Misli premyer-liqasının 7-ci turuna yekun vurulub.

"Football-plus.az" xəbər verir ki, "Qəbələ" "Qarabağ"a uduzub - 1:2. Matçdan sonra "qırmızı-qaralar"ın baş məşqçisi Elmar Baxşıyevin mətbuat konfransı keçirilib. Sizi onun fikirləri ilə tanış edirik:

- Gilad Abramovun sol cinahda oynaması səhv seçim deyildi?
- Yox. Bizim qollar Abramovun orada olmağına görə deyildi. İlk qolda Lukas Afriko topu itirdi. Məşqlərdə daha yaxşı olduğu üçün ona şans verdik. Zurab Oçiqava uzun müddətdi ki, oynamır. Onu da optimal formaya gətirmək lazımdı. Qarşıdakı oyunlarda daha çox şans verəcəyik.

- Kevin Medinanın qırmızı aldığı epizodu necə şərh edərdiniz?
- Meydanda bir-birinə layiq iki komanda var idi. Bu gün rəqibdən səviyyəcə aşağı oynamadıq. İnsidentdi. Oyunda olan elementdi. Çox şişirtmək lazım deyil. Futbola rəng qatan epizoddu.

- İki oyundu ki, köməkçiləriniz qırmızı vərəqə görür. Bunun səbəbi nədi?
- Hamı tək mənim köməkçilərimi görür. Onlar da oyunun içindədi. Bu gün Qurban Qurbanov da qırmızı vərəqə aldı. O da emosiyalarını cilovlaya bilmədi. Belə şeylər futbolda olur.

- Köməkçilərinizlə intizamla bağlı söhbət edirsiz? Hakimlərin "Qəbələ"yə qərəzi var?
- Heç kimin qərəzini hiss etmirik. Məşqçilərlə həmişə əlaqədə oluruq. Biz o məşqçilərdən deyilik ki, oturub oyuna sakit baxaq.

- Zurab Oçiqavanın oyunundan razı qaldız?
- Hələ əsl Oçiqava deyil. Getdikcə daha yaxşı səviyyəyə gələcək. Mən onun hazır olmağını istəyirəm. Universal oyunçudu. Müdafiənin mərkəzində və solunda oynaya bilir.