“Bəli, Murad Musayevin haqqımızda səsləndirdiyi fikirlərdən xəbərim var. Sözün açığı, ilk dəfə eşidəndə həmin sözlər mənə çox qəribə gəldi. Çətin olsa da, emosiyalarımı cilovlayıb obyektiv olmağa çalışacam. Öncəliklə komandam zəif oyun göstərəndə günahı şəxsən özümdə axtarıram. Məğlub oluruqsa və ya futbolçular yaxşı çıxış etmirsə, ilk işim matçı təhlil etmək olur. Harda səhv etdiyimi araşdırıram. Murad Musayev komandamın əvvəldən sona qədər çəkdiyi əziyyətə kölgə salmaq niyyətindədisə, bu düzgün, peşəkarlığa yaraşan hərəkət deyil. Məncə, elə böyük büdcəsi, bahalı transferləri və güclü futbolçuları olan klub hansısa açıqlamalarla özünü “sığortalamasa” daha yaxşı olar. Uğursuz oyunun günahkarını başqa yerdə axtarmaq lazım deyil. Futbolçuların yıxılmasına gəlincə, bunu təkzib etməyəcəm. Hər şey göz qabağında baş verdi. Xatırladığım qədəriylə Kamran (qapıçı – red.) üç dəfə yerdə qaldı. Bunun səbəbi “Sabah” futbolçularının kobud oyunu idi. Qapıçımıza qarşı elə sərt davrandılar ki, hakim birbaşa həkimi meydana çağırmaq məcburiyyətində qaldı. Mən buna görə rəqibi qınamıram. Onlar fiziki cəhətdən yaxşı vəziyyətdədi və çox sürətli oyun göstərir. Futbolda belə şeylər normaldı. Oyunçularımdan birinin isə gözünə ot qırıntısı düşmüşdü. Mən də, hakim də bunun şahidi oldu və vaxt verdi ki, futbolçu özünə gəlsin. Elçinlə Xvalkonun isə ayaqları qıc olmuşdu. Bu, tam təbii haldı və hər adamın başına gələ bilər. Allah qorusun, meydanda yox, dənizdə üzərkən də belə halla üzləşib boğula bilərsən. Həmin anda insan nə etməlidi? Təbii ki, dayanmalı və qıcolmanın aradan qalxmasını gözləməlidi. Nə mənim, nə də komandamın süni davranışlarla aram var... Sağlam mübarizə tərəfdarıyam və futbolçularımdan da həmişə bunu tələb etmişəm. Matçda hansısa uyğunsuz halların qəsdən yaşanmasının qəti əleyhinəyəm. Düşünürəm ki, əziyyətlə, sözün həqiqi mənasında qan-tər axıdaraq qazandığımız 1 xala heç kimin kölgə salmaq haqqı yoxdu. Yenə deyirəm, kimsə belə şeyləri qabardaraq özünü “sığortalamasın”.