2023/24 mövsümündə çempionluğa iddialı olan “Sabah” bazar ertəsi heyətini daha bir futbolçu ilə gücləndirdi. Ayaz Quliyev bu kluba transfer olundu. Yarımmüdafiəçi ilə 3 illik müqavilə imzalandı.

Əslində Ayazın Azərbaycana gəlişi çoxdan gözlənilirdi. 26 yaşlı futbolçu ilə “Neftçi” yaxından maraqlanırdı. Hətta flaqmanın iyulda Rusiyada keçdiyi təlim-məşq toplanışı zaman futbolçu düşərgədə olub. Lakin sonradan “Ximki”nin tələbi ilə Ayaz geri qayıtmalı olub. Cəmi bir ay sonra futbolçunu “Sabah”a keçidi yarımmüdafiəçinin flaqmana transfer olunmamasının səbəbini aydınlaşdırır. Çox güman, “bayquşlar” Ayaz üçün Rusiya klubuna daha çox pul təklif edib. Bu səbəbdən şimal qonşularımız yarımmüdafiəçini satıb. Məşhur “transfermarkt” portalında oyunçunun “Sabah”a 400 min avroya keçdiyi qeyd olunub. Həqiqətən böyük məbləğdi. İnformasiyanın dəqiq olub-olmadığını isə “Ximki” və “Sabah” rəhbərləri daha yaxşı bilir. Bakı təmsilçisinə məsələ ilə bağlı müraciət edə bilərdik. Lakin cavabı əvvəlcədən bildiyimiz üçün buna ehtiyac yoxdu. Onsuz da sorğumuzla bağlı bunları söyləyəcəklər:
“Konfedesionallığı qorumaq üçün bu barədə nəsə söyləyə bilmərik”.

Düzdü, “transfermarkt”da azərbaycanlı futbolçularla bağlı real olmayan qiymətlər çox göstərilib və göstərilir də, amma Avropa futboluna aid qiymətlərin hamısı doğru olur. Bizim üçün bu məsələ o qədər də vacib deyil. Əsas məqam budu ki, yarımmüdafiəçi Azərbaycan premyer-liqasında top qovacaq.
Bəs Ayaz Quliyev “Sabah”a fayda verə bilərmi? Bu suala cavab vermək asan deyil. Çünki futbolçu “Ximki”nin heyətində o qədər də yaxşı perfomans sərgiləmədi. Həm də Ayaz qalmaqallı şəxsdi. Rusiya mətbuatında haqqında xoş olmayan məlumatlar dərc olunurdu. Bu məqam da bizim üçün o qədər vacib deyil. Onsuz da “Sabah”ın baş məşqçisi Murad Musayev bu tipdə futbolçuları sevir. Rusiyalı mütəxəssis, yəqin ki, yaxından tanıdığı Ayazın bu xüsusiyyətlərinə bələddi. Yəni davranışına görə Ayaz “Sabah”da hansısa problemi yaşamayacaq. Bəs “bayquşlar”ın heyətində müntəzəm oynaya biləcəkmi? Əvvəlcə onu qeyd edək ki, Ayaz yarımmüdafiənin mərkəzində çıxış edir. Bu mövqedə isə “Sabah”da, demək olar ki, yaxşı futbolçular yer alıb. Elvin Camalovla Kristian da Silva dayaq, Aleksey İsayev, Vinset Till, Anatoli Nuriyev kimi oyunçular isə mərkəz yarımmüdafiəçi kimi meydana çıxır. Belədə Ayazın tezliklə əsas heyət üzvü olması çətin məsələdi. Lakin gəlin hadisələrə başqa yöndən baxaq. Yarımmüdafiəçi “8” nömrəli formanı geyəcək. Görəsən, bu seçim nəyə əsasən edilib? “Sabah”ın heyətində Aleksey Kaşuk bu formanı geyirdi. İndi “8” nömrəni Ayaza veriblərsə, deməli, yarımmüdafiəçi komanda üçün önəmli fiqur olacaq. Belə görünür ki, Murad Musayev Elvinin yaşını, Kristian da Silvanın da səviyyəsinin o qədər yüksək olmadığını nəzərə alaraq Ayazı yarımmüdafiənin dayağında oynadacaq. Ya da rotasiya edərək futbolçunu elə Kaşukun mövqeyində - sağ cinah vingeri olaraq sınaya bilər.

Musayevin futbolçunun tezliklə Azərbaycan pasportunu alacağını söyləməsi də Ayazın “Sabah”da əsas heyət üzvü olacağının siqnalıdı.
Bu açıqlamadan bir sual da ortaya çıxır: AFFA yarımmüdafiəçinin “milliləşdirilməsini” həll edib? Bu sualı qurumun Mətbuat və İctimaiyyətlə Əlaqələr Departamentinin rəhbəri Elnur Məmmədliyə ünvanladıq: