“Adidas” Lionel Messini təbrik edib. Almaniyanın idman məhsullarının istehsalı ilə məşhurlaşan şirkəti ona qiymətli hədiyyə verib.

"Football-plus.az" xəbər verir ki, “Adidas” rəhbərliyi “İnter Mayami”nin və Argentina yığmasının hücumçusuna 8-ci dəfə “Qızıl top” mükafatını qazanması münasibəti ilə 8 qızıl üzük bağışlayıb. Bu haqda şirkətin “X” sosial şəbəkəsindəki hesabında məlumat verilib:

Messinin “Frans Futbol”un jurnalistlər arasında keçirilən sorğusundakı rekord – 8-ci qələbəsinə futbol dünyasında münasibət fərqlidi. Yeri gəlmişkən, Kriştiano Ronaldo da onun növbəti uğuruna münasibətini ifadə edib. Doğrudu, hazırda Səudiyyə Ərəbistanında çıxış edən portuqaliyalı hücumçu mövzu ilə bağlı konkret açıqlama verməyib. O, dolayı yolla da olsa, yumşaq desək, Lionelin qələbəsinə sevinmədiyini büruzə verib.

İspaniyada çıxan “As” qəzetinin baş redaktorunun müavini Tomas Ronsero sorğuda Messinin qalib gəlməsini gülməklə reaksiya verib. O, sosial şəbəkədki hesabına argentinalının Amerikaya, necə deyərlər, karyerasının qürub çağını yola vermək üçün yollandığını yazıb. Ronsero Lionelin DÇ-2022-də 6 penaltinin hesabına qalib gəldiyini və turnirin 8 ay əvvəl keçirildiyini xatırladıb. “As” qəzetinin əməkdaşı hətta Messinin indiyədək “Qızıl top”u yalnız 5 dəfə qazanmağa layiq olduğunu, sorğuda 1-ci olduğu daha üç halda isə mükafatın Xavi Ernandesə və ya Andres İnyestaya, Robert Levandovskiyə və Erlinq Holanna çatmalı olduğunu da vurğulayıb.

Ronaldo onun bu fikirlərini bəyənib. Portuqaliyalıdan böyük ölçüdə elə bunu gözləməyə dəyərdi. “Qızıl top”u 5 dəfə qazanan Kriştiano, hər halda, Messidən 3 top geri düşüb. Bu fərq isə onun yaşıl meydanı Lionel ilə rəqabəti praktiki cəhətdən məğlub başa vuraraq tərk edəcəyinə işarədi. Həm də böyük işarə! Argentinalıdan fərqli dünya çempionu ola bilməyən Ronaldonu həm də bu fakta görə başa düşmək olar: axı “Frans Futbol” onun adını, ümumiyyətlə, 30 namizədin siyahısına daxil etməmişdi...

Ronaldo ilə bağlı digər xəbər də maraqlıdı. “Əl-Nəssr”in ulduz futbolçusu Səudiyyə Ərəbistanı Kral Kubokunun 1/8 finalının “Əl-İttifaq”la oyununda etdiyi hərəkətlə gündəmə gəlib. Hakim 45+4-cü dəqiqədə onun oyundaşı Enderson Talişkanın vurduğu qolu qeydə almayıb. Bu qərar Ronaldonu qəzəbləndirib. 38 yaşlı forvard tribunalara qarşı çevrilib və hakimi göstərərək əvəzlənmə işarəsi edib. Onun bu hərəkəti kameralara da düşüb. Görüntülər futbol ictimaiyyətinin müzakirəsinə səbəb olub.