AFFA-nın baş katibi Sərxan Hacıyev srağagün Tallində azərbaycanlı jurnalistlərin suallarını cavablayıb. Müsahibə ilə aşağı-yuxarı hamı tanışdı.

Bu yazıda media mənsublarının ünvanladığı suallara baş katibin verdiyi cavablardan ortalığa çıxan məqamları diqqətinizə çatdırmaq istəyirik.

Hacıyevə Canni de Byazi ilə bağlı bir-birinə oxşar sual verilib. Baş katib iki ilə yaxındı AFFA-da fəaliyyət göstərən funksioner olsa da, siyasəti yaxşı mənimsəyib. Əslində “mənimsəyib” demək düzgün çıxmır. Çünki o, 2009-cu ildən federasiyada Beynəlxalq Əlaqələr şöbəsində çalışıb. 2011-dən 2022-yə kimi isə bu departamentin rəhbəri olub. Deməli, Sərxan bəy baş katib olandan sonra 13 ildən artıq müddətdə əldə etdiyi biliklərdən yararlanır. Çünki onun italiyalı mütəxəssislə bağlı konkret dediyi nəsə yoxdu. Hamının bildiyi şeyləri cavab kimi bizə təqdim edir. Yəni De Byazi ilə bağlı qərarı yekunda AFFA İcraiyyə Komitəsi verəcək, onun qarşısına qrupda nə yaxşı, nə də pis nəticə əldə etmək tapşırığı qoyulub. Bir sözlə, çevir tatu, vur tatu! Hacıyevin sələfi Elxan Məmmədov da bu taktikadan istifadə edirdi. Lakin sabiq baş katibdən fərqli ictimayyətdə Sərxan bəyə simpatiya var. Ən azı 2022/23 mövsümündə premyer-liqanı bir komandanın tərk edəcəyi ilə bağlı verdiyi sözü tutdu. Bu da 36 yaşlı idarəçi üçün müsbət imic formalaşdırdı. Hacıyev indi bundan istifadə edərək mədəni şəkildə “futbol təsərrüfatında baş verən məsələlərə mən cavabdehəm, amma De Byazi ilə bağlı qərar bura daxil deyil” deməyə çalışır.

Elxan Məmmədov demişkən... Sərxan bəyə sabiq baş katib haqda çoxlu sual ünvanlanıb. Niyə oyuna gəlməyib? Onun təcrübəsindən yararlanırmı? Özbəkistandakı görüşdə Elxan Məmmədovla hansı istiqamətdə söhbətlər olub? Suallar aşağı-yuxarı bu mövzuda idi. Sərxan Hacıyev bu istiqamətdə olan söhbətlərdən yayınmır. Konkret və net cavablar verir. Məsələn, açıq-aşkar deyir ki, Özbəkistana Elxan Məmmədovla görüşməyə yox, Avropa və Asiya ölkələrinin futbol federasiyalarının toplatısına getmişdim. Sabiq baş katiblə də ayrıca görüşə ehtiyac olmayıb.

Bundan başqa, həmkarlarımızdan biri “Elxan müəllim bildirmişdi ki, mənim beynəlxalq təcrübəmdən faydalana bilərsiz. Sizin bu baxımdan ona hansısa müraciətiniz oldumu?”, - deyə sual ünvanlayır. Cavab qısa və net olur: “Xeyr, müraciət etmədim!”. Bir cümlə hər şeyi ifadə edir. Əslində Sərxan Hacıyevin beynəlxalq təcrübəsi Elxan Məmmədovdan daha çoxdu.

Yuxarıda qeyd etdiyimiz kimi, adam 11 il AFFA-nın beynəlxalq əlaqələr şöbəsinin rəhbəri olub. Nə üçün 2 ildi FIFA fəaliyyətə başlayan birinin təcrübəsindən yararlansın ki?!

İndiyə kimi yazdıqlarımızı qoyaq bir kənara! Sərxan Hacıyevin bir açıqlaması diqqətimizi xüsusi çəkdi: “Elxan Məmmədovun Estoniya ilə görüşə gəlməsi öncədən də nəzərdə tutulmayıb”.

Bu cümlə yeni başlanğıcın siqnalıdı. Sərxan Hacıyev bunun carçısı oldu. Artıq Azərbaycan futbolunda Elxan Məmmədov dövrü başa çatdı. Bu səbəbdən də onun millinin oyunlarına gəlməsinə ehtiyac yoxdu. Millimizin Estoniya ilə oyunundan öncə Sərxan Hacıyevın böyük sınağı oldu. Baş katib media mənsublarına gələcəkdə baş verəcək proseslərdən az da olsa, xəbər verdi. Ən azı dəqiqliklə deyə bilərik ki, bundan sonra Azərbaycan futbolunda nə baş versə, Elxan Məmmədov müdaxilə edə bilməyəcək...

İLKİN SULTANLI