Avqustun 29-da Çempionlar Liqasının (ÇL) pley-offunun ilk qalibləri müəyyənləşdi.

“Football-plus.az” xəbər verir ki, həmin gün bu mərhələnin cavab görüşlərindən üçü keçirildi. Bu oyunların nəticələrinə əsasən “Braqa”, “Qalatasaray” və “Yanq Boyz” qrupda çıxış etmək hüququ qazandı.

Diqqəti cəlb edən əsas fakt qalib komandaların rəqibləri üzərində aşkar üstünlüyə malik olmasıdı. Portuqaliyada “Panatinaikos”a 2:1 hesabıyla qalib gələn “Braqa” üçün Yunanıstana səfərin asan keçməyəcəyi ehtimal olunurdu.

Xatırladaq ki, afinalılar ilk oyunda onlara vacib olan qolu son saniyələrdə vurmuşdular. Bu qol İvan Yovanoviçin komandasının mərhələni adlamaq imkanını bir qədər artırmışdı. Bu cütdəki rəqabətin gərginliyi Afinadakı həlledici oyunun az qala hər epizodunda hiss olunurdu. Bunun ilk qurbanı Yedvay oldu: yunanların “Lokomotiv”dən (Rusiya) icarəyə götürdüyü 27 yaşlı xorvat müdafiəçi fasiləyə az qalmış zədə alaraq meydanı tərk etdi. Real qol vəziyyətlərinə gəlincə, hesabı “Braqa” açmağa yaxın idi. Lakin İspaniyanın gənclərdən ibarət komandasının kapitanı Ruisin zərbəsini italiyalı qapıçı Brinyoni ayağı ilə dəf etdi. Yunanlar isə Vilyenanın yerinə yetirdikləri künc zərbəsindən sonra qola yaxın oldular. Bu epizodda qonaqların qapıçısı Mateus Vayannidisin zərbəsinə topa tirin altından müdaxilə etməklə reaksiya verdi. Braziliyalı əlcək sahibi 2-ci hissədə daha bir yaddaqalan seyv etdi: Palasiosun topu yerlə qapının uzaq küncünə yönəltmək cəhdinin qarşısını aldı. Hər halda, cavab görüşünün nəticəsini qol həll etdi: 83-cü dəqiqədə Bruma topu uzaq dirək istiqamətində tora qovuşdurdu. Ev sahibləri isə oyunboyu yaxaladıqları bütün imkanları boşa verdilər. Curiçiç ilə Şporar, belə desək, artıq topu qapıda görürdülər. Ancaq birinci imkanı qaçırdı, sonuncunun sevinməsinə isə 16 ildən sonra bu yay vətəni Portuqaliyaya qayıdan Fonte mane oldu. Yeri gəlmişkən, AÇ-2016-nın qalibi olan veteran müdafiəçi dekabrda 40 yaşını tamamlayacaq. Jozeni “Braqa”nın ÇL-in qrupuna vəsiqə qazanmasının əsas səbəbkarlarından saymaq olar. Onu da qeyd edək ki, Portuqaliya bu turnirin əsas mərhələsində ardıcıl üçüncü mövsüm üç komanda ilə təmsil olunacaq. Son çempion “Benfika” və vitse-çempion “Portu” mübarizəyə birbaşa qrupdan başlayacaqlar.
Hayfada ötən həftə keçirilən ilk oyunda hesabın açılmaması “Makkabi” ilə “Yanq Boyz” arasındakı cavab görüşünün də gərgin keçəcəyindən xəbər vermişdi. Əlbəttə, öz meydanında oynayacağından İsveçrənin son çempionunun uğur qazanmaq şansı yüksək dəyərləndirilirdi. Lakin Berndəki matçın lap əvvəlində buraxılan səhv ev sahiblərinə baha başa gələ bilərdi. İsrailli Davidin hesabı açması qapıçı Raçoppinin müdaxiləsindən sonra topun dirəyə dəyməsi ilə də mümkün olmadı. Əvəzində sağ cinahda fəal görünən Elia 5 dəqiqə ərzində “Makkabi”ni iki dəfə şoka salmağı bacardı: əvvəlcə İtten “ikinci mərtəbə”dən endirdiyi zərbə ilə hesabı açdı, az sonra isə onun güclü təzyiqindən təlaşa düşən seneqallı müdafiəçi Sek topu öz qapısına yönəltdi.
İsrailin son çempionu çərşənbə axşamı bəxtsizliklə də üzləşdi. Hayfalıların hücum xəttinin lideri Pyerro gözəl imkanı qaçırdı. Haitili futbolçu başı ilə tiri hədəfə aldı. Bu epizodda fərq minimuma ensəydi, qalan vaxtda mübarizə daha maraqlı ola bilərdi. İkinci hissə yenicə başlamışdı ki, intriqa məhv oldu: Uqriniç topun oyunçulardan birinə dəyməklə qapıçını da çaşdırdığı epizodun qəhrəmanına çevrildi. Beləliklə, “Makkabi” ardıcıl ikinci mövsüm qrupda oynamaq şansından yararlana bilmədi. Xatırladaq ki, hayfalılar ötən mövsüm “Benfika”, PSJ və “Yuventus”un da yarışdığı qrupu 3 xalla sonuncu yerdə başa vurmuşdular. “Yanq Boyz”un iki ildən sonra qrup mərhələsinə vəsiqə qazandığını da bildirək. Bernlilər onda “Mançester Yunayted”, “Vilyarreal” və “Atalanta”nın da yarışdığı qrupda 5 xalla sonuncu olmuşdular.

pley-off, cavab görüşləri
Panatinaikos (Yunanıstan) - Braqa (Portuqaliya) 0:1 (ilk oyun – 1:2)
Bruma, 83.
Yanq Boyz (İsveçrə) - Makkabi (Hayfa, İsrail) 3:0 (0:0)
İtten, 23. Sek, 28-öz qapısına. Uqriniç, 46.
Qalatasaray (Türkiyə) - Molde (Norveç) 2:1 (3:2)
İkardi, 7-p. Anxelinyo, 90+3 – Hestad, 66.