun satışı
liqa yayınçı şirkətlər məbləğ
İngiltərə premyer-liqası Sky Sports, BT Sport, Amazon, BBC 1,5 milyard avro
Almaniya bundesliqası Sky Sports, DAZN 1,1 milyard avro
İspaniya La Liqası DAZN, Movistar 990 milyon avro
İtaliya A seriyası Sky Sports, DAZN 900 milyon avro

● Gözlənildiyi kimi, İngiltərə premyer-liqası dominantlıq edir: bu liqa 2021-ci ilin yazında “Sky Sports”, “BT Sport”, “Amazon” və BBC ilə müqavilənin müddətini 2025-ə qədər uzadıb, həmin vaxt isə mövsümün yayın paketini 2 milyarda qaldırmaq fikrindədi.
● Almaniya bundesliqasının rəhbərliyi 2020-ci ilin oyununda teleyayın hüququnu bir mövsüm üçün 1,1 milyarda satmaqla bağlı 2025-ci ilə qədər müqavilə bağlayıb.
● İspaniya La Liqasının rəhbərliyi iki il əvvəl teleyayın hüququnu 990 milyon avroya satıb. Liqa DAZN və “Movistar” ilə 2027-ci ilə qədər olan müqaviləyə görə 5 milyard avroya yaxın qazanacaq. Yayınçı şirkətlər hüququ belə bölüb: DAZN turun 5 oyunun göstərir, daha 3 oyun “Movistar”ın payına düşür.
● İtaliya A seriyası teleyayın hüququnun illik satışına görə 1,2 milyard avro qazanmaq istəyirdi, ancaq yalnız 900 milyon avroluq təklif aldı – DAZN ilə “Sky Sports”dan. Müqavilə 2029-cu ilə qədərdi.