“Belə hadisələrinin səbəbi cəzasızlıq şəraitidi. Azərbaycan istənilən idman yarışında dəyərlərinə və qonaqpərvərliyinə görə seçilsə də, belə haqsızlıqlara məruz qalır. UEFA Ermənistanı cəzalandırmalıdı. Ən azı bir oyunu azarkeşsiz keçirsinlər. Məncə, ciddi tədbir görülməsə, təxribatlar artacaq. Vaxtilə “İmarət” olaraq, bu yöndə fəal çıxış edirdik. Məsələn, “Qarabağ” – “Brügge” matçına görə ölkəmizə gələn belçikalılara Qarabağ haqda geniş məlumat vermiş, birlikdə Şəhidlər Xiyabanını ziyarət etmişdik. Tərəfdarlar Ağdamın işğal edildiyini bizdən öyrənmişdi (matç 2011-ci ildə keçirilib – red.). 2016-cı ildə Qarabağda şəhid olan polkovnik-leytenant Raquf Orucov üçün də layihəmiz oldu. Erməni təxribatıyla şəhid olan Zəhra balamız üçün 2017-ci ildə baş tutan "Qarabağ"- "Samtredia" oyununda plakat açmaq istəmişdik. Polislər oyunda buna icazə verməsə də, hər kəs stadionu tərk etdikdən sonra plakatı açıb şəkillər çəkdirdik. “Xankəndini vur!” həştəqini də ölkədə ilk dəfə “İmarət” trend edib. Son vaxtlar gənclər komandaya dəstək verməyə köklənir. Belə mövzular diqqətdən kənarda qalır. Əslində buna ehtiyac olub-olmaması ayrı mövzudu. Şükür Allaha, dövlətimiz sözünü deyir. Əvvəllər bu yöndə belə aktivlik yox idi. İndi ictimai birliklər də mövzuları diqqətə saxladığından azarkeşlərin yükü xeyli azalıb. Onu da deyim ki, biz belə layihələrlə çıxış edərkən çox maneələrlə rastlaşırdıq. Hüquq-mühafizə orqanları müdaxilə edirdi. Bəlkə indi də uşaqlar nəsə edir, amma işıqlanmasına imkan verilmir”.

“Məhz millilərin matçında üçüncü bayraq olmamalıdı. Türkiyə bunun bariz nümunəsidi. Qardaş ölkə olsaq belə, çərçivədən kənara çıxmaq istəmədi. Təbii ki, haqlıdı. Ermənistanın təxribatına gəlincə, bir neçə oyunda azarkeşsiz meydana çıxsalar, ağılları başlarına gələr. Yenə alınmasa, ciddi cəza labüddü. Ümumiyyətlə, belə təxribatlara uymamaq tərəfdarıyam. Bayraqlarımız tribunalarda tez-tez görünür. Millimizin oyunlarında buna daha çox rast gəlirik. Bunu etmək ən gözəl cavabdı. “Qarabağ Azərbaycandı” şüarını bütün dünya təsdiqləyibsə, başqa sözə ehtiyac yoxdu. Ermənilər etdiklərini təkrarlamağımızı istəyir. Hər cavabımızı toplayıb ictimailəşdirirlər. Niyyət bizi qınaq obyektinə çevirməkdi. Millətimiz və dövlətimiz onların cavabını layiqincə verib. AFFA da mövzuya ciddi yanaşsa, qarşı tərəf cəzasını ala bilər. Bu yaxınlarda Asif Əsgərov da “Qarabağ”ın təmsilçisi kimi Avropa Klublar Birliyinin idarə heyətinə sədr seçildi. O da irəliləyən zamanda təbliğat işləri görə bilər Hər halda, təsir gücü artdı. Ümumiyyətlə, rəsmi addımlara üstünlük verilməlidi. Qeyri-rəsmi hərəkətlər heç kimə ciddi fayda verməyəcək”.