“Demək olar ki, bircə Berti Foqts çatmır”
Minifutbol Federasiyasının prezidenti və “Zirə"nin İdarə heyətinin sədri Orxan Məmmədov srağagün paylaşdığı statusla gündəmə gəldi.
Onun yazdıqlarına nəzər salaq:
“Yeni yaranan və millimizin sabiq futbolçularından ibarət “Xankəndi” minifutbol komandasıyla görüşdük. Bu mövsüm minifutbol liqasında mübarizəyə başlayacaq komanda ilə hal-əhval tutaraq uğurlar arzuladıq. Minifutbolumuzun inkişafı keçmiş ulduz futbolçuları meydanlara qaytarır. Federasiyamız həmişə veteranlara dəstək olacaq”.
Mövzunu araşdırarkən bəlli oldu ki, sözügedən komandanın rəhbəri məhz Orxan Məmmədovdu. Baş məşqçi vəzifəsinə yığmanın və “Araz-Naxçıvan”ın futzalçısı Xətai Bağırov təyin edilibsə, kapitan sarğısını “Araz-Naxçıvan”ın məşqçisi Əfran İsmayılov daşıyacaq. Həmçinin komandanın adının “Qarabağ” olması gündəmdə idi. Bizdə olan bilgiyə görə, Orxan bəy bununla bağlı Ağdam klubuyla danışıq aparsa da, razılıq əldə edilməyib. AFFA-nın baş katibi Sərxan Hacıyev isə komandanın minifutbol çempionatında iştirakını təklif edib. Beləliklə, komanda yeni mövsümdən çempionatda iştirak edəcək.
“Xankəndi” haqda daha ətraflı məlumat almaq məqsədiylə baş məşqçi və kapitan ilə əlaqə saxladıq.
Xətai Bağırov:
“Çox şükür, hər şey istədiyimiz kimi oldu. İşlər qaydasındadı. Artıq bir neçə məşq geridə qalıb. Düzdü, adla bağlı başqa variantlar da var idi. Lakin rəhbərlikdən tutmuş hər kəsin yekun qərarı “Xankəndi” oldu. Məncə, ən düzgünü də bu idi. Komanda komplektləşib. Bundan sonra azı bir mövsüm birlikdə olacağıq. Hazırlıqlar davam edir. Hədəf nəticə üçün meydana çıxmaq və yüksək yerlər uğrunda mübarizə aparmaqdı. Kiməsə şəxsi və ya karyera həyatında problem yaradacağımızı düşünmürük. Heyətin millimizin sabiq futbolçularından ibarət olduğunu bilirsiz. Təvazökarlıqdan uzaq olsa da, hamımız peşəkarıq. Hələ ki dəyişiklik etmək fikrimiz yoxdu. Lakin olsa belə, bundan başqa mənalar çıxarmaq düzgün olmaz. Hər sahədə baş verə biləcək haldı. Ümumiyyətlə¸ “Xankəndi” adına uyğun işlər görmək üçün çalışırıq. İnşallah, zaman irəlilədikcə əziyyətimizin bəhrəsini görəcəyik”.
Əfran İsmayılov:
“Rahid Əmirquliyev, Elvin Məmmədov, Rauf Əliyev, Rəşad Sadıqov, Rail Məlikov, Cavid Hüseynov, Cavid İmamverdiyev, Ruslan Əmircanov, Kamran Ağayev... Demək olar ki, Berti Foqtsdan başqa hamı bir yerdədi. Bir o çatmır. Sağ olsun Orxan müəllim, bütün durumlarda bizə dəstək olacağını dedi. Öncəliklə komanda üçün kiçik büdcə ayrılıb. Ortaya uğurlu iş qoymaq istəyirik. Minifutbolun da özünəməxsus çətinlikləri var. Ötürmə vermək, qol vurmaq kimi məsələlərdə hər şey qaydasındadısa, kiçik çatışmazlıqlar da var. İndi onların aradan qaldırılması yönündə çalışırıq. İnşallah, ölkə çempionatında iştirak edəcəyik. Ordakı rəqiblərimizin güclü olduğunu bilirik. Buna baxmayaraq, meydana uduzmaq üçün çıxmaq niyyətimiz yoxdu. Komandanın adına gəlincə, düzdü, “Xankəndi” olmasına razılaşmışdıq. Lakin son anda ortaya bəzi məsələlər çıxdı. İndi gündəmdə 4 ad var: “Qarabağ”, “Xankəndi”, “İnter” və “Old Star”. Çox güman, bunlardan biri olacaq. Daha dəqiq desək, ad hələ rəsmiləşməyib. Bu yöndə rəhbərliklə görüşüb müzakirə aparacağıq”.
Qeyd edək ki, çempionatın püşkü noyabrın əvvəlində atılacaq.
KƏNAN BAHADIR
Digər xəbərlər
