Dünya futbolunda elə futbolçular, hətta ulduzlar var ki, xarakterinə, yaşam tərzinə görə başı çox ağrıyıb, karyerası alt-üst olub. Bu yöndə misal çoxdu. Amma yazımı nümunələrlə doldurub başınızı ağrıtmaq istəmirəm.

Elə Azərbaycanın futbol camiəsində də qalmaqallı oyunçular yetərincədi. Onlardan biri hazırda böyük futboldan uzaq düşən Təmkin Xəlilzadədi. Hələ "Qarabağ"ın əvəzedici heyətində çıxış edərkən məşqçilər onu bacarıqlı, kreativ oyun sərgiləyən, amma xarakter və davranışlarında ciddi nöqsanlar olan futbolçu kimi vurğulayırdılar. “Yeniyetmədi, gəncdi, hələ bərkə-boşa düşməyib” deyə başı sığallansa da, səhvlərinə göz yumulsa da, Təmkin yaşa dolub, karyerasında peşəkarlaşmağa doğru addımlayıb yığma səviyyəsinə qədər yüksəlsə də, davranışındakı və xarakterindəki naqislikləri heç cür aradan qaldırmadı və ya qaldırmaq istəmədi. Məhz bunun nəticəsiydi ki, çıxış etdiyi klublarda ya məşqçilər korpusu, ya da rəhbərliklə qarşıdurmalar yaşadı. "19 nömrə"nin adı hətta oyun-alqı satqısında belə hallandı. Məşhur el misalımız var: "Od olmayan yerdən tüstü çıxmaz". Mən demirəm ki, Təmkin yaşıl meydanda "qara biznes" qurduğuna görə tüstü çıxarır. Amma bu qədər söz-söhbəti də “qeybət” deyib keçmirəm. Hər halda, müstəntiq deyiləm, düşünürəm ki, qazdıqca çox şey ortaya çıxacaq. Nə isə...

Yığmamızın sabiq üzvü dələduzluğa, barıqalığa görə məsuliyyətə cəlb olunmasa da, karyerasında minalar partlamağa başladı. Sonuncu dəfə "Zirə" forması geyən Təmkin Rəşad Sadıqovun da səbr kəsasını daşıraraq öncə əvəzedicilərə yola salındı, sonra əsas komandada 2-3 oyunda şans verilsə də, islah olmadığı aydınlaşandan sonra futbolumuzun "terminator"u ona qapını göstərdi. Bu yolsalmayla Təmkinin qara günləri başladı. Elita təmsilçiləri ondan üz çevirdi, hətta autsayder "Şamaxı"ya belə lazım olmadı. 1-ci liqa klubları da Təmkinin "xarakter"inin əyani görməkdən uzaq durdu. Futbolçu Region Liqasında da "persona non qrat" oldu. Sonda boynu bükülmüş "19 nömrə" futzalımızın 2-ci liqasındakı "Rəvan"a pənah apardı. Səmimi deyim ki, onun bu klubda kiminləsə qarşıdurma yaşaması haqda səs-soraq eşidilmədi. Bəlkə də jurnalistlər bu yöndə çox da dərinə getməyərək baş vermiş hansısa hadisəni ictimailəşdirmədi. Hazırda minifutbolda vaxt keçirən Təmkinə “elçi düşənlər” də var idi. Təbii ki, onlar elita, 1-ci liqa və ölkə xaricindən deyildi. Yarımpeşəkar statusa malik 2-ci liqadan "Füzuli" ilə "Qusar" qalmaqallı futbolçunu sıralarına qatmaq istəyirdi. Çoxları onun Qarabağ təmsilçisinə keçəcəyini gözləyirdi. Ən azı bu komandada təcrübəli futbolçuların yer alması ənənəyə çevrilib. Amma qəhrəmanımız keçidə razı olmadı. "Qusar" rəhbərliyi isə Təmkinin artıq bölgə təmsilçisinin üzvü olduğunu və 38 nömrəli formanı geyəcəyini deyərək məsələyə nöqtə qoydu. Amma Təmkin burda da "xarakter" nümayiş etdirdi. O, israrla "Qusar"da oynamağımdan söhbət gedə bilməz. Adımın iştirak ərizəsinə də daxil olunması heç də "Qusar"ın üzvü olmağım anlamına gəlmir. Mən yalnız elita klublarında təklif gəlsə, oynamağa razılıq verəcəm" deyə özünü dağ başına qoydu.

Əzizim, Təmkin adını kim qoyubsa, canı sağ olsun, dünyasını dəyişibsə rəhmət etsin, amma təmkinsizliklə, yekəxanalıqla, kəskin eqoyla böyük futbola qayıdılmır. Coi Barton, Mario Balotelli, Kərim Benzema və digər ulduzların naduristliklərindən cuşa gəlmisənsə, deməli, baltanı daşa vurmusan. Onların qeyri-etik, yekəxana davranış fonunda yüksək performansları, ulduz olmaları və minlərlə fanatların dəstəyi klunsuz-futbolsuz qalmağa qoymur. İncimə, ay Təmkin dadaş, sənin dikbaşlığını komuflyaj edən üstün tərəflərin yoxdu. Maksimum sürətli keçidin, standart vəziyyətdən yararlanman var ki, buna görə də hansısa komanda səni heyətinə qataraq qalmaqallar yaşamaq, tərləmək, biabır olmaq istəməz. "Qusar"ı saymırsansa, birdə çətin 2-ci liqadan sənə maraq ola. Çılğın Elvin Yunuszadə səhvlərindən dəsr aldı, Mirabdulla Abbasov, Fəhmin Muradbəyli və başqaları da islah olunmaqdadı. Amma bircə sən tərsliyinə salıbsan. Bu gedişlə minifutboldan məhlə futboluna da düşməsən, nəzir ver. Abbasqulu bəyin təbirincə desək, "papağını qarşına qoy, yaxşı-yaxşı düşün" deyərdim, amma yaşıl meydanın atributa papaq yox, futbolka, şortik, butsdi. Odu ki, bu vaxta kimi çıxış etdiyin klublardakı formaları qarşına qoy, səhvlərini götür-qoy et. Gör, hansı zirvələrdə olmaləydın, hansı enişə yuvarlanıbsan və bu proses dayanana oxşamır. Xülasə formandakı Təmkin Xəlilzadə ad-soyadına baxıb fərəhlənməkdənsə, təmkinli Təmkin olmaqla nöqsanlarını, səhvlərini aradan qaldırsan, yaxşı olar. Əks halda böyük futbola qayıdışın ancaq xəyallarda və yuxuda olacaq.

ABDULLA ISMAYILOĞLU