“Football-plus.az” xəbər verir ki, İtaliya yığması ilə DÇ-2006-nın qalibi olan sabiq hücumçu “Yuventus”un rəsmi saytına müsahibə verib. 46 yaşlı Toni əsasən indi A seriyasında oynayan hücumçularla bağlı verilən sualları cavablayıb.

- Hazırda A seriyasında ən güclü hücumçu kimdi?
- Birmənalı şəkildə ən yaxşısı Osimhendi. O, indi İtaliyada “1 nömrə”di. Məhz ona görə “Napoli”ni bu mövsüm skudetto uğrunda mübarizədə əsas favorit sayıram.

- Bəs Vlahoviç haqda nə düşünürsən?
- Bu dəfə bütün işlərinin qaydasında olacağına əminəm. Duşan mövsümə əla başlayıb. O, böyük potensiala və daha da inkişaf etmək üçün ehtiyata malikdi. Mövsümün ilk oyunlarını əla keçirib və böyük sıçrayışa nail ola bilər. Ötən mövsüm zədələr ona çox mane oldu. Amma indi vəziyyət qaydasındadı. “Yuve” Duşanı komandada saxlamaqla doğru qərar verdi.

- Vlahoviçdən başqa Kyeza da bir sıra klubların maraq dairəsinə düşmüşdü. Bu oyunçular komandanı zirvəyə qaytarmağa qadirdilər?
- “Yuventus”un başqa ölkələrin klublarına “yox” deməsi məni çox sevindirir. Vlahoviçlə Kyeza gəncdi, amma çox güclü oyunçulardı. Onlar bir sıra problemlərə görə çox ağır keçən mövsümdən sonra “Yuve”nin aparıcı oyunçuları olduqlarını sübut etmək istəyirlər. Bu futbolçular uğur qazanmaq və Alleqrinin komandasının lideri olmaq üçün hər cür keyfiyyətə malikdilər.

- “Yuve” bu mövsüm skudetto uğrunda mübarizə apara bilər?
- Avrokuboklarda oynamamaq komanda üçün çempionluq yarışında böyük üstünlük ola bilər. İndi transfer dövrünün son günlərində nə baş verəcəyinə diqqət yetirmək lazımdı. Çünki mənə elə gəlir ki, böyük klublar “transfer pəncərəsi” bağlanmazdan əvvəl də bir-iki oyunçu alacaqlar.

- Lukakunun “Yuventus”a keçmək şansı var idi, amma “Roma” ilə müqavilə bağladı. Bu keçid A seriyasında balansa nə dərəcədə təsir edəcək?
- “Roma” Lukaku ilə daha güclü olacaq. Mənə elə gəlir ki, Dibala ilə əla duet təşkil edəcəklər: onlar xarakteristikasına görə bir-birini yaxşı tamamlayırlar. Yeni mövsüm “Roma” üçün heç də yaxşı başlamayıb. Amma “Böyük Roma”nın gəlişi komandanın həm də istək və ambisiyalar planında əhəmiyyətli sıçrayış etməsinə şərait yarada bilər.

- 38 yaşında A seriyasının ən yaxşı bombardiri olmusan. Bu mövsüm Jiru sənin rekordunu yeniləyə bilər.
- Olivye hər yaşda qol vuracaq səviyyədə olan klassik hücumçudu. O, cərimə meydançasında düzgün mövqe tutmağı bacarır. Qapı qarşısında çox təhlükəlidi. Bu mövsüm də kifayət qədər qol vuracaq. Buna görə də Jiru mənim rekordumu təkrarlaya bilər. Ona bu planda da uğur diləyirəm.

- “İnter”lə bağlı vəziyyət isə bir qədər anlaşılan deyil...
- Komanda kağız üzərində Ceko və Lukakunun gedişi ilə kifayət qədər qoldan məhrum olub. “İnter”in rəqabətədavamlılığı Arnautoviç, Türam və Sançesin komandaya necə uyğunlaşacağından asılı olacaq. Mənə elə gəlir ki, rəhbərlik Lukakunun geri qayıdacağı düşüncəsi ilə Cekonu erkən buraxdı. Əks halda Edini saxlamaq zəruri olacaqdı.

- İtaliya futbolunda son illər nə üçün yüksək səviyyəli hücumçular yetişmir?
- Hazırda əksər klubların gənclərdən ibarət komandasında italiyalı oyunçuların sayı azdı. İstedadları yetişdirmək çətindi. Gənc oyunçunu ölkə xaricindən gətirmək həmişə asan və effektli görünür. İndi milli komanda üçün “9 nömrə” tapmaq çox çətindi. Mən Skamakkaya üstünlük verirəm, onun oyunu çox xoşuma gəlir. “Atalanta”da Qasperini kimi məşqçinin rəhbərliyi altında oynamaqla daha da inkişaf edəcək. Qasperini hücumçulardan effektiv şəkildə istifadə etməyi bacarır. Skamakkanın onun sayəsində irəli gedəcəyinə ümid edirəm.

- Ötən bazar günü fentezi-futbola həsr edilən tədbirə dəvət almışdın. Hücumçulardan kimə üstünlük verirsən?
- Osimhenə görə ağlımı itirirəm. Amma o, həddən artıq baha qiymətə olanda Vlahoviçi seçirəm. 2022/23 onun mövsümü olacaq.