Xəbər verdiyimiz kimi, “Zirə” minifutbol komandası Rumıniyanın Oradea şəhərində keçirilən Çempionlar Liqasında 3-cü yeri tutub.

Azərbaycan təmsilçisi yerli AEK ilə bürünc medal uğrunda görüşdən qalib ayrılıb – 5:1. Komandanın baş məşqçisi Elşad Quliyev turnir bitəndən sonra “Football-plus.az”ın suallarını cavabladı.

- Debüt mövsümünüzdə 3-cü olduz. Bu necə hissdi?
- Mənə görə əla nəticə qazandıq. Sadəcə, turnir tam yüksək səviyyədə təşkil olunmamışdı. Klublar üçün normal yarış idi. Dünya və Avropa çempionatındakı ab-hava tam başqa olur. Bir də hər gün iki oyun keçirməyimiz uşaqlar üçün çətinlik yaradırdı. Günə bir matç olsaydı, daha yaxşı olardı. Yorğunluq özünü göstərirdi. Bizim heyətin yaşlılardan və gənclərdən ibarət olması, fiziki cəhətdən güclü olması, cəld, sürətli və dinamik oyun göstərməsi başqalarından üstün cəhtlərimiz idi.

- Bəs avropalılardan nədə geri qalırdıq?
- Təcrübədə. Bizim üçün yeni turnir idi. Heyətimizin 60-70 faizi beynəlxaq oyunlar görməyən uşaqlardı. Buna baxmayaraq, oyunçularım əla mübarizə apardı.

- Turnirdən əvvəl hədəfləriniz nə idi?
- Əsas hədəfimiz qrupdan çıxmaq idi. Əlbəttə, medal qazanmaq niyyətimiz də var idi. Finala çıxmaq üçün şansımız da oldu. Təəssüf ki, təcrübəsizlik imkan vermədi.

- Komandanın gələcək hədəfləri nədi?
- Noyabrın 15-də çempionat başlayır. Hədəfimiz liqada çempion olub, yenidən ÇL-də iştirak etməkdi. Ötən il Avropa çempionu olmasaydıq, bulki yarışda uğur qazana bilməzdik. Bildiyiniz kimi, mən həm də millini çalışdırıram. Qarşıdan dünya çempionatı gəldiyi üçün sentyabrın 23-də yığma ilə birlikdə Antalyaya gedəcəyik. Buna görə də klubu köməkçi məşqçi hazırlaşdıracaq.

-Yeni transferlər gözlənilir?
- İstəyərdik ki, heyətə bir-iki oyunçu da qataq. Amma komandanın 90 faiz heyətini saxlamaq istəyirik. Hazırkı heyət də çox yaxşıdı.

CAVİD ƏLİYEV