“Qarabağ”ın “Molde” ilə oyunu ətrafında yaşananları izləmək üçün hakimin start fitindən xeyli əvvəl “Bəhramov”un yolunu tutdum.

Düzdü, arena tam dolmadı, amma fanatların həvəsli olduğunu görmək çətin deyildi. Azarkeşlərdən bir çoxunun stadionun ərazisində yerləşən köşklərdən yemək, su, “fan-şop”dan isə sevimli komandalarının formasını aldıqlarını görürdük. Maraq üçün yemək və geyim satılan yerlərə yaxınlaşaraq qiymətlərdən xəbər tutdum. Hər köşkün özünə uyğun qiymət seçimi var idi. Məsələn, yaxınlaşdığımız iki köşkü müqayisə edək. Birində 300 qramlıq “kola”, o birində isə yarım litrlik “kola” 2 manata idi. Ümumiyyətlə, köşklərdə “çipsi”lərin kiçiyi 3, böyüyü 4 manata, 250 qramlıq “Bizon” 2 manata, sendviçlər 4, dəmir qabda olan “Sprite” və “Fanta” 2, “Xırdalan”ın yarım litri 4, qazlı və qazsız yarım letrlik sular isə 1 manata satılırdı.

“Fan-şop”da qiymətlərlə maraqlananda mənə ən bahalı və orijinal formanın 100 manata olduğunu dedilər. İndiyə kimi qeyd etdiklərim arenanın kənarına aid idi. İndi isə sizə stadionun daxilində yaşananlar barədə məlumat vermək istəyirəm. “Qarabağ”ın prezidenti Tahir Gözəl, direktoru Əmrah Çəlikəl və baş menecer Asif Əsgərovun arenanın qaçış zolağında gəzdiyini gördük. “Molde”nin futbolçuları məşq zamanı bir yerə toplaşaraq “qələbə andı içdilər”. Sonradan bəlli olduğu kimi, bu and boşunaymış. “Köhlən atlar”ın ən fəal azarkeş qrupu olan “İmarət Tayfa” Ermənistanın baş naziri Nikol Paşinyanın ünvanına “Suka Paşinyan” şüarını səsləndirdi.

Matç başlamamış Mərakeşdə baş verən zəlzələnin Liviyadakı sel fəlakətinin qurbanlarının xatirəsinin birdəqiqəlik sükutla yad olunması istənilsə də, “İmarət Tayfa” bu sükutu “Şəhidlər ölməz, vətən bölünməz” şüarı ilə pozdu. Oyundan bir gün əvvəl stadionun işçiləri bizə ot örtüyünün yaxşı vəziyyətdə olduğunu desələr də, bəzi yerlərdə çöküntülərin olduğunu gördük. Bu qarşılaşmanı Ağdam təmsilçisinin sabiq kapitanı, hazırda “Zirə”yə rəhbərlik edən Rəşad Sadıqov və 53 yaşlı veteran voleybolçu Alla Həsənova da izləyirdi.

Bəzən say heç də əsas amil olmur. Dolmayan tribunalardakı ab-havanın möhtəşəm olmasını nəzərdə tuturam. Elə azarkeşlərin bu dəstəyini də Qurban Qurbanov və futbolçuları hədiyyəsiz qoymadı, meydanı 3 xalla tərk etdi. “Molde”nin futbolçularının məğlubiyyətdən sonra paltardəyişmə otağına gedərkən əsəbi olduğu aşkar görünürdü. Onlardan biri dəhlizdə qoyulan su qapını təpikləməyi də lazım bildi.

CAVİD ƏLİYEV