Qəzetimizdə "Olimpiya"ın baş məşqçisi Joao Enrikenin də mətbuat konfransının məzmununu təqdim etməliydik.

İlk oyundan sonra iddialı fikirlər səsləndirən portuqaliyalı mütəxəssisin baxışlarında dəyişiklik baş verib-vermədiyi, yəqin ki, kəs üçün maraqlıdı. Əslində biz “Futbol+” olaraq, “Bəhramov”a reportyor göndərmişdik. Cavid Əliyev mətbuat konfransının startının nəzərdə tutulduğu vaxta, yəni 20.00-a kimi gözləyib, sonra isə redaksiyaya əliboş qayıdıb. İş ondadı ki, vəziyyətin belə alınmasının, yəni azərbaycanlı oxucunun Joao Enrikenin oyunöncəsi fikirlərindən xəbər tutmamasının səbəbkarı portuqaliyalı mütəxəssis deyil.

Artıq neçənci dəfədi ki, azərbaycanlı jurnalistlərin biganəlik şəklində təzahür edən anlaşılmaz həmrəylinin əziyyətini oxucu çəkir. Deməli, Qurban bəy danışarkən konfrans salonunu dolduran jurnalistlər ardından kütləvi şəkildə getdiyindən Joao Enrike danışmağı lazım bilməyib. Saat 20.00-a cəmi 5 jurnalist qalıb ki, rəqibi çalışdırıcısı da bunu özünə hörmətsizlik sayıb.

Bir halda ki, dünən Bakıda əlahiddə dərəcədə pis hava şəraiti olmayıb, ictimai nəqliyyat normal qaydada çalışıb, onda azərbaycanlı jurnalistlərin rəqib çalışdırıcıya belə hörmətsizliyinin köklərini harda axtaraq? Şəxsən biz – “Futbol+”də çalışanlar belə düşünürük ki, bu jest rəqibə yox, ilk növbədə informasiya qaynağına, yəni Joao Enrikeyə, ardından bizdən yeni bilgi gözləyən azərbaycanlı oxucuya, nəhayət, həm də ali jurnalist peşəsinin prinsiplərinə hörmətsizlikdi. Bu hal təsadüfən baş versəydi, adi bir anlaşmazlığın nəticəsi olsaydı, bəlkə də üstündən sükutla keçmək olardı. Ancaq iş ondadı ki, rəqib çalışdırıcılara hörmətsizlik artıq tendensiya halını almaqdadı. “Sabah”ın Konfrans Liqasındakı rəqibləri Bakıya gələrkən hansı mənzərənin yaşandığından bu “mətbəx”in içində olanlar xəbərdardı. Və ya “Jelezniçar”ın baş məşqçisi Nermin Başiç Bakıdakı oyundan sonra mətbuat konfransına kapitanı göndərəndə vay-şüvən salan jurnalistlər nədən indi 50 yaşlı portuqaliyalı mütəxəssisə belə hörmətsizlik göstərir? Təbii ki, belə sualların heç bir cavabı yoxdu.

Əlbəttə, biz “Futbol+”in hörmətli oxucusundan dünən Joao Enrikenin oyunla bağlı fikirlərini çatdıra bilmədiyimizə görə üzr istəyirik. Baxmayaraq ki, bizim bunda zərrəcə günahımız yoxdu. Bu yay Bakıda keçirilən avrokubok oyunlarında heç kim sona qədər qalmayanda belə biz məhz peşə və oxucuya hörmət prinsipini əsas götürərək, rəqib çalışdırıcıları son ana qədər gözləmişik. Ortada bir gerçək həqiqət var: bu ölkədə təkcə futbol aləmi yox, futboldan yazan jurnalistlər də dəyişməlidi. Yoxsa dünənki biabırçılıqların sayı get-gedə artacaq.

HUŞƏNG