Ceydon Sançonun karyerasının “Mançester Yunayted” mərhələsinin davam edib-etməyəcəyini, yoxsa elə bu qış klubdan gedəcəyini heç kim bilmir.
"Football-plus.az" xəbər verir ki, hələ sentyabrın 14-də əsas komandadan uzaqlaşdırılan gənc yarımmüdafiəçi o vaxtdan bəri Erik ten Haqla barışmayıb. Bütün bu müddət ərzində münaqişə tarixçəsi yeni detallarla zəngniləşib, özü də bunların heç biri Sançonun xeyrinə deyil.

Komandadan tam təcrid olunub – təkbaşına yeyir və məşq edir
İş ondadı ki, əsas komandadan uzaqlaşdırılandan sonra Sançoya nəinki birgə məşqə çıxmaq, əsas komandaya məxsus olan bütün qurğulara, hətta paltardəyişmə otağı ilə yeməkxanaya da baş çəkmək yasaqdı. O, klub akademiyasının meydançalarında fərdi şəkildə məşq edir, əsas komandadan olan futbolçularla minimal səviyyədə münasibət qurmaq haqqına malikdi.

Sentyabrın 16-da Ceydon “Mançester Yunayted”in klub telekanalının kadrına düşüb – U-18 komandasının oyununa baxırmış. Daha bir maraqlı məqam budu ki, Sançonun indiki durumu yalnız Ten Haqın prinsipial mövqeyi ilə bağlı deyil. Məşqçilər korpusunun digər üzvləri də onun işə münasibətindən narazıdı. İndiki məqamda əsas komandaya qayıtmağın yeganə yolu baş məşqçi, personal və oyunçular önündə üzr istəməkdən keçir.

“The Mirror”dan Devid Makdonnelin bu məsələ ilə bağlı fikirləri maraqlıdı: “Sanço təkcə pis məşq etməklə kifayatlənməyib, elə bu mövsüm məşqlərə də müntəzəm gecikməklə məşqçilər korpusunun səbrini daşırıb”. Dortmund “Borussiya”sında mənbələri olan “BVB Newsblog” xəbər bloqu isə iddia edir ki, ingiltərəli futbolçu üçün intizam həmişə problem olub. Bundan da pis olan bəlası ehtiraslı videooyunlardan asılılığıdı. Sanço hədsiz az yatır, səhər saatlarına qədər “pleysteyşn” oynayır ki, bu da peşəkar futbolçu obrazı ilə heç cür uyğun gəlmir.

Mançester klubundakı bəzi qaynaqlar artıq vəziyyətin dalana dirəndiyini etiraf edir. Bu üzdən Peşəkar Futbolçular Assosiasiyası (PFA) da məsələyə qarışıb. Qurum Ten Haqla Sanço arasındakı münasiqəşinin həllində yardımını təklif edib. Hələ ki MY-nin bu təklifə razılıq verib-verməyəcəyi bilinmir.
Belə durumda Sançonun komanda yoldaşları da hansısa yolla sülhün əldə olunmasına çalışırlar. Markus Reşford, Harri Maquayr və Lük Şou Ceydona Ten Haqdan üzr istəməyi təklif edib.

Sanço nə ilə məşğuldu?
Ceydon MY akademiyasının oyunlarına baxmaqla yanaşı, iki dəfə də “üfüqdə görünüb”. “Mançester Yunayted”lə “Bavariya” arasında Çempionlar Liqasında keçirilən oyun zamanı o, kompüterdə futbol oynayırmış. “Tvitter”də bununla bağlı görüntülər də yer alıb. Sentyabrın 25-də isə “Leighx” nikini daşıyan 17 yaşlı oğlan sosial şəbəkəd skrinşot yerləşdirib. Həmin skrinşotdan onun kompüter oyununda Ceydonu 4:1 hesabıyla məğlub etdiyi görünür. Özü də gecə saat 3-də oynayırmışlar.

Personası ətrafında dolaşan söz-söhbətdən bezən Sanço srağagün “instaqram” hesabının fəaliyyətini dayandırıb – çox güman, qəzəbli şərhləri oxumaqdan yorulub.

Dünya futbolunun əsas insayderi Fabritsio Romano da bu mövzuda maraqlı fikirlər səsləndirib. Onun dediyinə görə, klubla futbolçu arasında münasibətlər gərgin olsa da, mümkün satışla bağlı hələ ki elə bir plan yoxdu: “İndiki məqamda heç bir konkretlik yoxdu. Bu üzdən hansısa klubun artıq Ceydon Sançonun transferi üzrə işə başladığını deyə bilmərəm. Yalnız onu deyə bilərəm ki, yayda və “transfer pəncərəsi”nin son günlərində “Borussiya”nın müəyyən marağı ilə bağlı şayiələr gəzirdi. Ancaq bildiyimə görə, artıq Almaniya klubunun planları dəyişib, başqa oyunçu axtarır. İngiltərə klublarına gəlincə, yanvar keçidi üçün zəmin hazırlamaq niyyəti ilə “Yunayted”ə zəng edən olmayıb. Biz hələ ki bu mərhələyə qədəm qoymamışıq. Mənə elə gəlir ki, Sançonun hansısa kluba transferi haqda danışmaq baxımından hələ çox tezdi”.

Morqan danışmasaydı, bağrı çatlayardı...
Kriştiano Ronaldodan aldığı müsahibə ilə İngiltərə futbolunu silkələyən Pirs Morqan da boş dayanmır. MY-nin pis günlərini arzulayan həmkarımız bu klubun istənilən çətin durumunda ortaya atılır və ilk növbədə baş məşqçini hədəfə alır. Britaniyalı jurnalist və teleaparıcı “Yunayted”in bəzi oyunçularının Sançoya klubdakı karyerasını xilas etmək üçün baş məşqçidən üzr istəməyi məsləhət görməsinə belə reaksiya verib: “Ten Haq öz oyunçularını alçaltmağı sevir. Eyni zamanda, onun özünün məşqçi səhvləri “Yunayted”i alçaltmaqdadı”.

Ten Haq daha onun adını çəkmir
Təbii ki, münaqişə tərəflərindən biri kimi Ten Haqın da fikirləri maraqlıdı. Ancaq niderlandlı mütəxəssis Sanço ilə bağlı suallara maksimal dərəcədə “quru” cavab verir. Hətta sentyabrın 15-də jurnalistlərin Ceydonla bağlı sualını cavablayarkən futbolçunun adını belə çəkməyib. Ertəsi gün “Sanço bir də nə vaxtsa MY-də oynayacaqmı” sualına isə belə cavab verib: “Bilmirəm. İndiki məqamdə o bizim üçün vacib deyil, ona görə ki, komandaya fayda verə bilmir”.

Bir daha xatırladaq ki, Ten Haq cari mövsümün ilk üç oyununda Ceydona əsasən sonradan meydana buraxmaqla şans versə də, sentyabrın 3-də, yəni “Arsenal”la səfər oyununda (1:3) adını sifariş ərizəsinə salmayıb. Baş məşqçi 23 yaşlı futbolçunu məşqlərdə lazımınca çalışmamaqda suçlayıb (“MY-də səviyyəni hər gün göstərmək lazımdı”), Sanço isə sosial şəbəkə hesabında niderlandlının yalan danışdığını yazıb: “Uzun müddət qurbanlıq qoyun olmuşam - ədalətsizlikdi. Məşqlərdə can qoymuşam, oxuduğuz hər şeyə inanmayın. Əminəm ki, başqa səbəblər var”.