Futzal yığmamız sabah, saat 18.30-da DÇ-2024-ün elit mərhələ oyununda Bakıda Niderlandla üz-üzə gələcək.

İlk matçda Rumıniyaya 1:3 uduzan komandanın, demək olar ki, qələbədən başqa yolu yoxdu.
Millimizin baş məşqçisi Vitali Borisov matçdan öncə “Football-plus.az”a müsahibə verdi.

- Oyuna bir gün qaldı. Qazaxıstanın 2:0 hesabıyla məğlub etdiyi Niderlandla görüşəcəksiz. Komandanın durumu necədi?
- Rəqibi təhlil etmişik, meydanda nə edəcəyimizi bilirik. Hər şey qaydasındadı. Şükür Allaha, zədəlimiz yoxdu. Hazırlıq davam edir. Əlimizdən gələni edəcəyik ki, qələbə qazanacaq. Məğlub olsaq, qrupdakı vəziyyətimizin pisləşəcəyini dərk edirik. İnanıram ki, oyunçular sona qədər mübarizə aparacaq.

- İsa Atayev heyətdən uzaqlaşdırıldı. Səbəb nədi?
- Konkret bir şey demək mümkün deyil. Hər dəyişikliyin xüsusi səbəbi olmur. Kimlərinsə məşqçilər heyətinin qərarlarında qərəz, xoşagəlməz şeylər axtarması düzgün deyil. Böyük futbolda da belə hallara rast gəlinir. Bu dəfə onu Maneka əvəzləyəcək.

- Düşünürsüz ki, Maneka komandaya İsadan daha faydalı olacaq?
- Yox. Amma hər şey ola bilər. Düşündük ki, bu dəfə onu sınayaq. Gələn dəfə başqa dəyişikliklər də edə bilərik. Bu futzalın bir hissəsidi. Xüsusilə belə vacib matçlarda heyəti diqqətlə formalaşdırmalıyıq.

- “Araz-Naxçıvan”ın Çempionlar Liqası oyunlarında başverənlər üzündən İsa Atayevlə Xətai Bağırov şiddətli töhmət aldı. Bəlkə İsanın heyətdən kənarlaşdırılmasın məhz o matçlarda yaşananların payı var?
- İsa ilə Xətainin töhmət aldığını sizdən öyrəndim (gülür). Əsla, belə deyil. Klubla yığma arasında fərq var. İnanın ki, İsa səbəbsiz kənarlaşdırılıb.

- Rumıniyayla matçda millimizin kapitanı Emin Kürdova, ümumiyyətlə, şans vermədiz. Rövşən Hüseynli isə 3 qol buraxdı. Bu dəfə qapını kimə əmanət edəcəksiz?
- Emin və Rövşən eynisəviyyəli futzalçılardı. Rövşənin 3 qol buraxması o demək deyil ki, şans verilməyəcək. Hələ qapını kimin qoruyacağını bilmirik.

- Maraqlıdı, Emin Kürdova Rumıniya ilə matçda niyə şans verilmədi? Kapitan bizimlə söhbətdə özünü heç vaxt olmadığı qədər yaxşı hiss etdiyini bildirmişdi. Yəqin ki, bunu sizə də deyib...
- Yenə deyirəm, məncə, Rövşən Emindən geri qalmır. Təəssüf ki, o ancaq uğursuzluq yaşayanda hər kəsin yadına düşür, amma çox az sayda media orqanı Rövşənin nailiyyətlərini işıqlandırıb. Mən hər ikisinə güvənirəm.

KƏNAN BAHADIR