Albaniya "Eqnatiya"sında çıxış edən Vüsal İsgəndərli dünən 6-cı turun "Vlajniya" ilə səfər matçında komandasının ilk qolunu vurub.

Oyun həmyerlimizin şərəfini qoruduğu kollektivin qələbəsi ilə bitib - 2:0. Elə dünən gec saatlarda 27 yaşlı hücumçu "Football-plus.az"ın bəzi suallarını cavabladı.

- Artıq çempionatda 2-ci oyundu fərqlənirsən. Təəssüratların maraqlıdı...
- Vurduğum qolla komandamın qələbə qazanmasında pay sahibi olduğuma görə xoşbəxtəm. Qol və məhsuldar ötürmə mənə əlavə motivasiya verir. İnanıram ki, bundan sonra daha çox qol və ötürmə sayəsində komandama xeyir verəcəm. Hazırda çempionatda birinci yerdə gedirik. Bu tempi saxlamaq istəyirik.

- Komandaya qoşulandan bir neçə gün sonra avrokubok oyununa çıxdın.
- Deyərdim ki, "Eqnatiya"ya qoşulanda məşq keçməyə vaxtım olmadı. 4 gün sonra da avrokubok oyununa çıxdım. Hazır deyildim və mənim üçün çətin idi. Ancaq sonra əlavə məşqlər hesabına özümü çempionata hazırladım. Ölkə xaricində ikinci dəfə çıxış edirəm. Bu fürsəti yaxşı dəyərləndirmək istəyirəm.

- Komandan hazırda çempionatda 13 xalla vahid liderdi. Mövsümü qızıl medalla bitirəcəyinizə inanırsız?
- Əlbəttə, inanırıq. Çünki çox yaxşı kollektivimiz var.

- Çempionatda sizin üçün ən çətin rəqib hansıdı?
- Sizə açıq deyim. Mən ilk dəfə Türkiyəyə legioner həyatı yaşamağa gedəndə problemim olmadı. Çünki o liqanı izləyirdim. Gedəndə də rahat, tez uyğunlaşdım. Bizdən də xaricə futbolçu yollananda çətin tərəfi liqanı tanımamasıdı. İndi də mən Albaniyada futbolçuları, rəqib komandaları tanımıram. 15-20-ci dəqiqədən sonra oyunçuları təhlil edirəm ki, bu nəyə qadirdi və ona qarşı necə mübarizə aparmaq olar. Mənə problem yaradan da budu. Çempionatda çıxış edən bütün rəqiblərimiz də sona kimi mübarizə aparır. Çempionat asan keçmir. Ancaq mənə görə ən güclü rəqib özümüzük. Elə özümüzə ən böyük rəqib də bizik. Uşaqlarla söhbət edəndə deyirik ki, biz bir olsaq, bu liqada rahat mübarizə aparacağıq.

- Sənlə daha əvvəl danışdanda demişdin ki, Albaniyadan da yaxşı çempiona getmək istəyirəm. Belə özünəinam müsbət haldı...
- Mən bura gələndə qarşıma qoyduğum hədəf yaxşı adla "Eqnatiya"nı tərk eləməkdi. Yəni komandama çempionluq yaşatmaq, avrokuboklara aparmaq, uğurlarında pay sahibi olmaq istəyirəm. Həm maddi, həm də mənəvi cəhətdən bu komandaya dəstək olub getmək istəyirəm. Çünki bu klubun prezidenti, idman direktoru, futbolçuları mənə çox dəstək olur. Bunları heç vaxt unutmaram. İnsan dəstək gördüyü yerdə daha özünəinamlı olur, komandaya can yandırır. İnşallah, arzularıma da çataram.

- Hazırda yaxşı çıxış edirsən. Bu qədər çalışırsan, lakin qarşılığında yığmaya dəvət almamağın sənə psixoloji təsir göstərirmi?
- Əlbəttə, adamın pisinə gəlir. Bu dəqiqə yanımda olan Latviya yığmasının üzvü ötən dəfə Slovakiyaya, Montenoqroya qol vurdu. Mənə deyir ki, sizin millinin statistikasına baxıram, nə qədər oynamayan oyunçular var. Bunu özümdən demirəm. Məqsədim də odu ki, yaxşı formada olduğum müddətdə milliyə kömək edim. Bu, hər kəs kimi mənim də haqqımdı. Mənim də pasportumda azərbaycanlı yazılıb. İstəyirəm ki, yığmaya cəlb olunum və xeyir verim. İndi öz işimi görürəm. İnanıram ki, milliyə dəvət alacam. Bilmirəm milliyə yollanmağımın qarşısını kəsən nədi. Ancaq çalışıram. Allah böyükdü.

CAVİD ƏLİYEV