Artıq çoxdan aydın idi ki, bu qrupda liderlik uğrunda mübarizə Belçika və Avstriya yığmaları arasında gedəcək.

“Football-plus.az” xəbər verir ki, İsveç yığması əvvəlki formasından çox uzaqdı, Azərbaycanla Estoniyanın isə nəhənglərə “əlcək atmasından” danışmağa dəyməz. Belçika – Avstriya rəqabətindən “qırmızı iblislər” qalib ayrıldı. Domeniko Tedeskonun rəhbərlik etdiyi komanda səfər qələbəsi sayəsində AÇ-nin final mərhələsinə vaxtından əvvəl vəsiqə qazandı. Qonaqların qələbəni haqq etdiyini demək çətindi. Sadəcə, onlar təhlükəli vəziyyətlərdən daha yaxşı yararlandılar. “Sevilya”nın forvardı Lukebakio oyunun qəhrəmanı oldu. La Liqada keçirdiyi ilk 5 oyunda iki qol vuran Dodi yığmada dubl etdi.

Maraqlıdı ki, milli formada keçirdiyi ilk 10 oyunda fərqlənməmişdi. Nəhayət, 11-ci oyunda parladı. Lukebakio ilk qolu fərdi reyddən sonra vurdu, 2-ci qolda onun zərbəsindən sonra səkən top tora daxil oldu. 3-cü qol zamanı isə avstriyalılar irəli atıldığından müdafiədə boşluqlar yaranmışdı. Ralf Ranqnikin komandası qol vəziyyətlərini sağa-sola xərcləyirdi. Fasilə ərəfəsində hətta boş qapıya da yol tapmadılar. Meydan sahibləri yalnız “qatar gedəndən” sonra ayıldılar. 72-ci dəqiqədə Laymer fərdi ustalıq hesabına qollardan birinin əvəzini çıxdı. Onana 78-ci dəqiqədə meydandan qovulandan sonra belçikalılar müdafiəyə çəkilməyə məcbur oldu. Zabitser penaltini reallaşdırıb fərqi minimuma endirəndən sonra intriqa bir qədər də artdı. Ancaq meydan sahiblərinin bundan artığına gücü çatmadı. Minimal fərqi qoruyan “qırmızı iblislər” AÇ-yə vəsiqə qazanan komandalar sırasına qoşuldu. Tedesko son qrup oyunlarında artıq taktiki eksperimentlərə əl ata, gəncləri sınaya bilər. Yığmamız da son turun oyununda bu məqamdan yararlanmağa çalışmalıdı.

F qrupu, 7-ci tur
Estoniya – Azərbaycan 0:2 (0:2)
Avstriya – Belçika 2:3 (0:1)
Avstriya: A.Şlager, Veber (Prass, 71), Danso (Bedu, 66), Linhart, Vimmer (Zabitser, 79), Baumqartner (Çam, 66), Qrilliç, K.Şlager, Zayvald, Laymer, Sarkariya (Kalayciç, 66).
Belçika: Sels, Teate, Vas, Vertongen, Kastan, Manqalya (Tilemans, 64), Onana, Openda (Karrasko, 46), Dokyu (Keyta, 88), Lukebakio (Bakayoko, 71/Vermeeren, 87), Lukaku.
Qollar: Lukebakio, 12 (0:1). Lukebakio, 55 (0:2). Lukaku, 58 (0:3). Laymer, 72 (1:3). Zabitser, 84-p. (2:3).
Vərəqələr: Qrilliç, 15. Manqalya, 24. Onana, 36. Zayvald, 40. Vimmer, 54. Kastan, 63. Laymer, 77. Lukaku, 79 – sarı. Onana, 78 – qırmızı (ikinci sarı).
Hakim: Xesus Xil Mansano (İspaniya).
13 oktyabr. Vyana. 47000 tamaşaçı.
8-ci tur
Azərbaycan – Avstriya 0:1
Belçika – İsveç ???
1. Belçika 6 5 1 0 16-3 16
2. Avstriya 5 4 1 0 14-7 13
3. İsveç 5 2 0 3 11-8 6
4. Azərbaycan 5 1 1 3 4-11 4
5. Estoniya 6 0 1 5 2-18 1

Fakt
Lukaku son 9 oyunun səkkizində qol vurub. 30 yaşlı forvard “Roma”nın və milli komandanın heyətində keçirdiyi son 9 oyunda 10 dəfə fərqlənib. Romelu sentyabrın 12-dən bəri yalnız A seriyasının “Cenoa” ilə oyununda (1:4) rəqib qapısına yol tapa bilməyib. Yeri gəlmişkən, milli formada qol sayını 78-ə çatdıran Lukaku bu göstəricidə əfsanəvi Peleni də arxada qoydu.

Oyundan sonra
Ralf Ranqnik, Avstriya yığmasının baş məşqçisi: “Mən öz komandamı yalnız tərifləyə bilərəm. Bu gün daha artığına layiq idik. Hesab 3:0 olandan sonra heç kim intriqanı bərpa edə biləcəyimizi düşünmürdü”.

Domeniko Tedesko, Belçika yığmasının baş məşqçisi: “Gənc oyunçularımızla qürur duyuram. Bəziləri ilk dəfə yığmanın heyətində çıxış etdi. Bu futbolçularla bağlı böyük planlarım var. İndiki uğur bütün Belçika üçün çox vacibdi. Bu gün heç də asan oyun olmadı”.