Srağagünkü “Neftçi” – “Qarabağ” oyunundan sonra xoşagəlməz hadisə baş verib.

Belə ki, ağdamlıların müdafiəçisi Elvin Cəfərquliyevin polis şöbəsinə dəvət edilməsi ilə bağlı məlumat aldıq. Əvvəlcə xəbər yayıldı ki, hansısa azarkeş onun papağını götürərək qaçıb. Futbolçu da azarkeşə xəsarət yetirdiyi üçün polis şöbəsinə aparılıb. Məsələnin əslini öyrənməyə çalışdıq. “Qarabağ”ın mətbuat xidmətinin rəhbəri Anar Hacıyev bildirdi ki, həqiqətən də futbolçu ilə azarkeş arasında insident yaşanıb. Lakin Elvin polis şöbəsində dindirildikdən sonra evə buraxılıb. Hadisənin video görüntülərindən belə bəlli oldu ki, məsələ papaq davası deyil. İstənilən halda, “Qarabağ”ın müdafiəçisi azarkeşin hərəkətinə çox əsəbləşdiyi üçün kəskin reaksiya verib. Sonradan məlum oldu ki, həmin azarkeş futbolçunun çantasını oğurlamağa cəhd göstərib. Daha ətraflı məlumat üçün DİN-in açıqlamasını gözlədik. Qurumun mətbuat xidmətinin əməkdaşı Anar Qafarov sözlərinə görə, qarşılaşmadan sonra Cəfərquliyev çantasının oğurlanması ilə bağlı stadiondakı polis əməkdaşlarına məlumat verib. Yəni polis şöbəsinə aparılaraq dindirilən təkcə Elvin olmayıb. Polis əməkdaşları hadisəni törətmiş azarkeşi aşkar edərək çantanı sahibinə geri qaytarıblar. Həmin şəxsin hansı klubun azarkeşi olduğu bəlli deyil. DİN-in araşdırmaları davam etdiyi üçün onun barəsində yekun qərarın nə olduğunu da bilmirik.

Məsələyə başqa tərəfdən yanaşaq. Futbolun aparıcı idman növlərindən olduğu bir çox ölkələrdə klublar azarkeşləri üçün tez-tez görüşlər, imza günü təşkil edir. Azərbaycanda son vaxtlar bu istiqamətdə müəyyən irəliləyiş olsa da, futbolçuların, adətən, azarkeşlərdən uzaq qaçdıqlarını görürük. Xüsusilə azyaşlı azarkeşlər futbolçularla ünsiyyət imkanı tapdıqda onlarla normal davrana bilmədikləri üçün gərginlik yarana bilir. Bunun qarşısını almaq məqsədilə klublar azarkeşlərə daha isti yanaşa, müntəzəm görüşlər və imza mərasimləri təşkil edə bilər.

Sevindirici haldı ki, yığmanın bəzi üzvləri, eyni zamanda çempionatımızda forma geyən bəzi legionerlər azarkeşlərlə birbaşa ünsiyyətə can atır. Elə srağagünki “Neftçi” – “Qarabağ” oyunundan sonra komandasının məğlub olmasına baxmayaraq, kapitan Emin Mahmudov flaqmanın azarkeşləri olan tribunaya gedərək onların könlünü almağa çalışdı. Həmin tribunada “Forza Neftçi”nin üzvləri olmalıydı. Lakin təəssüf ki, məlum hadisə səbəbindən onlar ilk dəqiqələrindən stadionu tərk etmişdilər. Yuri Matias da azarkeşlərlə ünsiyyət baxımından diqqəti çəkən oyunçulardandı, qısa müddətdə “Neftçi” azarkeşlərinin könlünü fəth etməyi bacarıb. Bir sözlə, ölkəmizdə futbol mədəniyyəti fərqli səviyyəyə qalxmalıdı.

ADİL NƏHMƏTLİ