Həftəni Türkiyə futbolu üçün uğurlu saymaq olmaz.
"Football-plus.az" xəbər verir ki, “Qalatasaray”ın üzücü məğlubiyyətindən sonra “Beşiktaş” da ümidləri doğrultmadı. Halbuki “Bude/Qlimt” buna qədər avrokuboklarda keçirdiyi son 8 oyunda qələbəyə həsrət qalmışdı. “Qalatasaray”la derbi ilə müqayisədə 5 dəyişikliyə əl atan Burak Yılmazın rotasiyası bir fayda vermədi. İlk yarım saatda qonaqlar yalnız Abubakarın qapıçının üzərinə gedən zərbəsi ilə yadda qaldılar. Meydan sahiblərinin üstünlüyü 28-ci dəqiqədə bəhrə verdi. Qonaqların heyətində fasilədə iki dəyişiklik edilsə də, oyunun axarı dəyişmədi. 54-cü dəqiqədə inanılmaz fürsəti boşa verən Norveç təmsilçisi 4 dəqiqə sonra fərqi artırdı. Çox keçmədən bir qolu VAR-dan dönən “Bude/Qlimt” son anlarda daha bir qol vuraraq İstanbul nəhənginə üzücü məğlubiyyət yaşatdı. “Beşiktaş”ın avtoqolla vurduğu qol fanatlar üçün təsəllidən başqa bir şey olmadı. Qrupda keçirdiyi 3-cü oyunda da qələbəyə həsrət qalan “Qartal” sonuncu pillədə qərarlaşıb. Komanda son 4-cü rəsmi oyunda 3-cü dəfə uduzdu.
Həftəni qələbə ilə tamamlayan yalnız “Fənərbaxça” oldu. Zatən bu mövsüm hələ də heç bir oyunda büdrəməyən “Fənər”in budəfəki qurbanı “Ludoqorets” oldu. Hətta Bolqarıstan təmsilçisinin bu matçdan öncə məşqçi dəyişikliyinə getməsi də komandaya uğur gətirmədi. Düzdü, “sarı-lacivərdlilər” superliqadakı ev oyunları ilə müqayisədə bu dəfə çox da yaxşı təsir bağışlamadılar. 2-ci hissənin ortalarında fərqi minimuma endirən qonaqların hətta bərabərlik qolunu vurmaq üçün də gözəl şansı var idi. Amma komanda fürsəti dəyərləndirmədi və üstəlik son saniyələrdə daha bir top buraxdı. 3 turdan sonra İsmayıl Kartalın komandası inamla öz qrupunda liderlik edir.
qrup mərhələsi, 2-ci tur
D qrupu
Bude/Qlimt (Norveç) – Beşiktaş 3:1
Qrenbek, 29. Mumbanya, 58. Saltnes, 87 – Moe, 90+1-öz qapısına.
Beşiktaş: Mərt Günok, Onur Bulut, Nəcip Uysal, Kolli, Masuaku, Onana (Muleka, 61), Haciahmetoviç, Gezzal (Rebiç, 72), Oksleyd-Çemberleyn (Fernandes, 46), Raşitsa (Cenk Tosun, 61), Abubakar (Semih Kılıçsoy, 84).
H qrupu
Fənərbaxça – Ludoqorets (Bolqarıstan) 3:1
Batşuayi, 42. Zayts, 52; 90+3 – Bekao, 65-öz qapısına.
Fənərbaxça: İrfan Can Eğribayat, Osayi-Samuel (Fərdi Kadıoğlu, 63), Bekao, Ciku, Oostervolde, Krespo, Fred (Şimanski, 63), Zayts, Kent (Cengiz Ündər, 90), Tadiç (İrfan Can Kahveci, 62), Batşuayi (Umut Nayır, 81).
Faktlar
* “Fənərbaxça” avrokuboklarda 263-cü oyunda 104-cü qələbəsini qazandı (55 heç-heçə, 104 məğlubiyyət, top fərqi – 355:372). 64 ildən sonra ilk dəfə “Fənər”in avrokuboklarda qələbə ilə məğlubiyyət sayı eyniləşdi! Sonuncu dəfə bu hal komandanın avrokuboklardakı 5-ci oyunundan sonra yaşanmışdı (2 qələbə, 1 heç-heşə, 2 məğlubiyyət).
* “Fənərbaxça”nın avrokuboklarda evdəki məğlubiyyətsiz seriyası 11 oyuna çatdı (10 qələbə, 1 heç-heçə). Klub tarixində bundan daha yaxşı seriya (15 oyun) yalnız bir dəfə - 2006-08-ci illərdə olub.
* “Fənərbaxça” avrokuboklarda ardıcıl 10-cu qələbəsini qazanmaqla bu göstəricidə Türkiyə klubları arasında özünə məxsus olan rekordu bir qədər də yaxşılaşdırdı!
* “Fənərbaxça” avrokuboklarda keçirdiyi son 21 oyunun yalnız birində məğlub olub (16 qələbə, 3 heç-heçə). Yeganə məğlubiyyət ötən mövsüm AL-in 1/8 finalında “Sevilya” ilə səfər oyununda qeydə alınıb (0:2).
* “Fənərbaxça” bu mövsüm keçirdiyi 18-ci rəsmi oyundan da qələbə ilə ayrıldı (top fərqi – 56:10)!
* “Fənərbaxça” İsmayıl Kartalın başçılığı altında keçirdiyi ardıcıl 30-cu rəsmi oyunda məğlub olmadı (27 qələbə, 3 heç-heçə)! Bu seriya 2021/22-nin 2-ci dövrəsindən davam edir. Komanda bu məşqçi ilə son məğlubiyyətini ötən il fevralın 25-də KL-in pley-offunun cavab oyunu çərçivəsində səfərdə “Slaviya” ilə qarşılaşmada yaşayıb (2:3).
* “Fənərbaxça” tarixində ilk dəfə avrokubokların qrup mərhələsinə ardıcıl 3 qələbə ilə start verib.
* “Fənərbaxça” avrokuboklarda öz meydanında keçirdiyi ardıcıl 5-ci oyunda ən azı 3 qol vurdu və belə seriya yaxalayan ilk Türkiyə təmsilçisi oldu!
* “Beşiktaş” avrokuboklarda 239-cu oyununda 101-ci məğlubiyyətlə üzləşdi (90 qələbə, 48 heç-heçə, top fərqi – 317:358).
* “Beşiktaş” avrokubokların qrup mərhələsi çərçivəsində keçirdiyi ardıcıl 10-cu oyunda, səfərdə isə ardıcıl 8-ci oyunda qələbəyə həsrət qaldı. Hər iki göstərici klub tarixinin ən pis seriyasıdı.
* “Beşiktaş” Norveç klublarına qarşı keçirdiyi 9-cu oyunda 4-cü məğlubiyyətini yaşadı (3 qələbə, 2 heç-heçə).
Oyundan sonra
İsmayıl Kartal, “Fənərbaxça”nın baş məşqçisi: “Ludoqorets”in yaxşı komanda olduğunu söyləmişdim. Ötən oyunda “Norşellan”a 1:7 hesabıyla uduzmaları heç kimi yanıltmasın. Qalib gələrək xalımızı 9-a çatdırdıq. Oyunçularımı təbrik edirəm. İnanıram ki, Bolqarıstanda da qalib gələrək pley-offa vəsiqəni təmin edəcəyik. Bu gün kimə lazım idisə, ona da şans verdim. Az oynayan futbolçulardan yararlanmağa çalışdım. Çünki onlar da motivasiya və fiziki durum baxımından həmişə hazır olmalıdılar. Zayts bizim üçün önəmli oyunçulardandı. Bu gün potensialının 70-80 faizini sərgilədi. Ara-sıra oynadığı üçün fiziki durumunu yaxşılaşdırmalıdı. İki qol vursa da, bundan da yaxşı oynaya bilər. Rotasiyadan uğurlu istifadə etməyə çalışıram. Bəzi oyunçulara çox yük deşməsin deyə 60-cı dəqiqədə üçlü dəyişikliyə əl atdım”.
Georgi Dermenciyev, “Ludoqorets”in baş məşqçisi: “Pis oynamadıq. Amma bundan da yaxşı oynaya bilərdik. “Fənərbaxça” mükəmməl komandadı. Onların gördüyü işi, sadəcə, alqışlaya bilərəm. Amma məni tanıyanlar mükəmməlləşmə tərəfdarı olduğumu bilirlər. Ona görə də həmişə komandamdan daha artığını tələb edirəm. Mən daha öncə “Ludoqorets”in başında olanda ÇL-in qrupunda hətta “Real” və “Liverpul”dan da üstün oynayırdıq. 1:3 ədalətli nəticə deyil. Hətta 1:2 də olmalı deyildi. Xal qazana bilərdik. Çünki başabaş futbol izlədik”.
Kyetil Knutsen, “Bude/Qlimt”in baş məşqçisi: “Çox yaxşı oynadıq və əla nəticə qazandıq. “Beşiktaş” yaxşı futbolçulardan qurulan güclü rəqibdi. Qrupda bizim üçün həlledici oyunlardan biri idi. Çünki ilk iki oyunda qələbəmiz yox idi. Hədəfimiz 3 xal qazanmaq idi və buna da nail olduq. Daha çox qol vura bilərdik. Yaxşı fürsətlər yaxaladıq. Cinahlardan yaxşı istifadə edirdik. Amma müdafiə planında, eləcə də bəzi anlarda topu özümüzdə saxlamaq baxımından üzərimizdə bir qədər də işləməliyik”.
Hari Vukas, “Beşiktaş”ın köməkçi məşqçisi: “Rəqibi təbrik etməliyik. Çünki layiqli qələbə qazandılar. Amma onların 2-ci qoluna qədər açıq oyun gedirdi. Bizim də qol vurmaq üçün şanslarımız var idi. Dəyərləndirə bilmədik. Bizdən fərqli onlar öz fürsətlərini dəyərləndirdilər. Heç bir bəhanəmiz ola bilməz. Zamanı və ya iqlimi məğlubiyyətin səbəbi kimi göstərə bilmərik. Sadəcə, şanslardan yararlanmadıq. Sona yaxın riskə getsək də, bu addım özünü doğrultmadı. Tezliklə qələbə ruhunu geri qaytarmalıyıq. Artıq bütün diqqətimizi növbəti oyuna yönəldəcəyik”.