Tanınmış jurnalist: "Uduzan məşqçi necə davranırsa, elə də hərəkət edir"
Millimiz AÇ-2024-ün seçmə mərhələsində ilk qələbəsini qazandı. Canni de Byazinin komandası Estoniyanı səfərdə məğlub etdi.
Oyundan sonra italiyalı ilə jurnalistlər arasında anlaşılmazlıq yaşanıb. Baş məşqçi həmkarlarımızdan birinin sualına qəzəblənərək "siz qələbəyə sevinə bilmirsiz", - deyə bildirib. Görəsən, bundan sonra jurnalistlər italiyalıya sual verməyiblər, yoxsa De Byazi özü mətbuat konfransını tərk edib? Sualımızı Estoniyaya milli ilə birgə yollananlar arasında olan "Azerisport.com"un baş redaktoru Vüqar Zeynalova ünvanladıq. Tanınmış jurnalist "football-plus.az"a açıqlamasında bunları söylədi:
"Bu haqda çox danışmağın mənası yoxdu. Bir az mənimlə atışdı. Sualımı axıra kimi gözləmədi və öz sözünü dedi. Bu haqda da dünən mətbuat konfransı ilə bağlı balaca xəbərdə qeyd etmişik. Bu hadisədən sonra De Byaziyə sual verən olmadı. Yəni, özü getmədi. Gördü ki, sual verən yoxdu. Bu səbəbdən də konfrans otağını tərk etdi. Yəni dava olmadı. Sadəcə, mənlə atışdı. Bu gün də öz saytımızda hadisə ilə bağlı köşə yazmışam".
Ümumiyyətlə, son zamanlar italiyalı mütəxəssis çox aqressiv ifadələr işlədir. Azərbaycan futbolu ilə bağlı xoş olmayan açıqlamalar verir. Görəsən, bunun səbəbi nədi? Vüqar Zeynalov məsələyə belə münasibət bildirdi:
"Davranışlarının səbəbi komandanın uduzmasıdı. Bu haqda başqa nəsə deməyə gərək yoxdu. Uduzan məşqçi necə davranırsa, elə də hərəkət edir".
İLKİN SULTANLI
Digər xəbərlər
