“Mançester Yunayted”in yalnız meydanda əziyyət çəkdiyini düşünürsüzsə, ciddi şəkildə yanılırsız. Kriştiano Ronaldo hələ ki heç yana getməyib və bu anlaşılmazlığı aradan qaldırmaq istəyir.
Bir neçə gün əvvələ qədər Erik ten Haqın Kriştianonu komandada saxlamaq istəyi ilə bağlı xəbərlərin sayı-hesabı yox idisə, deyəsən, vəziyyət dəyişib. “The Athletic”ə inansaq, məşqçi korpusu portuqaliyalıdan qurtulmağa hazırdı. “The Times” isə əlavə edir ki, əsas səbəb Ten Haqın oyun sisteminə uyğunlaşmaqla bağlı problem deyil, komandadakı atmosferdi. Ronaldonun qapalılığı qalan oyunçuları özündən çıxarır. “Sky Sports” yazır ki, klubda Kriştianonun komandaya və oyundaşlarına münasibətində hansısa dəyişiklik görmək istəyirlər. Bu baş verməsə, MY hətta forvardla müqaviləni pozmaq imkanını nəzərdən keçirə bilər.
Bu yöndə xəbərlərin sayı o qədər artdı ki, MY-nin mətbuat xidməti rəsmi şəkildə cavab verməli oldu: klub müqavilənin pozulması haqda xəbəri təkzib etdi və Krişin satılmadığını bildirdi.
Ronaldo oyundaşlarından ayrılıb və pressinq bacarmır
• Ronaldonun fanatlarla münasibətləri qaydasında deyil. Və söhbət təkcə autizmli oğlanın telefonunun sınması ilə bağlı köhnə əhvalatdan getmir – “Brentford”la oyunda Kriştianodan qonaq azarkeşlərin tribunasına yaxınlaşıb üzr istəməyi xahiş etsələr də, o, əlini yellədi və getdi.
• Deyilənə görə, Kriştiano tək yeyir, komanda iclaslarında oyundaşlarından maksimal dərəcədə kənar durmağa çalışır, hətta portuqaliyalılarla da ünsiyyət qurmur. Bu isə çoxlarının xoşuna gəlmir – belə hesab edirlər ki, Ronaldo hədsiz eqoistdi, onlarla danışası nüfuzlu kapitan yoxdu.
• Daha bir insaydda deyilir ki, Ronaldo məşqlərdə daim Ten Haqla mübahisə edir. Ancaq ona görə ki, pressinq etmək istəmir. Bu məqam baş məşqçini qıcıqlandırır, axı o, əvvəllər Kriştiano ilə dil dapa biləcəyini düşünürdü.
• Yəqin Ten Haqın “Brentford” önündəki darmadağından sonra əl atdığı orijinal cəza – istirahət əvəzinə məşq bazasında 13,8 km kross – haqda eşitmisiz. “The Athletic” yazır ki, Kriş də məsafəni tam qaçıb, tənbəllik etməyib.
Onu kim əvəz edə bilər?
Yeni hücumçu tapmaq da bir başqa problemdi. Demək olar ki, bazarda yaxşı variantlar yoxdu. Ten Haq da hadisələri qabaqlamağa çalışmır. Niderlandlı hələ də Antoni Marsyal ilə Markus Reşforda inanır, bundan başqa, Ceydon Sançonun tərəqqi edəcəyini də gözləyir. Baş məşqçi anlayır ki, komandasına təcili meydanın mərkəzində yaxşı oyunçular lazımdı. Odu ki, yeni forvardın axtarışı aktual məsələ olsa da, ilk prioritet deyil.
Hər halda, Ronaldonun mümkün gedişi planları ciddi şəkildə dəyişir. Onun yoxluğunda MY-də nominal mərkəz hücumçusu qalmır.
• MY başı bəlalar çəkən Alvaro Moratanı nəzərdən keçirir. “Atletiko” ispaniyalını 35 milyon avroya verməyə hazırdı və bazarlıq etməyəcək. Alvaro yenidən İngiltərədə oynamağın əleyhinə olmasa da, Simeone ilə yaxşı münasibətlər üzündən komandadan getmək eşqi ilə alışıb-yanmır.
• Ten Haq “Real”ın daha bir yetirməsini – “Espanyol”un forvardı Raul de Toması da bəyənir. O, yayboyu getmək istəyir, ancaq doğma “Real”la bağlı variant alınmadı. 27 yaşlı Raul indiyə qədər top-klubların heç birində özünü göstərməyib.
• Daha bir variant 35 yaşlı Ceymi Vardidi. Mançester klubunda əfsanəvi ingiltərəlini almaqla bağlı düşünsələr də, “Lester” onu buraxmaq fikrində deyil.
• Real, ancaq ləğv olunan variant – “Bolonya”dan 33 yaşlı Marko Arnautoviç. Onun xidmətində şəxsən Ten Haq maraqlı idi, MY İtaliya klubuna 9 milyon avro təklif etmişdi. “Bolonya” ilk təklifi rədd etdi, mançesterli azarkeşlərin reaksiyasından (bu haqda qəzetimizin ötən saylarında yazmışıq) sonra MY mümkün sövdələşmədən əl çəkdi.
“Yunayted” hazırda “Barsa”dan Frenki de Yonqu cəlb etmək üzərində də çalışır. Bəlkə elə o gəlsin?..
Səbəbkardan sitat